Agenda item

Estyniad i adeilad hamdden er mwyn ymestyn spa presennol gan gynnwys ystafelloedd triniaeth, pyllau, lle bwyta ac ystafelloedd newid

 

AELOD LLEOL:        Cynghorydd R H Wyn Williams

 

Dolen i'r dogfennau cefndir perthnasol

         Estyniad i adeilad hamdden er mwyn ymestyn spa presennol gan gynnwys ystafelloedd triniaeth, pyllau, lle bwyta ac ystafelloedd newid

 

(a)          Ymhelaethodd y Rheolwr Rheolaeth Datblygu ar gefndir y cais  gan nodi mai cais llawn ydoedd ar gyfer adeiladu estyniad i adeilad hamdden er mwyn ymestyn cyfleusterau spa presennol i ddarparu ystafelloedd triniaeth, pyllau, lle bwyta ac ystafelloedd newid. Byddai’r estyniad wedi ei leoli ar dalcen de gorllewinol yr adeilad presennol gyda rhan to fflat yn y canol yn cysylltu i’r adeilad presennol a rhan to ‘hip’ llechi ar y talcen.

 

Amlygwyd mai'r bwriad oedd ail-fuddsoddi a gwella ansawdd ac amrediad cyfleusterau o fewn y gyrchfan i alluogi mwy o ddefnydd o’r cyfleuster tu allan i’r cyfnod gwyliau. Yng nghyd-destun mwynderau gweledol, cydnabuwyd bod maint a graddfa'r arwynebedd llawr (oddeutu 771m²) yn sylweddol, fodd bynnag ystyriwyd bod y maint yn gymesur a chyfleusterau hamdden presennol y safle ac na fyddai’n or-ddatblygiad.

 

Gan mai golygfeydd lleol yn unig fydd o’r adeilad, oherwydd ei osodiad yn y tirlun, ni ystyriwyd y byddai’r bwriad yn cael effaith ar y dirwedd a'r golygfeydd. Er bod y bwriad  wedi ei leoli o fewn Ardal o Harddwch Naturiol Eithriadol ni ystyriwyd y byddai’r datblygiad yn achosi niwed arwyddocaol i’r dirwedd a’r arfordir nac yn groes i ofynion polisi B8 CDUG. Er gwaethaf maint yr adeiladau presennol, mae natur eu lleoliad o fewn tirffurf powlen ynghyd a’r tirlunio presennol yn golygu nad yw’r adeiladau yn sefyll allan yn y tirlun ac ni ystyriwyd y byddai’r estyniad yn amlwg ychwaith.

 

Ystyriwyd bod y bwriad, yn erbyn y polisïau a restrwyd yn yr adroddiad  yn dderbyniol o agwedd polisïau ac felly yn dderbyniol i’w ganiatáu gydag amodau

 

(b)          Yn manteisio ar ei hawl i siarad, nododd Asiant ar ran yr ymgeisydd y sylwadau canlynol:

·           Bod y datblygiad yn gam pellach o uwchraddio a buddsoddi ar y safle

·           Bod y cynllun yn cynnig gwelliannau i’r parc ac i'r amgylchedd

·           Bwriad yw annog cyfnodau gwyliau byr tu allan i’r prif dymor gwyliau

·           Ymgynghori a chydweithio da wedi bod gyda’r swyddogion cynllunio

·           Nad oedd  y cynllun yn creu effaith ar y tirlun

·           Bydd y gwaith o uwchraddio yn sicrhau  17 swydd newydd  – 5 llawn amser a 12 rhan amser

·           Os caniatáu, y gwaith i ddechrau mor fuan â phosib - bwriad agor Haf 2017

·           Dim gwrthwynebiadau wedi eu  derbyn

 

(c)       Gwnaed y prif bwyntiau canlynol gan yr aelod lleol (nad oedd yn aelod o’r Pwyllgor Cynllunio hwn):

·         Ei fod yn gefnogol i’r cais oherwydd darpariaeth  lleoliad

·         Croesawu  sylwadau'r Uned ANHE

·         Ddiolchgar i swyddogion am gydweithio gyda'r datblygwr

·         Adnodd ardderchog i’r ardal – codi ansawdd

·         Trafodaethau cychwynnol am gysylltiad lleol gyda’r ddarpariaeth yma o ran defnydd o’r adnodd yn ystod y gaeaf

 

(ch)   Cynigwyd ac eiliwyd i ganiatáu y cais

 

(d)       Yn ystod y drafodaeth ddilynol nodwyd y sylwadau canlynol:

·         Awgrymu dwyn pwys ar yr ANHE i neilltuo Abersoch allan o’r ANHE er mwyn i ddatblygiadau fel hyn gael rhwydd hynt

·         Bod y safle tu allan i’r ffin datblygu - os cais am dŷ byddai yn cael ei wrthod, ond gan ei fod ar gyfer y diwydiant hamdden, y cais yn cael ei ganiatáu -  tynnu sylw at yr angen i sicrhau cysondeb a thegwch i bawb

·         Wrth ystyried effaith gweledol rhaid sicrhau bod y sylwadau a gyflwyni’r mewn adroddiadau yn gyson a theg

 

PENDERFYNWYD caniatáu y cais

 

Amodau

1. 5 mlynedd

2. Unol a’r Cynlluniau a chynllun tirlunio

3. Llechi

4. Gorffeniad

5. Plannu yn y tymor plannu nesaf ar ôl cwblhau’r datblygiad

6. Amod Dwr Cymru i gyflwyno Cynllun Draenio