Agenda item
Ystyried y Cynllun Datblygu Lleol ar y Cyd fel a ddiwygiwyd gan newidiadau rhwymol yr Arolygydd a gwneud penderfyniad ynglŷn â’i fabwysiadu.
Cofnod:
Cyflwynwyd
adroddiad yr Aelod Cabinet Amgylchedd yn argymell i’r Cyngor fabwysiadu’r
Cynllun Datblygu Lleol ar y Cyd fel y diwygiwyd gan newidiadau rhwymol yr
Arolygydd.
Rhoddwyd
eglurhad ar drefn yr adroddiad a thynnwyd sylw at gamgymeriad i fap Llanrug
oedd yn y fersiwn papur. Amlygodd bod yr adroddiad yn un manwl a chadarnhaodd
ei fod yn bodloni a chydymffurfrio gyda gofynion deddfwriaethol ( Deddf
Cynllunio (Cymru) 2015, Deddf Cynllunio a Phryniant Gorfodol 2004, Rheoliadau Cynllunio Gwlad a
Thref (Cynllun Datblygu Lleol) (Cymru) 2005, Polisi Cynllunio Cymru a Llawlyfr
Cynllun Datblygu Lleol (2015)).
Byddai
mabwysiadu'r Cynllun yn gosod polisïau manwl i reoli datblygiadau hyd at 2026;
yn hwyluso darpariaeth datblygu newydd sydd ei angen i gwrdd ag anghenion cymunedau lleol; yn galluogi'r Cyngor i gyflawni ei strategaethau
tai a datblygiadau economaidd. Byddai gwrthod yn gadael yr Awdurdod heb gynllun
na pholisïau digonol i warchod tiroedd y Sir ac yn rhoi cyfleoedd i Ddatblygwyr
apelio yn erbyn penderfyniad i wrthod ar sail nad oedd Cynllun / Polisïau yn eu
lle.
Amlygwyd, ar sail
tystiolaeth leol, bod polisïau tai y Cynllun yn cynllunio ar gyfer 3712 i ardal
Awdurdod Cynllunio Gwynedd rhwng (2011-2026). Gyda'r Cynllun eisoes yn ei
chweched flwyddyn, cadarnhawyd bod y ffigwr yma yn cynnwys cartrefi sydd eisoes
wedi eu hadeiladu neu wedi derbyn caniatâd cynllunio. Y ffigwr gweddilliol ar
gyfer gweddill oes y Cynllun fydd 1366 sydd yn gyfartaledd o 137 o gartrefi
newydd y flwyddyn.
Wrth gymharu'r hen
strategaeth gyda’r Cynllun newydd adroddwyd bod yr hen strategaeth yn dueddol o
ganolbwyntio ar sefydliadau mawr o fewn ein trefi, ond bellach bod y cynllun
yma yn canolbwyntio ar ddynodiadau llai.Tynnwyd sylw hefyd at y polisïau
arloesol oedd wedi eu cynnwys yn y Cynllun.
Cynigiwyd ac eiliwyd, bod y Cyngor yn:
i.
mabwysiadu Cynllun Datblygu Lleol ar y Cyd Gwynedd
ac Ynys Môn 2011 i 2026 fel y diwygiwyd gan newidiadau a argymhellwyd gan yr
Arolygydd yn yr adroddiad ar yr Archwiliad (dyddiedig 30 Mehefin 2017)
ii.
cyhoeddi'r Cynllun a fabwysiadwyd, y Datganiad
Mabwysiadu, Adroddiad AG/AAS terfynol a'r adroddiad ARhC.
iii.
yn rhoi awdurdod
dirprwyedig i swyddogion i gywiro unrhyw wallau teipio a gramadegol, i ymdrin
ag unrhyw fân faterion cywirdeb neu gamgymeriadau, yn ogystal ag ymgymryd ag
unrhyw faterion cyflwyno eraill angenrheidiol a newidiadau canlyniadol (sydd eu
hangen yn dilyn y newidiadau argymhellir yn unol â pharagraff 1.10 yn adroddiad
yr Arolygydd), cyn cyhoeddiad terfynol Cynllun Datblygu Lleol ar y Cyd Gwynedd
ac Ynys Môn.
iv.
Bod y Canllawiau
Cynllunio Atodol a gafodd eu mabwysiadu i gefnogi’r cynlluniau datblygu
presennol, yn parhau i fod yn ystyriaethau perthnasol wrth benderfynu ar
geisiadau cynllunio, lle mae’n briodol, nes eu bod yn cael eu disodli gan rai
newydd neu’n cael eu tynnu’n ôl.
Mewn
ymateb i bryderon a leisiwyd iddo nad oedd y canllawiau atodol newydd y
bwriedir eu sefydlu yn cael eu hadlewyrchu yn ddigonol yn y cynnig, cynigodd yr
Aelod Cabinet ychwanegu cymal v i’r argymhelliad i gyfarch hyn, sef
v.
Bod y Canllawiau Cynllunio Atodol sydd wedi eu
hadnabod yn Atodiad 9 o’r Cynllun yn cael eu paratoi gan roi blaenoriaeth i:
-
CCA Cynnal a Chreu Cymunedau Unigryw a
Chynaliadwy
-
CCA Tai Fforddiadwy
-
CCA Tai Marchnad Lleol
-
CCA Math a Chymysgedd Tai
-
CCA Ymrwymiad Cynllun,
yn
unol ag amserlen fframwaith monitro'r Cynllun
Yn ystod y drafodaeth, nodwyd y
sylwadau canlynol dros wrthod yr argymhelliad:-
·
Nad oedd y Cynllun yn gwneud digon i arbed y
Gymraeg - bod risg o golli iaith. Y
Cynllun heb fesur yn wyddonol yr effaith ar yr iaith Gymraeg a dim tystiolaeth wedi ei gyflwyno i fonitro
effaith ar yr iaith
·
Nad oedd unrhyw addasiad wedi ei wneud i’r
ffigyrau tai a gytunwyd yn dilyn cyhoeddi cyfrifiad 2011 oedd wedi dangos gostyngiad
o 4% yn nifer y siaradwyr Cymraeg. Bod cais am wybodaeth parthed effaith
datblygiadau ar yr iaith ers 2011 heb ddod i law a heb y wybodaeth yma, nid
yw'r Cyngor mewn sefyllfa i dderbyn y Cynllun.
·
Bod 1700 o sylwadau wedi eu cynnig yn ystod
ymgynghoriad 2015 - llawer o’r sylwadau yn wrthwynebiadau, ond nifer wedi eu
diystyru gan fod y Cyngor yn honni nad oedd tystiolaeth rymus i’w cefnogi.
·
Bod peryglon
mabwysiadu yn uwch na’r angen.
·
Bod manylion a thystiolaeth adroddiad
annibynnol o effaith andwyol y Cynllun ar yr iaith heb ei ystyried.
·
Bod angen gwrthod a cheisio cyfle i addasu'r
Cynllun yn briodol a chyflwyno cynllun mentrus a blaengar fyddai yn addas i’n
cymunedau Cymraeg
·
Bod hunaniaeth y SIr yn y fantol pe byddem yn
derbyn cynllun amhriodol, di ddychymyg a difäol?
·
Nad oedd digon o ystyriaeth i gadw nifer y tai
i lawr a sicrhau digon o dai fforddiadwy
·
Nad oedd y cynllun wedi rhoi ystyriaeth
ddigonol i degwch cymdeithasol
·
Nad oedd yr ymateb yn ddigon egnïol i drigolion
Gwynedd
·
Bod gormod o dai marchnad agored
·
Bod cefn gwlad yn
cael ei amddifadu o dai
·
Nad oedd digon o
ymgynghori wedi ei wneud gyda’r cyhoedd
·
Nad oedd aelodau
newydd wedi cael cyfle i ystyried a deall y wybodaeth yn llawn
·
Bod bygythiadau gan
Lywodraeth Cymru yn arwain at wneud
penderfyniadau gwael. Y Cyngor yn cael ei hun mewn sefyllfa o gael ei
orfodi i wneud penderfyniad anodd. Petai'r Cyngor yn gwrthod, byddai
Llywodraeth Cymru yn mabwysiadu'r Cynllun ar ein rhan. Nid oedd hyn yn ddigon
da
·
Bod y Cynllun yn gwireddu gorchmynion
Llywodraeth Cymru ac yn tanseilio democratiaeth leol
Yn ystod y drafodaeth, nodwyd y sylwadau canlynol o blaid yr
argymhelliad:-
·
Bod y Cynllun yn
ymateb i’r galw am dai newydd ar gyfer pobl leol yng Ngwynedd. Llawer o stoc
tai'r Sir mewn cyflwr gwael. Cyfle yma i gynnal trafodaethau arloesol a
blaengar gyda chymdeithasau tai ar gyfeiriad y cynllun. Yr uchelgais yw gwella
safon byw trigolion Gwynedd gyda thai o safon uchel.
·
Bod y Cynllun yn unigryw - yn cynnwys polisïau
cadarn a blaengar o blaid ein cymunedau
·
Y dylid mabwysiadu'r cynllun yn llawn oherwydd
heb gynllun datblygu ni fydd rheolaeth dros safleoedd tu allan i’r ffiniau
datblygu fyddai yn arwain at effeithiau negyddol cymdeithasol ac ieithyddol Byddai
gwrthod yn gwneud mwy o ddrwg i’r iaith
·
Derbyn nad yw'n gynllun perffaith ond dogfen
fyw yw’r adroddiad gyda chyfle i
addasu yn
flynyddol, yn unol â’r angen, drwy gynnal trafodaethau, adolygu a monitro
rheolaidd. O ganlyniad, er enghraifft, bydd modd cynyddu’r nifer o dai
fforddiadwy petai angen hynny.
·
Bod modd cynllunio canllawiau atodol unigryw i Wynedd fydd yn
amddiffyn ein cymunedau ac nid eu difa.
·
Bod y Cynllun yn mynd i’r afael â heriau
sylweddol - codi tai i fodloni anghenion lleol, cryfhau cymunedau gwledig a
threfol, gwarchod yr amgylchedd a chreu cyfleoedd economaidd
·
Bod cenhadu dros ddefnydd y Gymraeg ar draws
holl Awdurdodau Cymru yn parhau yn flaengar. Dyfodol y Gymraeg yn dibynnu ar
swyddi da yn lleol, polisi iaith ein hysgolion a statws iaith mewn cymunedau.
·
Os na fuasai Cynghorwyr Gwynedd yn derbyn y
cyfrifoldeb, byddai’r cyfrifoldeb yn cael ei daflu i Gaerdydd at Weinidog nad
yw'r un mor gydymdeimladwy.
Mewn ymateb i
gwestiwn beth fyddai goblygiadau peidio mabwysiadu‘r cynllun a beth fyddai’r
camau nesaf o ystyried amserlen a chostau, nododd y Swyddog Monitro bod
dyletswydd ar y Cyngor i baratoi cynllun
a tynnwyd sylw at y risgiau o beidio mabwysiadu’r cynllun oedd wedi eu
rhestru yn yr adroddiad. Ychwanegodd yr Uwch Reolwr Cynllunio ac Amgylchedd mai
anodd fuasai rheoli datblygiadau i’r dyfodol ac atal datblygiadau fyddai yn
cael effaith ar ein cymunedau heb gynllun.
Yn ystod y drafodaeth gwnaed
cynigion i ohirio'r penderfyniad ar sail:
·
cael mwy o amser i gwblhau asesiad iaith annibynnol
a derbyn mwy o wybodaeth arbenigol ym maes cynllunio.
·
er mwyn gwahodd y Gweinidog i gynnal ymchwiliad
cyhoeddus gan na allent gytuno ar y ffordd ymlaen a gofyn am gyngor
ysgrifenedig o fewn maes cyfraith cynllunio arbenigol ar faterion cyfreithlondeb
y Cynllun.
·
i Lywodraeth Cymru ohirio'r penderfyniad er
mwyn rhannu gwybodaeth gydag Aelodau
newydd a gwneud gwaith pellach ar y canllawiau atodol, yn enwedig y canllaw
iaith
·
sefyll i fyny a gofyn i Lywodraeth Cymru am
amser ychwnaegol i wella cynnwys y cynllun.
Mewn ymateb i’r
cynigion, nododd y Swyddog Monitro:
·
Nad oedd llyffethair cyfreithiol i fabsywiadu’r
cynllun yn y cyfarfod.
·
Bod dyletswydd statudol ar y Cyngor i ddod i
benderfyniad ar fabwysiadu’r y Cynllun o fewn 8 wythnos i ddyddiad derbyn adroddiad yr Arolygydd (Mehefin 30ain 2017)
onibai fod caniatâd y llywodraeth wedi ei roi
i ymestyn y cyfnod. Nid oedd y fath ganiatâd wedi ei dderbyn Ni fuasai gohirio
am gyfnod amhenodol a thu hwnt i’r wyth
wythnos yn cyd-fynd a’r dyletswydd statudol yma.
·
Gan nodi statws clymol adroddiad yr Arolygydd,
y byddai’r Llywodraeth yn blaenoriaethu mabwysiadu a’u hymateb i sefyllfaedd
cyffelyb mewn cynghorau eraill ni fyddai cais o’r fath yn debygol o gael
derbyniad ffafriol.
Mewn ymateb i gwestiwn,
pam na ellid gweithredu o dan Gyfansoddiad y Cyngor ac eilio cynnig i ohirio'r
penderfyniad, amlygodd y Swyddog Monitro bod y Cyfansoddiad yn ddarostyngedig
i’r gyfraith ac na ellir derbyn cynnig fyddai yn arwain at benderfyniad croes
i’r gyfraith
Mewn ymateb i
gwestiwn, onid ydyw barn gyfreithiol annibynnol a’r gyfreithlondeb y Cynllun yn
werth ystyriaeth pawb yn y Cyngor, a bod hawl i weithredu hyn ar sail methiant
i gytuno, nododd y Swyddog Monitro, fel cynghorai'r Cyngor, nad oedd yn gwyro
oddi ar y cyngor yr oedd wedi ei gyflwyno i’r cyfarfod.
Galwyd am bleidlais gofrestredig ar yr argymhelliad a phleidleisiodd mwy
na chwarter yr aelodau oedd yn bresennol o blaid hynny.
Yn unol â’r Rheolau Gweithdrefn, cofnodwyd y bleidlais ganlynol ar yr argymhelliad:-
O blaid (30)
Y Cynghorwyr Craig
ab Iago, Steve Collings, Stephen Churchman, Annwen Daniels, Simon Glyn, Gareth
Griffith, Annwen Hughes, John Brynmor Hughes, R.Medwyn Hughes, Sian Wyn Hughes,
Peredur Jenkins, Anne Lloyd Jones, Berwyn Parry Jones Huw Wyn Jones, Dafydd
Meurig, Linda Morgan, Dafydd Owen, Dewi Owen, Edgar Owen, Rheinallt Puw,
W.Gareth Roberts, Mair Rowlands, Paul Rowlinson, Angela Russell, Dyfrig
Siencyn, Gareth Thomas, Ioan Thomas, Hefin Underwood, Cemlyn Williams a Gethin
Glyn Williams.
Yn erbyn (30)
Y Cynghorwyr,
Menna Baines, Dylan Bullard, Glyn Daniels, Anwen Davies, Elwyn Edwards, Alan
Jones Evans, Aled Evans, Peter Garlick, Selwyn Griffiths, Alwyn Gruffydd,
Louise Hughes, Aeron M Jones, Aled Wyn Jones, Charles Jones, Elin Walker Jones,
Elwyn Jones, Kevin Morris Linda Wyn Jones, Sion Jones, Cai Larsen, Dilwyn
Lloyd, Roy Owen, Jason Parry, Elfed Roberts, Mike Stevens, Eirwyn Williams,
Elfed Williams, Gareth Williams, Gruffydd Williams ac Owain Williams.
Atal (4)
Y Cynghorydd Freya
Hannah Bentham, Dylan Fernley, Eric Merfyn Jones a Dewi Roberts.
Gan fod canlyniad y bleidlais ar yr argymhelliad yn gyfartal, defnyddiodd
y Cadeirydd ei phleidlais fwrw o blaid yr argymhelliad.
Penderfynwyd,
i.
mabwysiadu Cynllun
Datblygu Lleol ar y Cyd Gwynedd ac Ynys Môn 2011 i 2026 fel y diwygiwyd gan
newidiadau a argymhellwyd gan yr Arolygydd yn yr adroddiad ar yr Archwiliad
(dyddiedig 30 Mehefin 2017)
ii.
cyhoeddi'r Cynllun
a fabwysiadwyd, y Datganiad Mabwysiadu, Adroddiad AG/AAS terfynol a'r adroddiad
ARhC.
iii.
yn rhoi awdurdod dirprwyedig i swyddogion i gywiro
unrhyw wallau teipio a gramadegol, i ymdrin ag unrhyw fân faterion cywirdeb neu
gamgymeriadau, yn ogystal ag ymgymryd ag unrhyw faterion cyflwyno eraill
angenrheidiol a newidiadau canlyniadol (sydd eu hangen yn dilyn y newidiadau
argymhellir yn unol â pharagraff 1.10 yn adroddiad yr Arolygydd), cyn
cyhoeddiad terfynol Cynllun Datblygu Lleol ar y Cyd Gwynedd ac Ynys Môn.
iv.
Bod y Canllawiau Cynllunio Atodol a gafodd eu mabwysiadu
i gefnogi’r cynlluniau datblygu presennol, yn parhau i fod yn ystyriaethau
perthnasol wrth benderfynu ar geisiadau cynllunio, lle mae’n briodol, nes eu
bod yn cael eu disodli gan rai newydd neu’n cael eu tynnu’n ôl.
v.
Bod y
Canllawiau Cynllunio Atodol sydd wedi eu hadnabod yn Atodiad 9 o’r Cynllun yn
cael eu paratoi gan roi blaenoriaeth i:
-
CCA Cynnal a
Chreu Cytundebau Unigryw a Chynaliadwy
-
CCA Tai
Fforddiadwy
-
CCA Tai
Marchnad Lleol
-
CCA Math a
Chymysgedd Tai
-
CCA Ymrwymiad
Cynllun,
yn unol ag amserlen
fframwaith monitro'r Cynllun
Dogfennau ategol:
- Cynllun Datblygu Lleol ar y Cyd Gwynedd a Môn, eitem 6. PDF 352 KB
- Atodiad 1. Rol Aelodau, eitem 6. PDF 216 KB
- Atodiad 2.1. Adroddiad yr Arolygydd CDLL ar y Cyd Gwynedd a Mon, eitem 6. PDF 521 KB
- Atodiad 2 2. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 1-6, eitem 6. PDF 500 KB
- Atodiad 2 3. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 7.1, eitem 6. PDF 275 KB
- Atodiad 2 4. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Penod 7.2, eitem 6. PDF 415 KB
- Atodiad 2 5. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 7.3, eitem 6. PDF 493 KB
- Atodiad 2 6. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 7.4, eitem 6. PDF 2 MB
- Atodiad 2 7. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 7.5, eitem 6. PDF 385 KB
- Atodiad 2 8. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Pennod 8, eitem 6. PDF 395 KB
- Atodiad 2 9. Adroddiad yr Arolygydd CDLL ar y Cyd Gwynedd a Mon, Atodiad A, Rhan 1, Atodiadau, eitem 6. PDF 892 KB
- Atodiad 2 10. Adroddiad yr Arolygydd CDLL ar y Cyd Gwynedd a Mon, Atodiad A, Rhan 2, Mapiau, eitem 6. PDF 6 MB
- Atodiad 2 11. Adroddiad yr Arolygydd CDLL ar y Cyd Gwynedd a Mon, Atodiad B - Cofrestr NMC Arolygydd, eitem 6. PDF 360 KB
- Atodiad 3 1. Clawr, eitem 6. PDF 58 KB
- Atodiad 3 2 Tudalen Cynnwys, eitem 6. PDF 82 KB
- Atodiad 3 3 Pennod 1 Cyflwyniad, eitem 6. PDF 173 KB
- Atodiad 3 4 Pennod 2 Cyd-destun Polisi, eitem 6. PDF 201 KB
- Atodiad 3 5 Pennod 3 Proffil gofodol a phrif faterion, eitem 6. PDF 346 KB
- Atodiad 3 6 Pennod 4 Gweledigaeth ac amcanion, eitem 6. PDF 166 KB
- Atodiad 3 7 Pennod 5 Y Strategaeth, eitem 6. PDF 452 KB
- Atodiad 3 8 Pennod 6.1, eitem 6. PDF 226 KB
- Atodiad 3 9 Pennod 6.2, eitem 6. PDF 257 KB
- Atodiad 3 10 Pennod 6.3, eitem 6. PDF 387 KB
- Atodiad 3 11 Pennod 6.4, eitem 6. PDF 385 KB
- Atodiad 3 12 Pennod 6.5, eitem 6. PDF 383 KB
- Atodiad 3 13 Pennod 7 Monitro a gweithredu, eitem 6. PDF 234 KB
- Atodiad 3 14 Atodiad 1 Profion cadernid, eitem 6. PDF 93 KB
- Atodiad 3 15 Atodiad 2 Rhestr Dogfennau Allweddol, eitem 6. PDF 77 KB
- Atodiad 3 16 Atodiad 3 Proffil ystadegol, eitem 6. PDF 271 KB
- Atodiad 3 17 Atodiad 4 Rhestr o aneddleoedd, eitem 6. PDF 113 KB
- Atodiad 3 18 Atodiad 5 Unedau efo caniatad cynllunio Ebrill 2015, eitem 6. PDF 139 KB
- Atodiad 3 19 Atodiad 6 Ardal Rheoli Newid Arfordirol, eitem 6. PDF 96 KB
- Atodiad 3 20 Atodiad 7 Rhestr o ardaloedd wedi'u hamddiffyn, eitem 6. PDF 130 KB
- Atodiad 3 21 Atodiad 8 Rhestr polisiau, eitem 6. PDF 112 KB
- Atodiad 3 22 Atodiad 9 Rhestr CCA, eitem 6. PDF 72 KB
- Atodiad 3 23 Atodiad 10, eitem 6. PDF 622 KB
- Atodiad 3 24 Rhestr Termau, eitem 6. PDF 188 KB
- Atodiad 3 25 Isranbarthol a Canolfannau Gwasanaeth Trefol Gwynedd, eitem 6. PDF 5 MB
- Atodiad 3 26 Canolfannau Gwasanaeth Trefol Môn, eitem 6. PDF 4 MB
- Atodiad 3 27 Canolfannau Gwasanaeth Lleol Gwynedd, eitem 6. PDF 6 MB
- Atodiad 3 28 Canolfannau Gwasanaeth Lleol Môn, eitem 6. PDF 6 MB
- Atodiad 3 29 Pentrefi Gwasanaeth Gwynedd, eitem 6. PDF 1 MB
- Atodiad 3 30 Pentrefi Gwasanaeth Môn, eitem 6. PDF 966 KB
- Atodiad 3 31 Pentrefi Lleol Gwynedd, eitem 6. PDF 4 MB
- Atodiad 3 32 Pentrefi Lleol Gwynedd, eitem 6. PDF 2 MB
- Atodiad 3 33 Pentrefi Arfordirol a Gwledig Gwynedd, eitem 6. PDF 3 MB
- Atodiad 3 34 Pentrefi Arfordirol a Gwledig Môn, eitem 6. PDF 3 MB
- Atodiad 3 35 Clystyrau Gwynedd, eitem 6. PDF 4 MB
- Atodiad 3 36 Clystyrau Môn, eitem 6. PDF 4 MB
- Atodiad 3 37 Mapiau Eraill, eitem 6. PDF 1 MB
- Atodiad 3 38 Mapiau Cynigion Gwynedd, eitem 6. PDF 6 MB
- Atodiad 3 39 Mapiau Cynigion Môn, eitem 6. PDF 5 MB
- Atodiad 3 40 Mapiau Cyfyngiadau Gwynedd, eitem 6. PDF 18 MB
- Atodiad 3 41 Mapiau Cyfyngiadau Môn, eitem 6. PDF 10 MB
- Atodiad 4 Datganiad Mabwysiadu Drafft, eitem 6. PDF 430 KB
- Atodiad 5 Adroddiad Arfarniad Cynaliadwyedd, eitem 6. PDF 10 MB
- Atodiad 6 Adroddiad Asesiad Rheoliadau Cynefinoedd, eitem 6. PDF 507 KB
- Atodiad 6A Safleoedd Ewropeaidd, eitem 6. PDF 1 MB
- Atodiad 6B Adolygiad o'r Cynlluniau, Rhaglenni a'r Prosiectau, eitem 6. PDF 465 KB