Agenda item
Gosod mast telethrebu 21m o uchder gan gynnwys gorsaf radio, 3 antena, 2 gabinet offer, cyfarpar offer cysylltiedig ynghyd a ffens diogelwch 1.8 o uchder
AELOD LLEOL: Cynghorydd
Judith M Humphreys
Dolen i'r dogfennau cefndir perthnasol
Cofnod:
Gosod
mast telathrebu 21m o uchder gan gynnwys gorsaf radio, 3 antena, 2 gabinet
offer, cyfarpar offer cysylltiedig ynghyd â ffens diogelwch 1.8 o uchder.
(a)
Ymhelaethodd y Rheolwr
Cynllunio ar gefndir y cais, gan nodi y gohiriwyd y cais yng nghyfarfod y Pwyllgor
a gynhaliwyd ar 4 Medi 2017. Nodwyd bod y safle wedi ei leoli ar gyrion Penygroes i gefn safle
cyfnewidfa ffôn a oedd yn cynnwys
adeilad unllawr parhaol.
Tynnwyd sylw at y sylwadau ychwanegol a dderbyniwyd.
Nodwyd bod gofynion cyffredinol Polisi PS3 o’r CDLl yn
caniatáu cynigion isadeiledd oedd yn ceisio estyn
neu wella cysylltiadau trwy gyfrwng y technolegau cyfathrebu presennol a rhai a oedd
yn cael eu
datblygu.
Eglurwyd bod Polisi Cynllunio Cymru yn datgan yn glir mewn perthynas â
goblygiadau datblygiad arfaethedig o’r fath i iechyd mai barn Llywodraeth Cymru
oedd na ddylid bod angen i awdurdodau cynllunio lleol ystyried ymhellach unrhyw
effeithiau iechyd na’r pryderon amdanynt wrth brosesu cais am ganiatâd cynllunio
neu gymeradwyaeth o flaen llaw os oedd y datblygiad yn bodloni gofynion y
Comisiwn Rhyngwladol ar Amddiffyn rhag Ymbelydriad Anïoneiddiol (ICNIRP). Derbyniwyd gwybodaeth gan yr ymgeisydd yn dangos
cydymffurfiaeth gyda’r safonau yma.
Nodwyd ei fod yn anorfod y byddai’r prif strwythur
arfaethedig yn rhannol weladwy o fannau cyhoeddus oherwydd yr angen
iddo fod mewn lleoliad weddol
agored er mwyn sicrhau y byddai’n gweithio i’w gapasiti llawn.
Ystyriwyd y byddai’r datblygiad yn annhebygol
o gael effaith
amlwg hir dymor ar fwynderau
gweledol yr ardal leol. Adroddwyd
y derbyniwyd gwrthwynebiad hwyr o ran effaith y datblygiad ar heneb
Caer Engan, ymgynghorwyd efo CADW ac fe dderbyniwyd
cadarnhad nad oedd ganddynt wrthwynebiad
i’r bwriad.
Roedd y datblygiad yn dderbyniol o safbwynt polisïau lleol a
chenedlaethol perthnasol am y rhesymau a roddwyd yn yr adroddiad.
(b) Gwnaed y prif bwyntiau canlynol gan aelod oedd
yn gweithredu fel aelod lleol
(nad
oedd yn aelod
o’r Pwyllgor Cynllunio hwn):-
·
Bod y gymuned leol yn pryderu
am effaith negyddol y datblygiad ac yn awyddus i’w ail-leoli;
·
Bod dyletswydd i bwyllo yn
unol â Deddf Llesiant Cenedlaethau’r Dyfodol (Cymru) 2015 gyda’r angen i
sicrhau anghenion tymor byr a hir dymor;
·
Cyfeirio at astudiaethau ac
apeliadau oedd yn dangos effeithiau ymbelydredd electro
magnetig ar iechyd. Cydnabod nad oedd materion iechyd yn ystyriaeth o ran
penderfynu ar y cais;
·
Pryder o ran yr effaith
weledol a’i effaith ar fusnes Pant Du a oedd yn atyniad ar gyfer pobl leol ac
ymwelwyr;
·
Pryder y byddai mast newydd
diwydiannol amlwg yn effeithio ar gais Llechi Cymru am statws Safle Treftadaeth
y Byd (UNESCO);
·
Bod Grŵp Cynefin efo
cynllun i ddatblygu tai ger y safle a’u bod yn gwrthwynebu’r bwriad. Gallai
caniatáu’r cais atal y cynllun;
·
Yn unol â diwylliant Ffordd
Gwynedd dylid gwrando ar sylwadau trigolion a gwrthod y cais yn y lleoliad yma.
(c)
Mewn ymateb i’r
sylwadau uchod, nododd yr Uwch Gyfreithiwr ei fod yn gwerthfawrogi sylw’r aelod
bod y Pwyllgor yn y cyd-destun cynllunio wedi eu clymu o ran materion iechyd.
Cymerodd y cyfle i dynnu sylw’r aelodau at adolygiad barnwrol gerbron yr Uchel
Lys yn ddiweddar ynglŷn â heriau yn ymwneud â mast yn Ne’r Sir a’r effaith
ar iechyd. Nododd bod y Cyngor wedi amddiffyn yr her yn llwyddiannus. Nododd
hefyd, nad oedd tystiolaeth gerbron i wrthod ar sail iechyd a bod gwybodaeth
wedi ei gyflwyno gyda’r cais yn dangos ei fod yn cyfarch y gofynion statudol.
Eglurwyd pe gwrthodir y cais ar sail iechyd y byddai’n debygol y cyfeirir y
cais i gyfnod cnoi cil.
(ch)
Cynigwyd i wrthod y cais
yn groes i argymhelliad y swyddogion oherwydd byddai maint a dyluniad y mast yn y lleoliad yma yn
ddiwydiannol ei naws ac yn cael
effaith negyddol sylweddol ar fwynderau
gweledol yr ardal.
Eiliwyd y cynnig.
Yn ystod y drafodaeth ddilynol nodwyd y prif sylwadau canlynol
gan aelodau:
·
Pryder o ran effaith weledol y datblygiad a’i effaith ar
fusnes Pant Du. Dylid gwrthod y cais ar sail materion economaidd yn ogystal;
·
Nad oedd y lleoliad yn addas
gyda safleoedd mwy addas ar
gael;
·
Yn cydnabod bod angen am signal 4G ond yn pryderu o ran maint ac edrychiad y datblygiad a’i effaith ar adeiladau
cyfagos. Roedd lleoliadau eraill a fyddai’n gallu diwallu’r gofynion;
·
Ei fod yn ddatblygiad estron a fyddai’n ymwthiol ar y safle
lled wledig;
·
Pryder y byddai’r bwriad yn effeithio
ar ddelwedd y pentref a’i effaith
ar fusnesau lleol;
·
Bod y tir wrth ymyl safle’r
cais wedi ei glustnodi ar
gyfer datblygiad tai yn y CDLl ac fe
fyddai caniatáu’r cais yn rhwystr
o ran datblygu tai;
·
Bod perchnogion wedi buddsoddi yn eu tai ger
y safle ac fe fyddai’r datblygiad yn effeithio ar
eu gwerth;
·
Bod cysylltedd yn bwysig i
bobl oedd eisiau gweithio o adref felly roedd rhaid pwyso a mesur
y cais. Roedd yr ymgeisydd wedi
edrych ar leoliadau eraill ond ni fuasent yn caniatáu
ymdriniaeth ddigonol.
(d) Mewn ymateb i’r
sylwadau uchod, nododd y swyddogion:
·
Ni ddylid gwrthod
y cais ar sail materion economaidd oherwydd ni ellir eu cyfiawnhau. Yr angen i
ystyried yr angen am y ddarpariaeth a’r budd economaidd a fyddai’n deillio o’r
bwriad gan y byddai’n darparu cyflenwad signal 4G;
·
Nid oedd effaith ar werth
eiddo yn ystyriaeth gynllunio;
·
O ran y safle wrth ymyl a
oedd wedi ei ddynodi ar gyfer tai ni ellir cymryd i ystyriaeth y dynodiad er
mwyn gwrthod y cais hwn;
·
Gellir rhoi ystyriaeth i
effaith weledol y strwythur o unrhyw fangre.
PENDERFYNWYD gwrthod y cais.
Rheswm:
Byddai maint a dyluniad y mast yn y lleoliad yma yn ddiwydiannol ei naws ac yn cael effaith negyddol sylweddol ar fwynderau gweledol yr ardal.
Dogfennau ategol:
- Tir ger Cyfnewidfa Ffôn Penygroes, Ffordd y Sir, Penygroes, Caernarfon, eitem 5.2 PDF 344 KB
- Cynlluniau, eitem 5.2 PDF 618 KB