Agenda item
Adeiladu uned
ddofednod rhydd a gwaith cysylltiedig
AELOD LLEOL: Cynghorydd Gweno Glyn
Dolen i’r dogfennau cefndir perthnasol
Cofnod:
Adeiladu ddofednod rhydd a gwaith
cysylltiedig.
(a) Ymhelaethodd y Swyddog Rheolaeth Datblygu ar gefndir y cais hwn i greu uned
ar gyfer dofednod rhydd h.y. “free
range poultry unit”, ynghyd
a gwaith cysylltiedig. Byddai’r bwriad yn
cynnwys codi sied a phedair storfa porthiant a chreu trac mynediad er
cysylltu’r datblygiad gydag iard y fferm.
Byddai’r sied yn mesur 135 medr o hyd gyda’r uchder i grib y to yn 6.8
medr. Fe fyddai 6 ffan yn ymwthio i fyny
o'r to rhyw fetr yn ychwanegol. Fe fyddai gan y sied arwynebedd llawr o 2630 m2
a gall gadw hyd at 32,000 o ieir dodwy. Bwriedir i waliau allanol a tho’r
sied fod yn shitiau bocs proffil o liw gwyrdd ‘juniper’ a byddai'r storfeydd porthiant yn mesur oddeutu 3
medr mewn diamedr ac yn 6.8 medr o uchder.
Nodwyd y byddai
gwaith cloddio a mewnlenwi yn cymryd lle er mwyn creu
platfform gwastad ar gyfer yr adeilad a gosodir llawr caled o amgylch yr uned.
Bwriedir plannu coed ar yr ochr ddwyreiniol fel sgrin. Bwriedir defnyddio’r fynedfa ffordd bresennol
ond bydd trac yn cael ei greu o’r adeiladau fferm at safle’r uned ddofednod. Tynnwyd
sylw at fanylion eraill ynghylch sut bydd yr uned yn gweithredu yn rhan 1 yr
adroddiad.
Nodwyd bod y safle yng nghefn gwlad oddi fewn Ardal Gwarchod y Dirwedd a
Thirwedd Hanesyddol Gofrestredig Llyn ac Enlli. Mae oddeutu 1km o’r AHNE.
Byddai’r uned wedi ei lleoli tua 260 medr oddi wrth adeiladau fferm bresennol Crugeran ac mae’r tai annedd agosaf oddeutu 350 medr i
ffwrdd yn Nhre’r Ddol.
Cyfeirwyd at yr ymatebion
i'r ymgynghoriad yn rhan 4 yr adroddiad ac ni dderbyniwyd unrhyw wrthwynebiadau
yn ystod y cyfnod ymgynghori er i'r Uned AHNE ddatgan pryder ynghylch yr
effaith weledol o rai mannau yn yr AHNE. Derbyniwyd hefyd sawl gohebiaeth yn
cefnogi'r cynllun gan y byddai'n hwb economaidd i'r gymuned leol.
Nodwyd bod polisïau'r cynllun datblygu'n gefnogol o godi adeiladau ar gyfer dibenion
amaethyddol os ydynt yn rhesymol angenrheidiol. Yn yr achos hwn mae’r ymgeiswyr
yn bartneriaeth deuluol sydd yn rhedeg fferm Crugeran,
sy'n fferm 190 hectar sy'n canolbwyntio ar eidion, defaid a grawn. Y bwriad yw arallgyfeirio i ddofednod rhydd a derbynnir bod diben amaethyddol dilys ar
gyfer y datblygiad newydd.
Fe
fyddai’r adeilad yn cael ei leoli ar ben ei hun oddeutu 260 medr oddi wrth yr
adeiladau presennol ar y daliad. Fe
fyddai hyn yn cyfrannu at fioddiogelwch y fferm trwy wahanu’r elfen ieir o
weddill y fferm, ac mae'r lleoliad yn un llai amlwg yn weledol na safleoedd
agosach at y fferm bresennol. Nodwyd bod
dyluniad y sied o fath amaethyddol cyffredin dim ond iddo fod yn
sylweddol hirach. Wedi dweud hynny, o ystyried y dyluniad, deunyddiau a'r
lliwiau arfaethedig ynghyd a ffurfiant y tir a'r bwriad i blannu sgrin o goed
ni chredir bydd yn sefyll allan fel nodwedd estron yn y dirwedd.
Tynnwyd sylw bod
rhai tai yng nghyffiniau’r safle a thra bod potensial ar gyfer effeithiau
niweidiol megis sŵn, arogleuon a llwch fe dderbyniwyd ymateb hwyr gan yr
Uned Gwarchod y Cyhoedd yn cadarnhau, o dderbyn gwybodaeth ychwanegol briodol,
y gellid rheoli’r materion hyn trwy amodau.
Cyfeiriwyd at
faterion eraill o fewn yr adroddiad megis trafnidiaeth, bioamrywiaeth,
archeoleg a llifogydd a chredir bod hwn yn ddatblygiad sy'n cwrdd â pholisïau'r
cynllun datblygu.
Tynnwyd sylw at y
sylwadau hwyr a dderbyniwyd ar y daflen a gyflwynwyd i’r Pwyllgor.
Yn sgil hyn,
gofynnwyd am yr hawl i weithredu ar y cais ac er mwyn i swyddogion allu ei
ganiatáu wedi trafodaethau pellach gyda Gwarchod y Cyhoedd er sicrhau amodau priodol
er mwyn rheoli unrhyw effeithiau niweidiol posib.
(c)Yn manteisio ar yr hawl i siarad, nododd yr ymgeisydd y prif bwyntiau
canlynol:
·
Y byddai’r fenter yn creu 2 swydd
llawn amser ychwanegol
·
Oherwydd bod y diwydiant amaethyddol wed bod mor ansefydlog yn y blynyddoedd diwethaf ar yr
ochr farchnad, y byddai’r fenter yn lleihau’r risg
i’r busnes ffermio deuluol presennol
·
Y byddai’r fenter newydd yn cryfhau’r
busnes i oroesi unrhyw broblemau i’r dyfodol
·
Bod y fenter newydd yn
un cyffrous i’r ardal
·
Y byddai’r teulu yn fodlon cyd-drafod
gyda’r swyddogion perthnasol ynglyn ag amodau
(ch)
Cefnogwyd y cais gan yr aelod lleol (nad oedd yn aelod o’r Pwyllgor
Cynllunio hwn) am y rhesymau canlynol:
·
Yn croesawu
mentergarwch a fyddai yn rhoi cyfleon
i bobl leol
·
Er bod amheuaeth
wedi codi ynglyn ag arogl, cadarnhawyd mai ffarm y teulu yw’r
ty agosaf ac fel rhan o’r ffarm
ceir busnes hunan arlwyo 5* yno ac felly fe fyddir yn sicrhau
na fyddai risg o arogl nac ychwaith i drigolion yr ardal
·
Bod y teulu yn fwy na pharod i drafodaethau ynglyn ag amodau o safbwynt lliwiau'r biniau porthi,
tyfiant, a.y.b. a fyddai’n lliniaru unrhyw bryderon a godwyd
·
Nad oedd
unrhyw wrthwynebiadau gan y cyrff statudol
(d)Cynigwyd ac eilwyd i ganiatau’r
cais gyda amodau perthnasol.
(dd)
Yn ystod y drafodaeth ddilynol, amlygwyd y pwyntiau canlynol gan Aelodau
unigol:
·
Falch o weld teulu
yn mentro ac yn creu cyfleon
gwaith i bobl mewn ardal lle
mae gwaith yn brin
·
Cefnogol i’r cais a’i
weld yn gweddu i’r amgylchedd
·
Bod y cyfarpar yn fodern
ac y byddai’n lliniaru unrhyw risg o arogl
·
Gofynnwyd a fyddai modd gosod
amod i blannu coed wedi lled-aeddfedu
i leihau effaith ar yr AHNE
Penderfynwyd: Caniatáu yn unol â’r amodau
canlynol:
1. Cychwyn o fewn 5 mlynedd.
2. Unol a’r cynlluniau.
3. To a waliau allanol yr uned dofednod i fod o liw gwyrdd tywyll.
4. Cytuno lliw ar gyfer y biniau
porthiant.
5. Defnydd amaethyddol o’r adeilad yn
unig.
6. Cwblhau’r
cynllun tirlunio yn unol gyda’r manylion a
gyflwynwyd.
7. Cytuno
unrhyw gynllun goleuo.
8. Lefelau
sŵn neu unrhyw amod perthnasol arall sy’n ymateb i faterion a godwyd gan
Gwarchod y Cyhoedd.
9.
Plannu coed wedi lled-aeddfedu fel rhan o’r tirlunio
Nodiadau-
1.
Yr angen i gael caniatâd i gwlfyrtio’r
cwrs dŵr.
Dogfennau ategol: