Agenda item

Cais amlinellol i godi tŷ fforddiadwy

 

AELOD LLEOL:        Cynghorydd Anwen J Davies

 

Linc i'r dogfennau cefndir perthnasol

Cais amlinellol i godi tŷ fforddiadwy.

 

(a)     Ymhelaethodd y Rheolwr Cynllunio ar gefndir y cais, gan nodi ei fod yn gais amlinellol am dŷ deulawr fforddiadwy o fewn gardd 2 dŷ presennol. Nodwyd bod Polisi CH4 o’r CDUG yn berthnasol ac yn datgan mewn egwyddor y caniateir cynigion i adeiladu tai newydd ar safleoedd heb eu dynodi ac o fewn ffiniau datblygu pentrefi os gellir cydymffurfio â holl bolisïau perthnasol y Cynllun a 3 maen prawf y polisi.

 

         Amlygwyd bod Polisi B23 o’r CDUG yn asesu effaith y bwriad ar fwynderau preswyl cyfagos. Nodwyd er na gyflwynwyd manylion gyda’r cais yn dangos lleoliad ystafelloedd a ffenestri ar y llawr cyntaf, ‘roedd lleoliad y tŷ, ei uchder ynghyd â’r tebygolrwydd y bwriedir gosod ffenestri yn y drychiad gogleddol (cefn) fel rhan o osodiad mewnol y tŷ bwriadedig yn codi pryderon sylweddol ynglŷn ag effaith y bwriad ar breifatrwydd a mwynderau trigolion yr eiddo y tu cefn ac i’r gogledd o’r safle.

 

         Mynegwyd pryder sylweddol ynglŷn â’r datblygiad, ystyriwyd bod y bwriad yn or-ddatblygiad o’r safle cyfyng ac ni ystyriwyd bod y bwriad yn dderbyniol o agwedd Polisi B23 oherwydd y byddai’n achosi niwed arwyddocaol i fwynderau’r gymdogaeth leol, yn or-ddatblygiad o safle cyfyng ac yn lleihau gofod amwynder y ddau dŷ presennol drwy ddefnyddio'r ardd fel llain ar gyfer y tŷ bwriadedig. Pwysleisiwyd nad oedd y ffaith mai’r ymgeisydd oedd yn berchen dau o’r tai cyfagos, yn goresgyn pryderon am or-ddatblygu’r safle cyfyng.

 

Tynnwyd sylw y gwrthodwyd cais blaenorol am yr un datblygiad dan hawliau dirprwyedig ar 18 Ionawr 2017 ar sail:

 

“Byddai’r tŷ, oherwydd ei faint a lleoliad yn arwain at ymwthiad gormesol a niweidiol i fwynderau trigolion eiddo preifat cyfagos, yn enwedig oherwydd yr effeithiau dominyddol a gor-edrych a fyddai'n deillio ohono. Mae'r cais felly'n groes i bolisïau  B23 Cynllun Datblygu Unedol Gwynedd ac yn tanseilio polisi PCYFF 1 CDLL.”

 

Nodwyd nad oedd y bwriad cyfredol yn lleihau'r pryderon cynllunio sylweddol ynglŷn â’r bwriad ac fe argymhellwyd i wrthod y cais ar yr un sail.

 

(b)       Yn manteisio ar yr hawl i siarad nododd yr ymgeisydd y prif bwyntiau canlynol:-

·         Bod ei deulu yn un o deuluoedd hynaf Efailnewydd;

·         Y bwriedir adeiladu tŷ ar gyfer ei fab;

·         Ei fod ar ddallt bod swyddogion yn hoffi manylion llawn o ran maint ond mai mater bach fyddai newid y maint pan gyflwynir cais cynllunio llawn;

·         Y cyflwynwyd 7 llythyr yn cefnogi’r cais i’r Gwasanaeth Cynllunio;

·         Bod y Cyngor Cymuned yn gefnogol;

·         Bwriad yn dderbyniol o safbwynt diogelwch ffyrdd.

 

(c)     Gwnaed y prif bwyntiau canlynol gan yr aelod lleol (nad oedd yn aelod o’r Pwyllgor Cynllunio hwn):-

·         Fe fyddai’r bwriad yn golygu gwelliant i’r fynedfa bresennol;

·         Y byddai’r bwriad yn darparu cynnydd yn y llefydd parcio gan ddarparu lle i 4 o geir gan fodloni’r gofyn o dan Polisi CH36 o’r CDUG am lefydd parcio oddi ar y stryd;

·         Bod y bwriad yn unol â Pholisi C1 o’r CDUG gan fod y safle o fewn ffin datblygu’r pentref;

·         Bod stad newydd o dai wedi ei ddatblygu yn y cyffiniau a bod hyn eisoes wedi golygu colli preifatrwydd;

·         Nad oedd unrhyw wrthwynebiad gan y gymuned nac ychwaith perchnogion y tŷ cyfagos;

·         Bod yr ymgeisydd yn fodlon cydweithio efo Dŵr Cymru;

·         Ei fod yn bwysig cefnogi pobl leol a chaniatáu datblygiadau a all alluogi pobl ifanc i aros yn yr ardal;

·         Dymuniad yr ymgeisydd i’r bleidlais fod yn gofrestredig.

 

Nododd y Cadeirydd mai mater i’r Pwyllgor oedd penderfynu os dylid cynnal pleidlais gofrestredig.

 

Mewn ymateb i sylwadau’r ymgeisydd a’r aelod lleol, nododd yr Uwch Reolwr Gwasanaeth Cynllunio bod yr argymhelliad i wrthod y cais yn un cadarn a dylai’r Pwyllgor ystyried cynnal ymweliad safle cyn penderfynu ar y cais oherwydd y materion mwynderau.

 

(ch)   Cynigwyd ac eiliwyd i gynnal ymweliad safle.

 

          PENDERFYNWYD cynnal ymweliad safle.