Agenda item

Codi 4 tþ tri ystafell wely, un ohonynt i fod yn dþ fforddiadwy. 

AELOD LLEOL:    Y Cynghorydd Sian Gwenllian

Dolen i'r dogfennau cefndir perthnasol

Codi 4 tŷ tair ystafell wely, un ohonynt i fod yn dy fforddiadwy.

(a)       Ymhelaethodd y Rheolwr Rheolaeth Datblygu ar gefndir y cais,  gan nodi bod y safle wedi ei leoli o fewn ffin datblygu’r pentref gyda 2 eiddo ar wahân eisoes wedi eu caniatáu ar ran blaen o’r safle. Nodwyd bod y safle yn hir a chul gyda llwybr Lôn Las Menai yn rhedeg ar hyd ochr y safle. Tynnwyd sylw at y polisïau perthnasol ynghyd a’r sylwadau hwyr a dderbyniwyd yn datgan yr angen am gynllun diwygiedig o’r man troi siâp “T” ar ben y stad.  Yn wreiddiol ystyriwyd bod angen i 2 o’r tai fod ar gyfer angen fforddiadwy ynghyd a chyfraniad addysgol ar gyfer 2 ddisgybl ychwanegol yn yr ysgol leol.  Fodd bynnag, yn dilyn derbyn barn Uned Polisi Cynllunio ar y Cyd o hyfywdra darparu cyfraniad addysgol a chynnig 2 uned fforddiadwy, ystyrir y byddai’r risg o’r datblygiad yn anhyfyw.  Yn seiliedig ar yr uchod, ystyrir bod darpariaeth o un tŷ fforddiadwy fel rhan o’r cynllun yn dderbyniol er mwyn sicrhau elfen fforddiadwy a bod y datblygiad yn hyfyw.  Ni ystyrir bod y bwriad yn debygol o achosi goredrych sylweddol nac ychwaith ei fod yn anghyson gyda phatrwm datblygu’r ardal ac yn addas o ran ei leoliad, ei ddyluniad a’i faint. O safbwynt materion bioamrywiaeth, yn dilyn trafodaethau ac yn seiliedig ar leihau’r nifer o dai oedd yn destun y cais gwreiddiol o 5 i 4 a thrwy newid eu lleoliadau, ystyrir bod y bwriad yn cydymffurfio a pholisïau perthnasol. Argymhelliad y swyddogion cynllunio ydoedd dirprwyo’r hawl i ganiatáu’r cais yn ddarostyngedig i gwblhau Cyrundeb 106 er mwyn sicrhau fod un ty yn fforddiadwy ar gyfer angen lleol ac yn unol â’r amodau a nodir yn yr adroddiad.

(b)       Yn manteisio ar yr hawl i siarad, nododd cynrychiolydd yr ymgeisydd y prif bwyntiau isod:

·         bod y broses wedi bod yn hir gyda'r cais wedi ei gyflwyno ers bron i ddwy flynedd

·         bod y dyluniad gwreiddiol yn golygu 5 tŷ tri llawr fel y rhai sydd eisoes wedi eu caniatáu i aelodau o’r teulu

·         derbyniwyd sylwadau gan y Swyddog Bioamrywiaeth ynglŷn â phryder am y coetir cyfagos ac yn dilyn trafodaethau pellach bu’n rhaid lleihau’r nifer o dai i 4 a newid eu lleoliad i warchod y coed ynghyd ag amod bod coed i’w plannu ar blot rhif 5 yn wreiddiol

·         golygai hyn bod y drws wedi cau ar unrhyw obaith i adeiladu pumed tŷ er cynigiwyd i blannu coed ar safle arall

·         oherwydd yr angen i symud y tai nid oedd tai tri llawr yn gweddu i’r lleoliad ac fe ail-ddyluniwyd y cais yn unol â’r gofynion drwy wario’n sylweddol ar gynlluniau diwygiedig er mwyn bodloni’r angen am dai fforddiadwy

·         apeliwyd ar y pwyllgor i gefnogi’r cais

(c)          Nododd y Cynghorydd John Wyn Williams (a oedd yn aelod o’r Pwyllgor Cynllunio hwn ac yn cynrychioli’r aelod lleol gan ei bod wedi datgan diddordeb) ei fod yn gefnogol i’r cais ac yn derbyn bod llawer o drafodaethau wedi digwydd a bellach wedi cyrraedd at gyfaddawd a oedd orau i bawb o safbwynt hyfywdra’r datblygiad a thai fforddiadwy. 

(ch)      Cynigwyd ac eiliwyd i ganiatáu’r cais.

(d)          Yn ystod y drafodaeth ddilynol, nodwyd y pwyntiau canlynol:

(i)         Mewn ymateb i ymholiad o safbwynt cyfraniad ariannol i’r ysgol, nododd y Rheolwr Rheolaeth Datblygu bod fformiwla penodol wedi ei nodi yn y CCA perthnasol ac fod ffigwr cenedlaethol o oddeutu £12,000 wedi cael ei osod fel cyfraniad addysgol ar gyfer pob plentyn fyddai’n debygol o ddeillio o ddatblygiad a ble nad oes capasiti ar gael o fewn yr ysgol ar eu cyfer.  Yng nghyswllt y cais gerbron, esboniwyd y byddai’r datblygiad yn golygu 2 ddisgybl ychwanegol i’r ysgol leol ac yn unol â Chanllaw Cynllunio Atodol: Ymrwymiad Cynllunio sy’n datgan bod y Cyngor yn awyddus i beidio peryglu hyfywdra cynlluniau datblygu trwy anelu am ormod o gyfraniadau gan ddatblygwyr. Yn yr achos hwn felly daethpwyd i gytundeb mai darpariaeth o 1 uned fforddiadwy ddylid cael blaenoriaeth. Yng nghyd-destun ardaloedd eraill, byddai’n angenrheidiol asesu os oes lle ar gael yn yr ysgol sy’n lleol i’r datblygiadau.  Ychwanegodd yr Uwch Gyfreithiwr, bod yn rhaid ymdrin â’r cyfraniadau addysgol i’r ysgol lle mae effaith uniongyrchol y datblygiadau ar yr ysgol leol  ac ni fyddai’n bosibl, yn gyfreithiol, i ofyn am gyfraniad yn seiliedig ar ganran gwerth unrhyw ddatblygiadau. 

(ii)        Pryder gan aelod bod tueddiad gan swyddogion cynllunio i wrthod ceisiadau a gyflwynir gan ymgeiswyr yn fuan yn y trafodaethau yn hytrach nag esbonio bod cais yn groes i ganllawiau ac yn sgil hyn bod prosesu ceisiadau yn mynd yn hir ac yn creu rhwystredigaeth i ymgeiswyr.  Roedd yr aelod yn synhwyro o’r cais gerbron y byddai caniatâd i 5 ty wedi gweddu hefo patrwm tai eraill a adeiladwyd ac yn caniatáu mwy o dai fforddiadwy. 

(iii)       Mewn ymateb i’r uchod, esboniodd yr Uwch  Reolwr Gwasanaeth Cynllunio bod y swyddogion cynllunio yn cynnig barn broffesiynol gorau bosibl i ymgeiswyr yn seiliedig ar y polisïau cynllunio perthnasol. O safbwynt y cais gerbron, roedd trafodaethau yn seiliedig ar safle anodd yng nghyd-destun materion bioamrywiaeth, a.y.b. a chyrhaeddwyd yn y pen draw ar benderfyniad i’w ganiatáu yn unol â thrafodaeth gyda’r ymgeisydd. Eglurwyd ymhellach mai mater i ymgeiswyr yw cyflwyno ceisiadau ond bod swyddogion cynllunio yn ceisio rhoi'r cyngor proffesiynol gorau fel bo ymgeiswyr ddim yn gwastraffu arian ac mewn gwell sefyllfa i fedru ymdrin â’r cais.

PENDERFYNWYD:     Dirprwyo’r hawl i’r Uwch Reolwr Cynllunio i ganiatáu’r cais yn

ddarostyngedig i arwyddo Cytundeb 106 i sicrhau fod un o’r tai yn dy fforddiadwy ar

gyfer angen lleol, derbyn cynllun diwygiedig o’r man troi siâp “T” ar ben y stad, ac i amodau perthnasol yn ymwneud â:

1.    5 mlynedd

2.    Unol a chynlluniau

3.    To llechi

4.    Dwr Cymru

5.    Priffyrdd (parcio a datganiad dull adeiladu)

6.    Cynllun plannu/gwella bioamrywiaeth i ddigolledu ac i sicrhau fod y man yma yn cael ei gadw ar gyfer gwerth Bioamrywiaeth.

7.    Diogelu llwybr cyhoeddus

8.    Tynnu hawliau dirprwyedig

9.    deunyddiau i’w cytuno