Agenda item

Cymeradwyo’r adroddiad blynyddol a mabwysiadu’r Cynllun Pobl.

Cyflwynwyd yr adroddiad gan y Cyng. Peredur Jenkins.

PENDERFYNWYD

Cymeradwyo’r adroddiad blynyddol a mabwysiadu’r Cynllun Pobl.

TRAFODAETH

Pwysleisiwyd nad cynllun y Gwasanaeth Adnoddau oedd y Cynllun Pobl, eithr cynllun y Cyngor cyfan.

Croesawyd y gweithgaredd sy’n mynd ymlaen yn yr adran i hyrwyddo lles a datblygiad staff.

Holwyd a oes cyfartaledd cyflog rhwng dynion a merched, a yw’n cael ei fonitro ac oes modd ei gyfleu mewn ffordd synhwyrol?  Mewn ymateb, eglurwyd y gofynnwyd eleni, am yr eildro ers mabwysiadu’r cytundeb tâl a chael y cytundeb torfol yn 2008, i ymgynghorydd annibynnol gynnal asesiad o lle’r oedd y Cyngor wedi cyrraedd gyda hyn.  Pan gafwyd yr asesiad cyntaf dair blynedd yn ôl, ‘roedd yn bositif iawn, ond ‘roedd cydnabyddiaeth bod y sefyllfa yn anorfod a bod ymdrechion ddylai fod yn digwydd o fewn y Cyngor i leihau’r gagendor.  Gobeithid y byddai’r hyn mae’r Cyngor wedi’i wneud dros y blynyddoedd diwethaf yn cau’r gagendor ymhellach ac y byddai hynny’n cael ei adlewyrchu yn adroddiad nesaf yr ymgynghorydd.  Nodwyd ymhellach y gellid cyflwyno’r diweddariad hwnnw i’r Cabinet yn nes ymlaen yn y flwyddyn.

Nodwyd y byddai’n ddefnyddiol, wrth gyflwyno adroddiadau blynyddol yn y dyfodol, gweld faint o ferched sy’n gweithio ar wahanol haenau o’r Cyngor, beth yw’r rhwystrau a beth all y Cyngor ei wneud i gynorthwyo merched i oresgyn y rhwystrau hynny.  Mewn ymateb, cyfeiriodd y Prif Weithredwr at y ffigur yn yr adroddiad ar gyfer maes llafur y Tîm Arweinyddiaeth Corfforaethol oedd yn dangos fod 61% yn ferched a 39% yn ddynion, oedd yn adlewyrchiad o’r cyfleoedd.

Nododd y Prif Weithredwr fod cyflog cyfartal yn fater dadleuol, sy’n cael ei gamddehongli weithiau.  Pwysleisiodd fod cyfundrefn dâl y Cyngor yn rhoi’r un cyflog yn union am yr un gwaith drwy ddefnyddio system wrthrychol i fesur natur unrhyw swydd o fewn y Cyngor.  Wedi dweud hynny, ‘roedd canran uwch o ferched yn gweithio i’r Cyngor yn gweithio’n rhan amser ac felly fe fyddai cyfartaledd cyflog yr oedd merched yn ei dderbyn gymaint yn is.  ‘Roedd hynny yn wahanol i’r cwestiwn o fod yn talu cyflog cyfartal am yr un gwaith.  Nodwyd hefyd bod gan y Cyngor amddiffyniad cyflog cyfartal ac na chyflwynwyd unrhyw gais ers cyn 2008 a bod yr amddiffyniad a sefydlwyd yn 2008 yn gadarn iawn.

Mynegwyd syndod ynglŷn â’r cynnydd sylweddol yn nifer y swyddi a ail hysbysebwyd.   Mewn ymateb, nodwyd mai diben yr adroddiad blynyddol oedd amlygu materion o’r fath mewn ffordd ddealladwy a’i bod yn bwysig cael y data yn rheolaidd er mwyn gweld y tueddiadau.

Awgrymwyd y byddai’n fuddiol gwybod faint o absenoldebau salwch sy’n salwch tymor byr a faint sy’n salwch dros 4 diwrnod.  Nodwyd hefyd bod y 38.4% o’r staff na fu’n absennol o gwbl oherwydd salwch yn ystod y flwyddyn ddiwethaf yn bobl gwerthfawr iawn, ac awgrymwyd y dylid ystyried eu gwobrwyo mewn rhy ffordd, e.e. drwy lythyr gan yr Arweinydd / Prif Weithredwr neu reolwr llinell neu drwy gydnabod eu presenoldeb mewn seremoni, megis y Cyngor ar ei Orau.

Mynegwyd pryder ynglŷn â straen ar staff ysgolion, a phwysleisiwyd bod angen edrych, nid yn unig ar y bobl hynny sydd i ffwrdd o’r gwaith oherwydd straen, ond y rhai sy’n parhau i weithio dan straen.

Awgrymwyd y byddai’n fuddiol gwneud dadansoddiad pellach o’r absenoldebau salwch er mwyn gweld pa fisoedd o’r flwyddyn mae salwch ar ei uchaf, a pham.

Nodwyd bod yr adroddiad yn hawdd ei ddarllen ac yn dangos yn glir mai pobl yw adnodd pwysicaf y Cyngor.  Nodwyd hefyd bod y Cynllun Pobl yn ddarllenadwy ac yn ddealladwy ac yn dangos bod yr holl waith sy’n ymwneud â staff y Cyngor yn deillio o roi pobl Gwynedd yn gyntaf.  

Nodwyd y disgwylid i staff newydd arwyddo i fyny i’r Cynllun Pobl, ond bod angen ystyried hefyd beth sy’n ddisgwyliedig gan y staff hynny sydd wedi bod yn gweithio i’r Cyngor ers blynyddoedd.

Diolchwyd i bawb fu ynghlwm â’r gwaith o gynhyrchu’r adroddiad a’r Cynllun Pobl a nodwyd yr edrychid ymlaen at weld gweithrediad y cynllun.