Agenda item

Dymchwel tŷ presennol ac adeiladu tŷ 3 llawr yn ei le.

 

AELOD LLEOL:        Cynghorydd Dewi Wyn Roberts

 

Dolen i'r dogfennau cefndir perthnasol

Dymchwel tŷ presennol ac adeiladu tŷ 3 llawr yn ei le.

 

(a)     Ymhelaethodd y Rheolwr Cynllunio ar gefndir y cais, gan nodi bod y safle ar benrhyn Abersoch, y tu allan i ffin datblygu'r pentref a thu mewn i Ardal o Harddwch Naturiol Eithriadol Llŷn (AHNE). Nodwyd bod y safle ar amrywiol lefelau ac wedi ei leoli mewn ardal breswyl ac ymysg amryw o dai eraill a oedd wedi eu lleoli ar glogwyn uwchben y môr. Adroddwyd y cyflwynwyd lluniau gyda’r cais yn dangos y tŷ bwriadedig yn y tirlun ehangach; gweler o’r lluniau bod y tŷ yn weladwy o’r môr yn bennaf a’r eiddo cyfochrog i’r de a gogledd o’r safle. Ychwanegwyd y byddai’r to, peth o wal gefn y modurdy a wal derfyn y safle i’w gweld o’r llwybr cyhoeddus cyfochrog.

 

         Tynnwyd sylw at y sylwadau ychwanegol a dderbyniwyd gan gyfeirio at ymateb yr Uned AHNE i’r cynlluniau diwygiedig. Nodwyd bod yr Uned o’r farn na fyddai’r bwriad yn amharu ar yr AHNE. Yn dilyn derbyn sylwadau gan wrthwynebydd yng nghyswllt rhoi statws adeilad rhestredig i’r strwythur presennol, trafodwyd y sylwadau gydag Uwch Swyddog Cadwraeth y Cyngor ac fe gadarnhaodd nad oedd yr adeilad presennol o werth hanesyddol na phensaernïol ac nid oedd yn cyfiawnhau statws rhestredig.

 

Nodwyd bod Polisi CH13 o’r CDUG, sef y prif bolisi wrth asesu egwyddor y datblygiad, yn datgan y caniateir cynigion i ddymchwel tŷ mewn cyflwr gwael yng nghefn gwlad ac i ddatblygu unedau byw newydd os cydymffurfir a’r 5 maen prawf perthnasol.

 

Nodwyd yr ystyrir fod dyluniad yr eiddo o edrych arno o’r môr yn gweddu gyda’r safle oherwydd ei fod yn dilyn siâp, gosodiad a phroffil y safle a defnyddir deunyddiau a oedd yn creu dyluniad ysgafn. Teimlir bod y lluniau, a gyflwynwyd fel rhan o’r cais, yn dangos na fyddai’r adeilad yn creu datblygiad ymwthiol yn y tirlun ac er bod edrychiad y tŷ yn wahanol, ni ystyrir y byddai’n achosi niwed arwyddocaol i dirwedd ac arfordir yr AHNE.

 

Nodwyd bod Llwybr Cyhoeddus gerllaw’r safle a bod angen ei ddiogelu yn ystod ac ar ddiwedd y datblygiad a gellir gwneud hyn drwy amod ar y caniatâd cynllunio.

 

Nodwyd bod lleoliad, dwysedd, cynnydd mewn maint yn rhesymol a’r dyluniad a’r deunyddiau yn welliant i safle agored o’r fath. O gofio bod tŷ ar y safle’n bresennol, a sawl tŷ arall bob ochr i’r safle, ni fyddai newid arwyddocaol i dirlun a golygfeydd o, ac ar draws yr AHNE nac effaith sylweddol arwyddocaol ar fwynderau’r trigolion cyfagos.

 

         Roedd y datblygiad yn dderbyniol o safbwynt polisïau lleol a chenedlaethol perthnasol am y rhesymau a roddwyd yn yr adroddiad.

 

(b)     Yn manteisio ar yr hawl i siarad nododd cynrychiolydd yr ymgeisydd y prif bwyntiau canlynol:-

·         Bod y datblygiad wedi ei ddylunio i gyd-fynd efo amlinell/ffurf y tir;

·         Bod y dyluniad yn ceisio cael cydbwysedd o ran preifatrwydd cymdogion a’r dyhead am olygfeydd;

·         Diwygiwyd uchder yr adeilad a’r wal ar y ffin ger y maes parcio cyhoeddus er mwyn gwella golygfeydd o’r llwybr cyhoeddus ac fe gydnabuwyd y newid gan yr Uned AHNE;

·         Bod y lluniau a gyflwynwyd fel rhan o’r cais yn dangos, yn arbennig yr un o gyfeiriad Lôn Pont Morgan, y byddai’r datblygiad prin yn weladwy o’r pentref;

·         Nid oedd cymdogion wedi gwrthwynebu ac roedd yr ymgeisydd wedi cyfarch eu sylwadau.

 

(c)     Cynigwyd ac eiliwyd i gynnal ymweliad safle.

 

          Yn ystod y drafodaeth ddilynol nodwyd y prif sylwadau canlynol gan aelodau:

 

·         Pryder o ran egwyddor dymchwel a chodi tŷ a byddai ceisiadau eraill yn cael eu cyflwyno pe caniateir y cais. Bod dymchwel adeiladau yn cael ei yrru gan resymau masnachol yn hytrach na phryderon am sefydlogrwydd yr adeilad;

·         Os caniateir y cais byddai delwedd bentrefol Abersoch yn newid yn gyfan gwbl;

·         Bod y Cyngor Cymuned yn gwrthwynebu’r bwriad gan y byddai’n anghymarus a gweddill y tai o’i amgylch;

·         Bod y dyluniad yn gweddu i’r safle;

·         Mai pentref glan y môr yw Abersoch, ddim yn gweld y dyluniad yn gweddu’r safle. Dylid cynnal ymweliad safle;

·         Pryder o ran yr effaith ar yr Iaith Gymraeg yn y pentref;

·         Pryder o ran dymchwel tai efo hanes er mwyn eu gwerthu ar y farchnad agored. Roedd safleoedd yn cael eu gwerthu oherwydd eu lleoliad;

·         Bod y bwriad yn uchelgeisiol. Dylid cydnabod nad ydyn yn byw yn y gorffennol ac yng ngwledydd Ewrop roedd tai o ddyluniad gwahanol yn yr un ardal;

·         Nid oedd yr adeilad presennol yn addas. Dylid ymweld â’r safle oherwydd ei fod mewn lleoliad amlwg;

·         Bod dyletswydd i warchod yr AHNE, pryder effaith gronnol o ran yr hawl i ddymchwel a moderneiddio ar olygfeydd i mewn ac allan o’r AHNE. O’r farn nad oedd gostwng uchder yr adeilad 1 medr yn dderbyniol ac fe ddylai Cydbwyllgor Ymgynghorol AHNE Llŷn ystyried y cais oherwydd ei effaith.

 

(ch)   Mewn ymateb i’r sylwadau uchod, nododd y swyddogion:

·         Bod asesiad o ran egwyddor y datblygiad yn erbyn 5 maen prawf polisi CH13 o’r CDUG ‘Dymchwel ac ail-adeiladu tai mewn pentrefi gwledig ac yng nghefn gwlad’ wedi ei gynnwys yn yr adroddiad;

·         Annog cynnal ymweliad safle gan mai’r prif faterion yn codi oedd yr effaith weledol a’r effaith ar yr AHNE.

 

Nododd aelod pe cynhelir ymweliad safle y dylid edrych ar y safle o wahanol gyfeiriadau yn y pentref a nodi cymeriad adeiladwaith yn yr ardal.

 

PENDERFYNWYD cynnal ymweliad safle.