Agenda item

Cais i godi porth ar yr annedd presennol ynghyd a chodi modurdy gydag ystafell chwaraeon uwchben.

 

AELOD LLEOL:        Cynghorydd Aled Lloyd Evans

 

Dolen i’r dogfennau cefndir perthnasol

Cais i godi porth ar yr annedd presennol ynghyd a chodi modurdy gydag ystafell chwaraeon uwchben

 

(a)  Ymhelaethodd yr Uwch Reolwr Gwasanaeth Cynllunio ar gefndir y cais gan nodi bod y cais yn ymwneud a chodi porth ar yr annedd presennol ynghyd a chodi modurdy ar wahân gydag ystafell chwaraeon uwchben o fewn y cwrtil.  Nodwyd bod yr eiddo wedi ei leoli mewn Ardal Gadwraeth ynghanol pentref Llanystumdwy ger yr Afon Dwyfor ac i’r dwyrain ohono mae pont rhestredig Gradd II.   Tynnwyd sylw bod yr holl bolisïau ynghyd ag ymatebion i’r ymgynghoriadau cyhoeddus wedi eu nodi yn yr adroddiad. O safbwynt dyluniadau, nodwyd bod yr eiddo presennol yn adeilad trawiadol gyda codiad y to yn eithaf serth.  Roedd y swyddogion cynllunio o’r farn bod codiad to y modurdy yn gweddu gyda’r eiddo presennol ynghyd a’r deunyddiau allanol.  O safbwynt mwynderau gweledol, er bod y modurdy yn sylweddol o ran maint ac uchder, ni fyddai’n ymddangos yn ormesol o’i gymharu â’r eiddo preswyl presennol. Ystyriwyd y byddai newid maint a dyluniad y modurdy fel ei fod yn llai gyda pits to gwahanol yn achosi mwy o effaith weledol gan y byddai yn gwrthdaro yn erbyn dyluniad penodol yr eiddo presennol.  Ni ystyrir y byddai’r bwriad yn debygol o gael effaith andwyol annerbyniol ar fwynderau’r ardal leol. 

 

Tynnwyd sylw bod y safle mewn parth llifogydd ond bod posib rheoli’r risg o lifogydd mewn modd derbyniol.  Eglurwyd ymhellach bod y datblygiad islaw lefel y ffordd ac yn ddigon pell oddi wrth unedau preswyl cyfagos ac felly ni ystyrir y byddai’n effeithio arnynt.  Derbyniwyd a thynnwyd sylw at bryderon a gwrthwynebiadau a nodwyd yn y ffurflen sylwadau hwyr a oedd yn bennaf yn ymwneud ag uchder a maint y modurdy, effaith ar y bont rhestredig Gradd II, effaith ar ddiogelwch ffyrdd o’r fynedfa o’r briffordd ac i lawr y trac mynediad. Sicrhawyd bod yr holl faterion uchod wedi derbyn ystyriaeth ac asesiad gofalus ynghyd a chadarnhad gan swyddogion yr Uned Trafnidiaeth nad oedd ganddynt wrthwynebiad o ran diogelwch ffyrdd a’i fod yn cydymffurfio â’r polisiau priodol.  Yn ychwanegol, nid oedd gan y Swyddog Cadwraeth unrhyw wrthwynebiad.  Ystyriwyd felly bod y datblygiad arfaethedig yn cydymffurfio â’r holl bolisiau perthnasol ac argymhelliad y swyddogion Cynllunio ydoedd caniatau yn ddarostyngedig i’r saith amod a nodwyd yn yr adroddiad. 

 

(b)  Nododd y gwrthwynebydd, oherwydd bod trefn y rhaglen wedi ei ddiwygio, nad oedd wedi cael amser i ddarparu ei sylwadau oherwydd nad oedd wedi derbyn y wybodaeth gyflawn tan fore’r cyfarfod.

 

Mewn ymateb, esboniodd yr Uwch Gyfreithiwr bod disgwyl i siaradwyr fod yn barod i gyflwyno pan oedd y cyfarfod yn cychywn a nad oedd yn bosibl gohirio’r drafodaeth  gan fod y cais wedi agor a’i gyflwyno. 

 

 

Felly, yn manteisio ar yr hawl i siarad, nododd y gwrthwynebydd ei fod dan anfantais oherwydd hyn ac thrwy’r holl broses gan nad oedd ganddo’r wybodaeth gyflawn ac fe amlygodd y prif bwyntiau canlynol:

 

·                     Bod yna bwynt golygfa unigryw ar ben y rhodfa ar draws Afon

Dwyfor ac yn caniatáu i olygfeydd gael eu gweld tua'r de a thua'r gorllewin tuag at y pentref
•           Pe byddir yn caniatau’r cais hwn, bydd yr olygfa yn cael ei golli am byth
•           Bod yr olygfa yn cael ei fwynhau gan lawer o bobl megis cerddwyr cŵn, pobl leol, pentrefwyr, twristiaid a bod pobl yn stopio yno a’i fod yn gyrchfan o fewn y pentref
•           Nad oedd rhan fwyaf o bobl yn awyddus i weld yr adeilad hwn yn cael ei adeiladu i’r raddfa hon yn enwedig yr uchder

·                     Nad oedd gwrthwynebiad i’r ymgeisydd godi modurdy ond byddai'n well pe byddai’n adeilad unllawr i osgoi rhwystr i’r golygfeydd prydferth ac ysblennydd
•           Os nad yw aelodau'r pwyllgor yn gyfarwydd â'r safle awgrymwyd y byddai'n ddoeth gohirio’r cais a mynd i ymweld â’r safle
•           Bod elfen diogelwch yn flaenoriaeth uchel yn enwedig gan fod aelodau o’r teulu yn defnyddio'r rhodfa  i feicio, chwarae a sglefr fyrddio a gall y plant gael eu harsylwi o'r tŷ
•           Bod cynnig cynllunio blaenorol yn 2000 ar gyfer adeilad o faint unllawr na fyddai'n rhwystro'r golygfeydd

 

(c)  Yn manteisio ar yr hawl i siarad, nododd yr ymgeisydd y prif bwyntiau canlynol mewn perthynas â’r gwrthwynebiadau:

 

·         Maint ac edrychiad – cymerwyd amser a gofal gyda'r pensaer i sicrhau bod y modurdy arfaethedig yn cydweddu gyda’r tŷ annedd. Bod pits y to yn seiliedig ar  Eglwys y pentref sydd wedi ei lleoli yn uniongyrchol ar draws yr afon er mwyn cadw nodweddion pensaernïol sy'n bodoli eisoes o fewn y pentref. O ran cynigion blaenorol, ni gyflwynwyd cais am fodurdy llai a dyma’r tro cyntaf i gais gael ei gyflwyno

·         Effaith posibl i fynediad cerbydau – bod defnydd traffig ar y fynedfa presennol wedi gostwng yn aruthrol ers i'r caffi gau a’i drosi i ddefnydd preswyl. Bellach, dim ond ychydig o ddefnydd a wneir o’r fynedfa hon yn ddyddiol felly mae'r pryderon a godwyd yn anghymesur. Fodd bynnag, mae man pasio ar y tro o’r ffordd fynediad a oedd ar gael pan oedd defnydd i’r caffi ond bellach wedi tyfu'n wyllt gyda mieri ac fe fyddai’r ymgeisydd yn fwy na pharod i’w glirio ei hun

·         Cyfyngu ar yr olygfa o ben y fynedfa - bod golygfeydd presennol eisoes wedi eu difetha oherwydd bodolaeth strwythur concrid hyll sydd wedi ei leoli ar waelod y ffordd. Dylai unrhyw un sydd am weld yr olygfeydd o ben y ffordd fynedfa gael eu hannog i gerdded ychydig o gamau i lwybr troed y bont lle gellir gweld  golygfeydd gwirioneddol eiconig yn ddiogel 

 

(ch)      Mewn ymateb i’r sylwadau, esboniodd yr Uwch Reolwr Gwasanaeth Cynllunio bod yr Adran wedi rhoi ystyriaeth fanwl i’r dyluniad o safbwynt effaith weledol a pharch i’r lleoliad sensitif.

 

(d)           Cynigiwyd ac eilwyd argymhelliad y swyddogion cynllunio i’w ganiatau.

 

(dd)      Mewn ymateb i ymholiad gan aelod ynglyn ag uchder y to, esboniwyd bod lefel y to yn is na’r ffordd gyhoeddus.

 

            Penderfynwyd:          Caniatáu’r cais yn unol a’r  amodau canlynol:

 

 

1. 5 mlynedd

2. Sicrhau cwblhau’r datblygiad yn unol â’r cynlluniau a gyflwynwyd.

3. Llechi ar y to

4. Gorffeniad i gydweddu a’r annedd bresennol

5. Defnydd fel modurdy yn unig/dim defnydd preswyl/cysgu atodol

6. Rhaid cwblhau’r gwaith torri i mewn i do’r annedd presennol rhwng dechrau mis Hydref a diwedd mis Ebrill o fewn unrhyw flwyddyn.

7. Cyn cychwyn unrhyw waith yn ymwneud a’r bwriad yma, rhaid cyflwyno a chytuno manylion gosod blwch ystlumod a’i osod yn ei le cyn cychwyn gwaith torri i mewn i’r to.

 

Nodyn Dwr Cymru