Agenda item

Cais amlinellol i godi tŷ fforddiadwy

 

AELOD LLEOL:        Cynghorydd Anwen J Davies

 

Dolen i'r dogfennau cefndir perthnasol

 

Cais amlinellol i godi tŷ fforddiadwy.

 

(a)       Ymhelaethodd y Rheolwr Cynllunio ar gefndir y cais, gan nodi y gohiriwyd y cais yng nghyfarfod y Pwyllgor a gynhaliwyd ar 3 Ebrill 2017 er mwyn cynnal ymweliad safle. ‘Roedd rhai o’r aelodau wedi ymweld â’r safle cyn y cyfarfod. 

 

Tynnwyd sylw y derbyniwyd llythyr gan berchennog dŷ cyfochrog yn datgan pryder cryf ynglŷn ag effaith y bwriad ar eiddo cyfochrog ers cyhoeddi’r rhaglen.

 

         Mynegwyd pryder sylweddol ynglŷn â’r datblygiad, ystyriwyd bod y bwriad yn or-ddatblygiad o’r safle cyfyng ac ni ystyriwyd bod y bwriad yn dderbyniol o agwedd Polisi B23 o Gynllun Datblygu Unedol Gwynedd (CDUG) oherwydd y byddai’n achosi niwed arwyddocaol i fwynderau’r gymdogaeth leol, yn or-ddatblygiad o safle cyfyng ac yn lleihau gofod amwynder y ddau dŷ presennol drwy ddefnyddio'r ardd fel llain ar gyfer y tŷ bwriadedig. Pwysleisiwyd nad oedd y ffaith mai’r ymgeisydd oedd yn berchen dau o’r tai cyfagos, yn goresgyn pryderon am or-ddatblygu’r safle cyfyng.

 

Tynnwyd sylw y gwrthodwyd cais blaenorol am yr un datblygiad dan hawliau dirprwyedig. Nodwyd nad oedd y bwriad cyfredol yn lleihau'r pryderon cynllunio sylweddol ynglŷn â’r bwriad ac fe argymhellwyd i wrthod y cais.

 

(b)     Gwnaed y prif bwyntiau canlynol gan yr aelod lleol (nad oedd yn aelod o’r Pwyllgor Cynllunio hwn):-

·         Bod y safle o fewn ffin datblygu’r pentref;

·         Byddai’r datblygiad yn galluogi person ifanc lleol i aros yn ei gynefin;

·         Bod y gymdogaeth o blaid y datblygiad;

·         Bod ceisiadau cynllunio am dai mewn gerddi o faint tebyg wedi eu caniatáu;

·         Bod yr ymgeisydd yn barod i drafod efo’r Gwasanaeth Cynllunio o ran maint ac uchder y tŷ.

 

Mewn ymateb i sylwadau’r aelod lleol, eglurodd y Rheolwr Cynllunio er mai cais amlinellol ydoedd roedd rhaid i’r ymgeisydd nodi uchafswm a lleiafswm o ran mesuriadau ac nid oedd yn bosib negodi ar y mesuriadau wedi i ganiatâd amlinellol gael ei roi.

 

(c)     Cynigwyd ac eiliwyd i wrthod y cais.

 

          Yn ystod y drafodaeth ddilynol nodwyd y prif sylwadau canlynol gan aelodau:

 

·         Y byddai’r bwriad yn arwain at ymwthiad gormesol a niweidiol i fwynderau trigolion eiddo preifat cyfagos;

·         Dim ond un unigolyn oedd wedi gwrthwynebu’r bwriad;

·         Dylid croesawu’r bwriad, angen tai i bobl leol gyda phobl ifanc yn gadael yr ardal;

·         Bod yr ymgeisydd yn barod i drafod efo’r Gwasanaeth Cynllunio o ran maint ac uchder y tŷ. Dylid caniatáu’r cais ac yna cynnal trafodaeth.

 

(ch)   Cynigwyd gwelliant i ohirio’r cais er mwyn cynnal trafodaeth bellach efo’r ymgeisydd o ran maint ac uchder y tŷ.

 

Nododd y Rheolwr Cynllunio na fyddai lleihau maint y tŷ yn goresgyn pryderon o ran gor-ddatblygiad oherwydd o ganlyniad i leihau’r maint, byddai’n debygol y byddai uchder y tŷ yn gorfod cynyddu gan wneud yr adeilad yn fwy gormesol.

 

Eiliwyd y gwelliant.

 

Pwysleisiodd yr Uwch Reolwr Gwasanaeth Cynllunio er bod y safle o fewn y ffin datblygu roedd y lleoliad yn cyfyngu'r hyn a ellir datblygu ar y safle. Nododd na fyddai cwtogi’r maint yn goroesi’r rhesymau gwrthod.

 

Nododd aelod er ei bod yn cydymdeimlo efo’r Aelod Lleol ni allai gefnogi’r cais gan y byddai’n or-ddatblygiad ac fe fyddai mwy o le parcio nag ardal hamdden ar y safle. ‘Roedd rhaid cofio y byddai’r datblygiad ar y safle am byth, nid yn unig i ymateb i anghenion y perchennog presennol.

 

Pleidleisiwyd ar y gwelliant i ohirio, syrthiodd y gwelliant. 

 

(d)     Mewn ymateb i sylw gan aelod, nododd yr Uwch Reolwr Gwasanaeth Cynllunio na fyddai man addasiadau yn goresgyn pryderon.

 

          Nododd aelod bod y safle yn rhy fach ar gyfer tŷ o faint rhesymol, er ei bod eisiau cefnogi pobl leol roeddent yn haeddu tŷ o safon. Ychwanegodd y byddai’r bwriad yn niweidiol i safon byw cymdogion a’r ymgeisydd.

 

(dd)   Yn unol â’r Rheolau Gweithdrefn, cofnodwyd y bleidlais ganlynol i wrthod y cais:

              

O blaid y cynnig i wrthod y cais (6):  Y Cynghorwyr Gwen Griffith, Anne Lloyd Jones, June Marshall, Michael Sol Owen, W. Tudor Owen a John Wyn Williams.

 

Yn erbyn y cynnig i wrthod y cais (5):  Y Cynghorwyr Simon Glyn, Eric M. Jones, John Pughe Roberts, Eirwyn Williams ac Owain Williams.

 

         Atal, (0)

 

          PENDERFYNWYD gwrthod y cais.

 

          Rheswm:

 

Byddai’r tŷ, oherwydd ei faint a lleoliad yn arwain at ymwthiad gormesol a niweidiol i fwynderau trigolion eiddo preifat cyfagos, yn enwedig oherwydd yr effeithiau dominyddol a gor-edrych a fyddai'n deillio ohono. Mae'r cais felly'n groes i bolisïau B23 Cynllun Datblygu Unedol Gwynedd ac yn tanseilio polisi PCYFF 1 CDLL.