Agenda item

Tŷ newydd dwy lofft a gwaith cysylltiedig

 

AELOD LLEOL:        Cynghorydd R H  Wyn Williams

 

Dolen i'r dogfennau cefndir perthnasol

Adeiladu ty newydd dwy loft a gwaith cysylltiedig

 

(a)    Ymhelaethodd y Swyddog Rheolaeth Datblygu ar gefndir y cais, gan nodi mai cais llawn ydoedd i adeiladu tŷ annedd deulawr modern a ddyluniwyd i gynnwys dwy ystafell wely, dwy ystafell ymolchi, stydi ac ystafell fyw / cegin. Cyflwynwyd hefyd fanylion tirlunio bwriadedig ynghyd a manylion trefniadaeth parcio a throi ar gyfer dau gerbyd ger mynedfa gerbydol newydd. Adroddwyd bod cais blaenorol ar gyfer datblygu tŷ ar y safle hwn wedi ei wrthod yn 2013 ac, yn ogystal, fe wrthodwyd apêl yn erbyn y penderfyniad hwnnw. Eglurwyd bod y cynllun newydd a gyflwynwyd yn sylweddol wahanol i’r cynllun a ystyriwyd yn flaenorol.

 

Disgrifiwyd y tŷ arfaethedig fel un gyda tho fflat a thyfiant arno (to “gwyrdd”) wedi’i osod ar ddau lefel. Byddai angen codi lefel y tir ger y ffordd er mwyn creu safle gwastad ar gyfer parcio a throi. Byddai angen gostwng lefel y tir ar waelod y safle er mwyn gosod yr adeilad i mewn i'r llethr.  Yn sgil hyn byddai lefel to’r rhan uchaf o’r tŷ 0.3m yn is na brig to tŷ Carrog (drws nesaf), ac 1.2m yn is na brig to’r cynllun a wrthodwyd yn 2013.

 

Bydd waliau ochr yr adeilad yn cael eu gorchuddio gyda cherrig tra byddai’r edrychiad blaen a chefn wedi eu gorchuddio gan gladin pren, gyda ffenestri sylweddol yn wynebu’r môr.

 

Nodwyd bod y Cyngor Cymuned yn gwrthwynbeu’r cais oherwydd gorddatblygiad ar safle cyfyng ac amlwg ynghyd a phryder am ddiogelwch mynediad. Eglurwyd hefyd, er bod y safle o fewn yr ANHE ei fod yn safle mewn-lenwi o fewn ffin datblygu pentref Abersoch ac wedi’i amgylchynu gan ddatblygiadau preswyl eraill. Yn ogystal, fe ystyriwyd y byddai y deunyddiau naturiol a ddewiswyd fel gorffeniadau yn gweddu gyda'r tirlun mewn modd anymwthiol. Nid oedd yr Uned AHNE o'r farn y byddai'r datblygiad yn cael effaith annerbyniol ar yr AHNE ac felly, ysytiwyd bod y cynnig yn gyson gyda pholisiau perthnasol.

 

Wedi ystyried yr holl faterion cynllunio perthnasol ynghyd a’r gwrthwynebiadau a dderbyniwyd, awgrymwyd bod yr holl bryderon wedi eu datrys a bod  y cynllun bellach yn addas a derbyniol ar gyfer y safle a’i fod yn cydymffurfio gyda’r polisïau a chanllawiau lleol a chenedlaethol a nodwyd yn yr adroddiad.

 

(b)    Yn manteisio ar yr hawl i siarad nododd gwrthwynebydd i’r cais y pwyntiau canlynol:-

-       er penderfyniad yr apêl, bod y cynllun eto yn agos i’r lon ac yn parhau yn adeilad dau lawr

-       bod y datblygiad yn atal goleuni o’r de ac yn goredrych ar dŷ Carrog

-       bod cymdogion yn colli preifatrwydd

-       y byddai yn anodd plannu 2m o dyfiant ar y llethr i osgoi goredrych -  yr angen am blannu yn cyfaddef goredrychiad posib

-       byddai modd ychwanegu at y datblygiad i’r dyfodol

 

(c)    Yn manteisio ar yr hawl i siarad nododd asiant ar ran yr ymgeisydd y pwyntiau canlynol:-

-       bod y datblygiad dipyn yn llai na’r cynlluniau gwreiddiol

-       bod gwell defnydd yn cael ei wneud o’r safle a bod y tirlunio yn elfen holl bwysig

-       mai ty un llawr yn wynebu'r môr oedd y bwriad - wedi ei  osod yn y graig

-       bod y ffiniau yn parhau'r un fath

-       bod y safle eisoes o ddefnydd preswyl

-       bod y dyluniad yn adlewyrchu'r tirlun ac yn toddi i mewn i’r olygfa o’r traeth

-       bod swyddog yr ANHE yn awgrymu na fyddai yn creu effaith weledol ar yr ANHE

 

(ch)   Gwnaed y prif bwyntiau canlynol gan yr aelod lleol (nad oedd yn aelod o’r Pwyllgor  Cynllunio hwn):-

-       Ei fod yn gwrthwynebu y cais

-       bod y Cyngor Cymuned yn gwrthod y cais a bod cynlluniau blaenorol wedi ei gwrthod sawl gwaith gan y Pwyllgor ac ar apêl

-       bod y safle yn gyfyng iawn - gardd fechan ydyw ac felly amhosib rhoi ty ar y safle

-       bod yr angen am dai wedi ei ddiwallu yn Abersoch

-       60% o dai yn Abersoch yn dai haf – nid oes angen mwy

-       angen cysondeb – cais cynllunio tebyg gan drigolion cyfagos wedi ei wrthod

-       angen gwarchod yr ANHE

-       Llwybr yr Arfordir yn mynd tu hwnt i’r adeilad

-       bloc ydyw ac nid ty – nid yw yn gwarchod golygfeydd o’r traeth

-       y dyluniad yn un estron

-       byddai yn amharu ar yr arfordir

-       erfyn ar y pwyllgor i wrthod y cais difrifol yma.

 

(d)    Mewn ymateb i’r sylwadau nododd yr Uwch Reolwr bod dau bryder amlwg wedi codi o’r drafodaeth - maint ac edrychiad y dyluniad a’r effaith ar fwynderau trigolion cyfagos.

Awgrymwyd ymweld â’r safle

 

Cynigwyd ac eiliwyd i  ymweliad a’r safle

 

PENDERFYNWYD gohirio’r cais a chynnal ymweliad safle