Rhaglen, penderfyniadau a chofnodion

Derbyniwyd ymddiheuriad gan y Cynghorydd Mair Rowlands, Morwena Edwards (Cyfarwyddwr Corfforaethol) ac Iwan Trefor Jones (Cyfarwyddwr Corfforaethol)

Nid oedd unrhyw ddatganiad o fuddiant personol.

Nid oedd unrhyw faterion brys.

Nid oedd unrhyw faterion yn codi o drosolwg a chraffu.

Llofnododd y Cadeirydd gofnodion cyfarfod y Cabinet a gynhaliwyd ar y 14eg o Chwefror, 2017, fel rhai cywir.

Cyflwynwyd yr eitem gan Cyng. Gareth Roberts

PENDERFYNWYD

Cymeradwyo’r ffioedd canlynol ar gyfer 2017-18

*Nid yw’n cynnwys cyfraniad Iechyd

TRAFODAETH

Yn flynyddol mae angen adolygu’r ffioedd cartrefi gofal annibynnol. Mae wedi ei nodi dan adran 35 o’r Ddeddf Gwasanaethau Cymdeithasol a Llesiant (Cymru) 2014, fod gan y Cyngor ddyletswydd i ddiwallu anghenion gofal a chymorth oedolion sy’n preswylio’n arferol yn yr ardal. Nodwyd fod llawer o waith trafod wedi ei wneud gyda darparwyr, ac mae Grŵp Ffioedd Cartrefi Gofal Gogledd Cymru wedi gwneud llawer o waith ymchwil torfol.

Pwysleisiwyd fod categorïau amrywiol yn y maes, ac mae wedi amlygu fod gofal nyrsio yn her yng Ngwynedd, ac o ganlyniad mae’r ffioedd yn adlewyrchu’r straen ychwanegol ar nyrsio. Mynegwyd fod ffioedd yn amrywio o sir i sir ond fod yr amrediad yn isel ac o gwmpas rhyw £20.

‘Roedd y ffioedd ar ffurf drafft wedi bod yn Fforwm Darparwyr, nodwyd fod yr ymateb yn gadarnhaol.

Sylwadau yn codi o’r drafodaeth

-       Holwyd am bwynt 7 yn yr adroddiad a oedd yn Ddyfarniad Achos Llys. Nodwyd fod Achos Llys yn y Goruchaf Lys yn ystod mis Ebrill, a dadl a’i Awdurdod Lleol yntau’r Bwrdd Iechyd sydd am dalu am swm bychan o arian. Gall yr achos effeithio ar y ffioedd yma - ond bydd rhaid ystyried y sefyllfa ymhellach wedi i’r dyfarniad ddod i law.

Newid geiriad cymal 4.8 o Gynllun Ariannu Ysgolion i ddarllen fel a ganlyn:

4.8       Gweddillion cau ysgolion ac amnewid ysgolion

Bydd gweddill unrhyw ysgol sy’n cau (boed y gweddill hwnnw yn warged neu’n ddiffyg) yn eiddo i’r Awdurdod; ni ellir ei drosglwyddo       fel gweddill i unrhyw ysgol arall, heblaw i ysgol a sefydlwyd fel canlyniad i’r cau hwnnw.  Mewn sefyllfa o’r fath trosglwyddir y gweddill i’r ysgol newydd o dan ddarpariaethau Rheoliadau Cyllido Ysgolion (Cymru) 2010.

Cyflwynwyd yr eitem gan y Cyng. Gareth Thomas 

PENDERFYNWYD

Newid geiriad cymal 4.8 o Gynllun Ariannu Ysgolion i ddarllen fel a ganlyn:

4.8       Gweddillion cau ysgolion ac amnewid ysgolion

Bydd gweddill unrhyw ysgol sy’n cau (boed y gweddill hwnnw yn warged neu’n ddiffyg) yn eiddo i’r Awdurdod; ni ellir ei drosglwyddo fel gweddill i unrhyw ysgol arall, heblaw i ysgol a sefydlwyd fel canlyniad i’r cau hwnnw.  Mewn sefyllfa o’r fath trosglwyddir y gweddill i’r ysgol newydd o dan ddarpariaethau Rheoliadau Cyllido Ysgolion (Cymru) 2010.

TRAFODAETH

Nodwyd ar hyn o bryd fod y geiriad yn darllen fel y canlynol:

4.8       Gweddillion cau ysgolion ac amnewid ysgolion

Bydd gweddill unrhyw ysgol sy’n cau (boed y gweddill hwnnw yn warged neu’n ddiffyg) yn eiddo i’r Awdurdod; ni ellir ei drosglwyddo fel gweddill i unrhyw ysgol arall, hyn yn oed lle bo’r ysgol yn olynydd i’r ysgol sy’n cau

Ar hyn o bryd, os bydd ysgolion yn cau y bydd balansau yn mynd yn ôl i’r awdurdod. Nodwyd fod yr Adran Addysg yn teimlo ei bod yn fwy synhwyrol, os yw ysgol yn olynu’r ysgol sy’n cau, fod y balansau yn symud i’r ysgol newydd. Pwysleisiwyd fod y mater wedi ei drafod yn y Fforwm Cyllideb Ysgolion sydd yn argymell y newid, ac mae trafodaethau wedi bod gyda’r ysgolion.

Cymeradwyo’r canlynol:

•           Cadarnhau penderfyniad i Gyngor Gwynedd arwain y Cynllun Rhanbarthol ar ran y 4 Sir.

•           Yn amodol ar gymeradwyaeth WEFO, fod yr aelod cabinet mewn ymgynghoriad a’r Pennaeth Cyllid a’r Pennaeth Economi yn derbyn y cynnig grant o hyd at £1,461,000.

•           Cadarnhau fod Cyngor Gwynedd yn ymrwymo hyd at £150,000 o’r Gronfa Cydariannu tuag at y Cynllun.

• Cymeradwyo’r Pennaeth Economi a Chymuned i dderbyn cynnig grant o £1,203,437 yn amodol ar ddyfarniad Swyddfa Ariannu Ewrop i weithredu Cynllun AD-TRAC yng Ngwynedd.
• Ymrwymo i gydariannu’r cynllun hyd at £492,095 drwy’r dull a nodir yn yr adroddiad.

Cyflwynwyd yr adroddiad gan y Cyng. Mandy Williams-Davies

PENDERFYNWYD

• Cymeradwyo’r Pennaeth Economi a Chymuned i dderbyn cynnig grant o £1,203,437 yn amodol ar ddyfarniad Swyddfa Ariannu Ewrop i weithredu Cynllun AD-TRAC yng Ngwynedd.
• Ymrwymo i gydariannu’r cynllun hyd at £492,095 drwy’r dull a nodir yn yr adroddiad.

TRAFODAETH

Dyma brosiect ar y cyd gydag Awdurdodau Lleol Gogledd Cymru, Grŵp Llandrillo-Menai a Bwrdd Iechyd Betsi Cadwaladr i weithio gyda pobl ifanc 16-24 oed sydd ddim mewn addysg, hyfforddiant na chyflogaeth drwy roi cefnogaeth ddwys i’w galluogi i symud yn nes at addysg, hyfforddiant neu waith. Pwysleisiwyd mai pobl ifanc mwyaf bregus y gymdeithas fydd yn rhan o’r prosiect hwn.

Nodwyd ei fod yn brosiect werth £1.2miliwn. Nodwyd fod diweddariad ers cyhoeddi’r adroddiad, sef bod WEFO wedi cadarnhau bod y Cynllun Busnes yn dderbyniol a bydd llythyr yn cadarnhau hyn ar fin cyrraedd. Bydd yn nodi y gall partneriaid y cynllun dracio eu gwariant, a hawlio’r cyllid, o 1 Mawrth.

Sylwadau yn codi o’r drafodaeth:

-       Nodwyd fod y math yma o brosiect yn sicrhau fod pobl ifanc bregus yn gallu sefyll ar eu traed eu hunain, a bod arian Ewropeaidd yn gallu cyflawni a newid bywydau pobl.

-       Holwyd a oedd targedau’r cynllun yn ddigon heriol – sef i wneud gwahaniaeth i fywydau dros hanner y cyfanswm o 450 o bobl ifanc y bydd y cynllun yn ceisio eu cyrraedd? Nodwyd bod angen i’r Cyngor weithiau fod yn ddigon mentrus i gychwyn ar ddull newydd o weithio a bod yn barod i fethu. Nod y cynllun fyddai gwneud gwahaniaeth i fywydau’r cyfanswm o 450.Pwysleiswyd fod cost y pen yng Ngwynedd yn uwch na siroedd eraill Gogledd Cymru oherwydd natur ddaearyddol a gwasgaredig y sir. Mae costau cludiant er mwyn i’r unigolion gyrraedd y ddarpariaeth ac ar gyfer y gweithwyr o’r herwydd yn uwch.

Nodwyd mai gwaith ataliol mae’r grant hwn yn dalu amdano. Mae gwaith ymchwil wedi dangos y gall y gost tymor hir i wasanaethau cyhoeddus fod cymaint a £140,000 i bob unigolyn, ac felly bod gwario rhwng £3,000-£11,000 y pen dros 2-3 mlynedd yn gost effeithiol.Nodwyd fod Trac a Ad-Trac yn gweithio o fewn Fframwaith Ymgysylltu Cenedlaethol - ac wedi cyfnod tair blynedd yr ymyrraeth grant y bydd ymarfer da o’r gwaith yma yn cael ei wreiddio i mewn i’r Fframwaith Ymgysylltu.

1. Cefnogi’r model llywodraethu rhanbarthol a ffafrir- sef Cydbwyllgor statudol, i’w ddatblygu ymhellach
2. Cyfarwyddo swyddogion ni weithio gyda chydweithwyr mewn cynghorau partner i ddatblygu cyfansoddiad manwl a chytundeb rhwng awdurdodau ar gyfer y Cydbwyllgor arfaethedig gan ei gyflwyno er mwyn rhoi ystyriaeth i’r Cyngor ymrwymo i fodel Cydbwyllgor statudol gyda’r pum cyngor partner, o fewn tri mis cyntaf tymor newydd y Cyngor.
3. Nodi fod y Cyngor hwn hefyd yn disgwyl sicrhwydd o ran sefydlu Swyddfa Raglen a cael dealltwriaeth o’r strwythyr a dull ariannu’r Swyddfa honno pan yn cymeradwyo unrhyw gyfansoddiad / cytundeb.

Cyflwynwyd yr adroddiad gan y Cyng. Mandy Williams-Davies

PENDERFYNWYD

1. Cefnogi’r model llywodraethu rhanbarthol a ffafrir- sef Cydbwyllgor statudol, i’w ddatblygu ymhellach
2. Cyfarwyddo swyddogion i weithio gyda chydweithwyr mewn cynghorau partner i ddatblygu cyfansoddiad manwl a chytundeb rhwng awdurdodau ar gyfer y Cydbwyllgor arfaethedig gan ei gyflwyno er mwyn rhoi ystyriaeth i’r Cyngor ymrwymo i fodel Cydbwyllgor statudol gyda’r pum cyngor partner, o fewn tri mis cyntaf tymor newydd y Cyngor.
3. Nodi fod y Cyngor hwn hefyd yn disgwyl sicrwydd o ran sefydlu Swyddfa Raglen/prosiect er mwyn cael  dealltwriaeth o atebolrwydd, y strwythur a dull ariannu’r Swyddfa honno pan yn cymeradwyo unrhyw gyfansoddiad / cytundeb.

TRAFODAETH

Ym Medi 2016 bu i’r Cabinet gymeradwyo’r Weledigaeth ar Gyfer Twf yr Economi yng Ngogledd Cymru. Nodwyd mai’r cam nesaf yw hwn, sef creu Cydbwyllgor Statudol er mwyn llywodraethu ac i edrych sut i fynd ymlaen a’r gwaith. Pwysleisiwyd mai’r bwriad yw dod a’r cynllun ger bron y Cyngor Llawn newydd o fewn 3 mis.

Sylwadau yn codi o’r drafodaeth

-  Nodwyd ei bod yn gyfle i warchod a datblygu ardaloedd unigryw sy’n cynnal yr economi mewn ffordd wahanol a chynnal cymunedau unigryw yng Ngwynedd

-  O dderbyn y model llywodraethu, holwyd am Adnoddau digonol i gefnogi’r gwaith ee swyddfa Prosiect/rhaglen, a bod angen eglurder am yr Adnoddau ariannol ac Adnoddau dynol i gefnogi hynny.  Nodwyd hefyd yr angen am arweinydd fyddai’n atebol am y prosiect yn ei gyfanrwydd. 

1. Nodi’r cynnydd calonogol tuag at wireddu’r cynlluniau arbedion 2015/16 - 17/18.
2. Derbyn yn ffurfiol fod dau gynllun hanesyddol am ddisgyn yn fyr o’r targed arbedion sef:

3. Er mwyn cyflawni’r targed o £81,566 “Arbedion Trawsadrannol I’w Darganfod” yn 2016/17, cymeradwyo defnydd arbedion mae’r Adran Cyllid wedi eu gwireddu yn gynnar.

Cyflwynwyd yr eitem gan y Cyng.  Peredur Jenkins

PENDERFYNWYD

1. . Nodi’r cynnydd calonogol tuag at wireddu’r cynlluniau arbedion 2015/16 - 17/18.
2. Derbyn yn ffurfiol fod dau gynllun hanesyddol am ddisgyn yn fyr o’r targed arbedion sef:

3. Er mwyn cyflawni’r targed o £81,566 “Arbedion Trawsadrannol i’w Darganfod” yn 2016/17, cymeradwyo defnydd arbedion mae’r Adran Cyllid wedi eu gwireddu yn gynnar.

TRAFODAETH

Nodwyd fod yr  adroddiad cynnydd yn drosolwg o’r hyn sydd wedi ei gyflawni dros y ddwy flynedd diwethaf. Pwysleisiwyd mai cyfrifoldeb yr aelodau perthnasol o’r Cabinet yw gwireddu’r arbedion, gyda’r Aelod Cabinet Adnoddau yn  cadw trosolwg o’r darlun o’r arbedion yn ei gyfanrwydd.

Yn Strategaeth Ariannol 2016/17 mae £9,201,411 o arbedion wedi eu cynllunio, sef 141 cynllun.  O’r 141 o’r cynlluniau adrannol mae 128 wedi eu gwireddu yn llawn neu yn rhannol. Rhagwelir y bydd 94% o arbedion 2016/17 wedi eu gwireddu ar amser.

Mynegwyd fod angen dileu’r bwlch o £150,684 o ddau gynllun hanesyddol - “Galluogi” a “Hwb Rhanbarthol Gogledd Cymru”. Roedd y ddau gynllun wedi eu datblygu fel rhan o’r nod i adnabod £5m o arbedion Trawsadrannol, ond maent wedi cyflawni llai o arbedion nag oed wedi ei ragweld.

Sylwadau yn codi o’r drafodaeth

-       Pwysleisiwyd fod gwaith arbennig wedi ei wneud ar draws y Cyngor i sicrhau gwireddu’r  swm uchel o £9.2m.  Diolchwyd i bawb am y gwaith  gwaith arbennig sydd wedi bod ynghlwm â gwireddu’r arbedion hyn.

Parhau i fonitro y sefyllfa y flwyddyn ariannol ganlynol.

PENDERFYNIAD

Cyflawni’r gwaith uwchraddio cyflenwadau dwr preifat mewn manddaliadau ar gost o hyd at £400,000 gan benderfynu ar ba ddull i’w ddefnyddio ar gyfer ei ariannu o’r 2 ddewis sydd ar gael wrth sefydlu Cynllun Rheoli Asedau newydd y Cyngor.

Cyflwynwyd yr adroddiad gan y Cyng. Dafydd Meurig

PENDERFYNWYD

Cyflawni’r gwaith uwchraddio cyflenwadau dwr preifat mewn manddaliadau ar gost o hyd at £400,000 gan benderfynu ar ba ddull i’w ddefnyddio ar gyfer ei ariannu o’r 2 ddewis sydd ar gael, wrth sefydlu Cynllun Rheoli Asedau newydd y Cyngor.

TRAFODAETH

Nodwyd fod 42 o fandaliaid ym mherchnogaeth y Cyngor ac mae 16 o’r rhain wedi ei lleoli mewn ardaloedd anghysbell, filltiroedd lawer o brif gyflenwadau dwr cyhoeddus. Mae Rheoliadau Cyflenwadau Dwr Preifat 2009  yn gosod safonau hylendid a ddisgwylir.  Er mwyn cyrraedd y safonau hyn, mae’n angenrheidiol bwrw ymlaen gyda’r gwaith uwchraddio. 

Nodwyd nad oes cyllid ar gael yn bresennol gan y Gwasanaeth Eiddo i wneud y gwaith anorfod yma.  Ystyriwyd yr opsiynau cyllido fel a ganlyn:

-       y stad man-ddaliadau, gan ystyried gwaredu o’r stad er mwyn ariannu

-       blaenoriaethau’r rhaglen gyfalaf yn sgil sefydlu yr ail gynllun rheoli asedau, sy’n cael ei ystyried yn gyfredol.

Sylwadau yn codi o’r drafodaeth

Nodwyd nad yw’r swm ar gyfer cyflawni y gwaith yn hollol glir hyd yma, ac ystyriwyd ei fod yn rhesymol gwneud eithriad y tro hwn i danysgrifio i un o’r opsiynau uchod yn hytrach nag adnabod ffynhonnell benodol er mwyn galluogi bwrw ymlaen gyda’r gwaith.

PENDERFYNIAD

Cymeradwyo’r cynnig i barhau’r trefniant o ddarparu’r Gwasanaeth Polisi Cynllunio ar y Cyd ar gyfer Cyngor Gwynedd a Chyngor Sir Ynys Môn am 5 mlynedd bellach.

Rhoi’r awdurdod i’r Pennaeth Rheoleiddio a’r Pennaeth  Gwasanaethau Cyfreithiol i adolygu a chytuno ar gytundeb cydweithio newydd i ymestyn y cyfnod a chydweithio i gynnwys:

• Adolygu a chytuno ar drefniadau gweinyddu, gweithredu a rheoli’r Uned Polisi Cynllunio ar y Cyd
• Adolygu rôl y Pwyllgor Polisi Cynllunio ar y Cyd fel corf trawsffiniol ar gyfer gwneud penderfyniadau cyn adrodd yn ôl i’r Cabinet am gymeradwyaeth.

Cyflwynwyd yr adroddiad gan y Cyng. Dafydd Meurig

PENDERFYNWYD

Cymeradwyo’r cynnig i barhau’r trefniant o ddarparu’r Gwasanaeth Polisi Cynllunio ar y Cyd ar gyfer Cyngor Gwynedd a Chyngor Sir Ynys Môn am 5 mlynedd bellach.

Rhoi’r awdurdod i Pennaeth Rheoleiddio a’r Pennaeth Gwasanaethau Cyfreithiol i adolygu a chytuno ar gytundeb cydweithio newydd i ymestyn y cyfnod a chydweithio i gynnwys:

• Adolygu a chytuno ar drefniadau gweinyddu, gweithredu a rheoli’r Uned Polisi Cynllunio ar y Cyd
• Adolygu rôl y Pwyllgor Polisi Cynllunio ar y Cyd fel corff trawsffiniol ar gyfer gwneud penderfyniadau cyn adrodd yn ôl i’r Cabinet am gymeradwyaeth.

TRAFODAETH

Mae Gwynedd a Môn wedi bod yn cydweithio ar ddarparu Gwasanaeth Polisi Cynllunio ar y Cyd ers pum mlynedd bellach, ond mae’r cytundeb gwreiddiol yn dod i ben ddiwedd y flwyddyn, neu wedi i’r cynllun gael ei fabwysiadu gan y ddau awdurdod, pa bynnag un fydd gynharaf.  Bydd gwaith angenrheidiol yn parhau yn dilyn mabwysiadu’r cynllun er mwyn ei fonitro a’i adolygu ayyb.

Cafwyd adolygiad o’r gwaith a nodwyd fod y model cydweithio wedi torri tir newydd yn y maes polisi cynllunio ac mae’r model yn cael ei gydnabod gan Lywodraeth Cymru fel esiampl y dylai Awdurdodau Cynllunio eraill fod yn ei ystyried. Nodwyd yn ogystal fod y prosiect wedi gwneud arbediad o £600,000 rhwng y ddau Awdurdod.

Sylwadau yn codi o’r drafodaeth

-       Holwyd am niferoedd staffio yn lleihau, ac esboniwyd fod proffil staffio yn cyd-fynd â phroffil y gwaith sydd i’w gyflawni gan yr uned. 

a)    Derbyn a nodi’r wybodaeth yn yr adroddiad.

b)    Cymeradwo ail broffilio gwireddu pedwar o’r cynlluniau arbedion fel a ganlyn:

Cyflwynwyd yr adroddiad gan y Cyng. Gareth Roberts

PENDERFYNWYD

a)    Derbyn a nodi’r wybodaeth yn yr adroddiad.

b)    Cymderadwyo ail broffilio gwireddu pedwar o’r cynlluniau arbedion fel a ganlyn:

TRAFODAETH

Nodwyd fod yr adran yn datblygu, fod newidiadau yn gwreiddio ac fod effaith y newidiadau yn cael eu teimlo yn raddol.  

Tynnodd yr  yr Aelod Cabinet sylw at ambell brosiect, gan gynnwys gweithio yn integredig a phrosiect Llys Cadfan.  Mae prosiect Llys Cadfan yn brosiect cyffrous sy’n gweithio tu allan i’r bocs.  Pwrpas y prosiect yw  rhoi cefnogaeth yn fwy lleol i bobl yn ne’r  Sir.

Tynnwyd sylw at fesurau perfformiad ac yn benodol at “bobl sy’n nodi y gallent wneud yr hyn sy’n bwysig iddynt” - mae’n fesur newydd i’r adran ac mae 57%yn teimlo eu bod yn gallu gwneud beth sy’n bwysig iddynt.

Nodwyd fod swm y gorwariant wedi gostwng o £168,000 i oddeutu £88,000.

Sylwadau yn codi o’r drafodaeth

-        Mewn ymateb i ymholiad, nodwyd y disgwylir adroddiad ar ganfyddiadau ac argymhellion gan (AGGCC) yn ystod yr wythnosau nesaf.  ,

Tynnwyd sylw at Fesur 5.7 - “cyfradd oedi wrth drosglwyddo gofal am resymau gofal cymdeithasol” - nodwyd fod trafodaethau yn digwydd ar hyn o bryd er mwyn ceisio gwella y sefyllfa. 

Derbyn a nodi’r wybodaeth yn yr adroddiad.

Cyflwynwyd yr adroddiad gan y Cyng. Dyfed Edwards yn absenoldeb Cyng. Mair Rowlands

PENDERFYNWYD

Derbyn a nodi’r wybodaeth yn yr adroddiad.

TRAFODAETH

Nodwyd fod yr adroddiad cynhwysfawr sy’n nodi’r prosiectau yn y cynllun strategol. Pwysleisiwyd fod gwaith yn parhau gyda rhannau o’r gwasanaeth ieuenctid a hamdden i drawsffurfio a datblygu ar gyfer y dyfodol.

Sylwadau’n codi o’r drafodaeth

-       Gofynwyd am adroddiad pellach i’r cyfarfod nesaf er mwyn esbonio os oes gwahaniaeth wedi digwydd i fywydau’r bobl ifanc sydd wedi derbyn achrediadau gan y gwasanaeth ieuenctid, ac ym mha ffordd y mae’r achrediadau wedi gwneud gwahaniaeth.

-       Gofynnwyd am esboniad am y gwahaniaeth yn y ffigurau am yr achrediadau gan y gwasanaeth ieuenctid gan nad oedd eglurder llawn.  

-       Cynnydd wedi bod mewn plant sydd mewn gofal – cafwyd cadarnhad fod  gwaith yn cael ei wneud, ac y bydd adroddiad yn mynd i’r Tîm Arweinyddiaeth.

Derbyniwyd yr adroddiad a chymeradwyo ail broffilio’r Cynlun Peidio Talu’r ffi am dalu Treth Cyngor yn y swyddfa bost I 2018/19 yn hytrach na 2017/18 fel y bwriad gwreiddiol

Cyflwynwyd yr adroddiad gan y Cyng. Peredur Jenkins

PENDERFYNIAD

Derbyniwyd yr adroddiad a chymeradwyo ail broffilio’r Cynllun Peidio Talu’r ffi am dalu Treth Cyngor yn y Swyddfa Bost i 2018/19 yn hytrach na 2017/18 fel y bwriad gwreiddiol

TRAFODAETH

Nodwyd fod 12 adolygiad gwasanaeth wedi eu cwblhau, yn ogystal a rhaglen hyrwyddo egwyddorion Ffordd Gwynedd ymysg rheolwyr Cynhelir sesiynau hyfforddiant mewnol pellach ar gyfer Rheolwyr o fis Ebill ymlaen, ac awgrymwyd y byddai o fudd i Aelodau Cabinet newydd fynychu’r sesiynau yma.

Nodwyd fod her mewn gwireddu cynllun toriad rhif 13 (peidio talu ffi am dalu Treth Cyngor yn y Swyddfa Bost) ac o ganlyniad bydd angen gwaith ymchwil pellach ar y prosiect hwn, ac felly angen ail broffilio’r arbediad i’w wireddu yn 2018/19.

Sylwadau yn codi o’r drafodaeth

-       Holwyd am system ffeilio electroneg (EDRMS) – esboniwyd ei fod yn system newydd  ar gyfer ffeilio yn electroneg, sydd yn lleihau y nifer ffeiliau sy’n cael eu cadw gan geisio sicrhau cadw’r ffeiliau hanfodol yn unig.

-       Nodwyd fod % dyddiau salwch yn cynyddu (er yn gymharol isel ar lefel Cymru) - a nodwyd fod nifer o’r rhain yn salwch tymor hir.

Derbyn a nodi’r wybodaeth yn yr adroddiad.

Cyflwynwyd yr adroddiad gan y Cyng. Ioan Thomas

PENDERFYNIAD

Derbyn a nodi’r wybodaeth yn yr adroddiad.

TRAFODAETH

Nodwyd fod tai fforddiadwy yn brosiect sydd yn mynd rhagddo gan gydweithio gyda Grwp Cynefin. Mae gwaith yn cael ei wneud ym Mhenygroes, Waunfawr, Llanuwchllyn a Bethesda.

Mynegwyd fod cynnydd wedi bod yn nifer y cyfeiriadau i’r Uned Ddigartrefedd, ac mae dirywiad yn y mesuriadau perfformiad. Ond mae gwaith yn cael ei wneud i geisio ymateb i’r angen.

Nodwyd fod y Cyngor wedi cytuno i dderbyn 40 o ffoaduriaid rhwng 2016-20. Gobeithir erbyn mis Ebrill eleni y bydd ugain o ffoaduriaid wedi eu derbyn i’r sir  ac wedi lletya yng Ngogledd y Sir.

Sylwadau yn codi o’r drafodaeth

-       Cywiriad i’w nodi yn % marwolaethau wedi eu cofrestru o fewn 5 diwrnod - angen ei gywiro o 5% i 95%

Cymeradwyo’r Flaenraglen a gynhwyswyd yn y papurau i’r cyfarfod gyda newidiadau a ganlyn:

Cyflwyniad gan Ffion Johnstone – Gareth Roberts *

*Gareth Thomas oedd i’w weld yn y drafft.

Cyflwynwyd yr adroddiad gan y Cyng. Dyfed Edwards

PENDERFYNWYD

Cymeradwyd y Flaenraglen a gynhwyswyd yn y papurau i’r cyfarfod, yn amodol ar wneud yr addasiadau isod:

-       Cyng. Gareth Thomas – Newid enw’r Aelod Cabinet yn yr eitem Cyflwyniad gan Ffion Johnstone.