Agenda item

Newid defnydd tir ar gyfer creu safle carafanau teithiol ac estynnu adeilad presennol i greu toiledau a chodi adeilad ar gyfer gwaredu gwastraff.

AELOD LLEOL:        Cynghorydd Annwen Daniels

Dolen i’r dogfennau cefndir perthnasol

Cais ôl-weithredol i newid defnydd tir ar gyfer creu safle carafanau teithiol ac estynnu adeilad presennol i greu toiledau a chodi adeilad ar gyfer gwaredu gwastraff.

(a)     Ymhelaethodd y Swyddog Rheolaeth Datblygu ar gefndir y cais, gan nodi bod y safle wedi ei leoli o fewn ffin ddatblygu Blaenau Ffestiniog. Roedd y safle yn dir gwag tu cefn i rhesdai Gwynedd, gyda nifer o dai ar wasgar o gwmpas y safle.

         Adroddwyd bod gwaith eisoes wedi cychwyn ar y safle gyda rhan fwyaf o’r lleiniau ffurfiol yn eu lle, a’r llystyfiant wedi ei blannu. Yn ystod yr ymweliadau safle roedd carafán deithiol a charafán modur wedi eu lleoli ar y safle. Roedd yr ymgeisydd yn ymwybodol o’r sefyllfa gynllunio, gyda’r Uned Gorfodaeth wedi bod yn trafod y mater gydag ef eisoes.

         Tynnwyd sylw at y sylwadau ychwanegol a dderbyniwyd.

         Nodwyd bod y Swyddog Carafanau wedi cadarnhau nad oedd gosodiad y safle yn bodloni amodau trwydded (Safonau Model 1983) o ran dwysedd safle. Ystyriwyd nad oedd gosodiad y safle yn addas ar gyfer ei ddefnydd bwriedig fel safle teithiol. Tynnwyd sylw nad oedd mannau agored wedi eu cynllunio i mewn i’r safle, ac er bod yna lecynnau agored union gerllaw, nid oedd unrhyw le i blant chwarae o fewn diogelrwydd y safle ei hun.

         Nodwyd bod y safle wedi ei leoli oddi ar Ffordd Baltic (ffordd ddi-ddosbarth) a’r fynedfa i’r ffordd yma oddeutu 80m i ffwrdd o gyffordd Ffordd Baltic gyda’r Gefnffordd A470. Dyma’r ffordd fwyaf uniongyrchol i mewn ac allan o’r safle. Roedd mynedfa newydd eisoes wedi ei chreu i’r safle o Ffordd Baltic. Nid oedd gwrthwynebiad penodol i’r fynedfa yma ar ei ben ei hun. Nodwyd bod yr Uned Drafnidiaeth wedi cadarnhau fod rhwydwaith ffyrdd o’r fynedfa yma i’r dde tua’r A470 neu i’r chwith tua Ffordd Glanypwll o led ddigonol i ymdopi a traffic cyffredinol ddwy ffordd, ond ni ystyrir fod y gyffordd naill ochr i Ffordd Baltic (h.y cyffordd gyda’r A470 na’r gyffordd gyda Ffordd Glanypwll) yn addas ar gyfer y math o draffig a ddisgwylir mewn perthynas â safle carafanau teithiol. Yn ogystal, roedd yr Uned Cefnffyrdd wedi cadarnhau nad oedd defnyddio cyffordd Ffordd Baltic a’r A470 yn dderbyniol.

         Adroddwyd bod y Swyddog Achos Gorfodaeth a’r Uned Drafnidiaeth wedi datgan yn glir na fyddai mynedfa i’r safle oddi ar Ffordd Baltic yn dderbyniol petai cais yn cael ei gyflwyno ar gyfer y safle. Roeddent wedi awgrymu o bosib y byddai defnyddio’r fynedfa bresennol heibio eiddo’r ymgeisydd ac a adnabyddir fel Ty’n y Coed yn gallu bod yn dderbyniol. Nid oedd y fynedfa yma yn ffurfio rhan o’r cais, ac nid oedd wedi ei asesu gan yr Uned Cefnffyrdd.

         Nodwyd yr ystyrir bod y datblygiad yn annerbyniol a’i fod yn groes i’r polisïau perthnasol fel y nodwyd yn yr adroddiad.

(b)     Yn manteisio ar yr hawl i siarad nododd yr ymgeisydd y prif bwyntiau canlynol:-

·         Ei fod yn berchennog 3 busnes ac yn cyflogi pobl leol;

·         Ei fod wedi cyfarfod efo Uwch Swyddog Rheolaeth Datblygu ar 3/3/14 lle trafodwyd os fyddai’n bosib cael datblygiad o’r fath ar y safle. Nododd y swyddog nad oedd yn rhagweld problem na ellir ei ddatrys;

·         Bod y swyddog wedi siarad efo’r Uwch Swyddog Rheolaeth Datblygu Trafnidiaeth a’i fod wedi derbyn cadarnhad dros y ffôn ar 10/3/14 bod y fynedfa bwriedig yn iawn;

·         Ni ddefnyddir y gyffordd wrth ymyl Baltic House, fe ddefnyddir y gyffordd nesaf a oedd newydd ei ail-wneud. Roedd wedi cysylltu efo swyddog o’r Awdurdod Cefnffyrdd a’i fod wedi derbyn cadarnhad ei fod yn hapus efo’r bwriad os rhoddir arwyddion na ddylid defnyddio Ffordd Baltic;

·         Ei fod wedi cychwyn ar y gwaith ar y safle a’i fod yn bwriadu gwneud y gwaith yn ei amser ei hun.

(c)     Mewn ymateb i’r sylwadau uchod, nododd yr Uwch Swyddog Rheolaeth Datblygu Trafnidiaeth:

·         Ei fod wedi derbyn ymholiad gan yr Uwch Swyddog Rheolaeth Datblygu o ran y safle ac wedi ymweld â’r safle yng nghyswllt datblygu safle ar gyfer carafanau modur;

·         Y trafodwyd mynediad o Hospital Road a bod ganddo e-byst a anfonwyd i’r Gwasanaeth Cynllunio i gadarnhau hyn. Ni thrafodwyd mynediad o Ffordd Baltic.

         Cynigwyd ac eiliwyd i gynnal ymweliad safle.

PENDERFYNWYD cynnal ymweliad safle.