Agenda item

Adeiladu estyniad unllawr a porth i'r ty, trosi modurdy presennol yn uned wyliau hunangynhaliol ac adeiladu stablau

AELOD LLEOL: Cynghorydd  Gruffydd Williams

Dolen i'r dogfennau cefndir perthnasol

Adeiladu estyniad unllawr a phorth i'r tŷ, trosi modurdy presennol yn uned wyliau hunangynhaliol ac adeiladu stablau

Tynnwyd sylw at y sylwadau ychwanegol a gyflwynwyd 

(a)       Ymhelaethodd y Rheolwr Rheolaeth Datblygu ar gefndir y cais, gan nodi bwriad i adeiladu estyniad unllawr a phorth i’r tŷ, trosi’r modurdy presennol yn uned wyliau hunangynhaliol ynghyd ag adeiladu stablau. Nodwyd bod y safle yn gorwedd yng nghefn gwlad ac oddi fewn i Ardal o Harddwch Naturiol Eithriadol Llyn, ac o fewn Tirwedd o Ddiddordeb Hanesyddol Eithriadol Llyn ac Ynys Enlli.

          Amlygwyd bod ardal Mynydd Nefyn yn nodweddiadol yn cynnwys tai ac adeiladau cysylltiol sydd wedi eu lleoli yn wasgaredig o fewn yr ardal ac i’w gweld o ardal eithaf eang.  Heb amheuaeth, mae’r ardal yn un sydd yn weladwy yn y tirlun.  Er hynny, nodwyd, er bod safle yn weladwy nid yw hyn yn gwneud pob datblygiad yn anghywir ac os bydd datblygiadau o ddyluniad a gorffeniad addas gallant fod yn dderbyniol. Ar Fynydd Nefyn mae nifer o’r tai wedi eu paentio yn wyn ac ystyriwyd felly y byddai’n rhesymol rhoddi amod i gytuno gorffeniad y rendr allanol ar gyfer yr estyniadau ar gyfer y bwriad dan sylw.  O ystyried ei leoliad ystyriwyd mai lliw gwyn fyddai’r mwyaf addas gan y byddai hyn yn sicrhau cysondeb gyda thai eraill yn y cyffiniau. Byddai’r stablau siâp ‘L’ wedi eu lleoli yng nghornel cae gyda chlawdd tua’r gogledd a’r dwyrain ac roedd bwriad hefyd i dirweddu o gwmpas y stablau. Roedd y cynnig i wared ar y garafán sefydlog bresennol hefyd yn welliant sylweddol i’r safle.

Tynnwyd sylw at hanes cynllunio'r safle ac at gais ôl-weithredol (C09D/0039/42/LL) i gadw modurdy ynghyd a newid defnydd rhan o gae i ddefnydd anheddol yn gysylltiedig â'r tŷ a pharhau i gadw carafán sefydlog a sied ar y tir. Cafodd y cais ei wrthod ar apel yn 2010 ac un o’r rhesymau oedd bod maint ac uchder y modurdy fel yr oedd wedi ei adeiladu yn creu perthynas anfoddhaol rhwng y modurdy ar tŷ annedd yn sgil agosatrwydd y ddau at ei gilydd.  Roedd yr Arolygydd hefyd yn ystyried bod y bwriad yn ei gyfanrwydd yn cael effaith ar harddwch naturiol yr AHNE. Bu i lefel to y modurdy gael ei leihau wedi hynny ac bu i gais pellach (C10D/0183/42/LL) gael ei gyflwyno a’i ganiatau er mwyn ymestyn cwrtil y ty annedd ac adeiladu clawdd newydd ynghyd a chadw sied a charafan. Roedd gwelliannau yn cael eu dangos mewn ymateb i bryderon yr Arolygydd ar yr apel.

O ystyried yr holl faterion perthnasol gan gynnwys polisïau a chanllawiau lleol a chenedlaethol ynghyd a sylwadau a dderbyniwyd nid yw y bwriad yn annerbyniol nac yn groes i ofynion y polisïau perthnasol.

(b)       Yn manteisio ar yr hawl i siarad nododd yr ymgeisydd y prif bwyntiau canlynol:-

·         Eu bod yn ddiolchgar o gefnogaeth y swyddogion

·         Eu bod yn berchnogion newydd ar Bryn Hyfryd

·         Eu bod yn derbyn sylwadau'r gwrthwynebwyr ond eu bwriad yw gwella'r safle a chadw cymeriad y bwthyn traddodiadol.

·         Ni fydd maint y garej yn cynyddu

·         Bydd y garafán yn cael ei symud yn gyfan gwbl

·         Bod cynllun y stablau wedi ei addasu a bod bwriad i dirweddu drwy osod gwrych

(c)       Nododd yr Aelod Lleol (a oedd yn aelod o’r Pwyllgor Cynllunio hwn):

·         Ei fod wedi galw y cais i mewn o flaen y Pwyllgor

·         Bod angen ystyried blaenoriaethau ac egwyddorion yr ANHE - pryder nad oes blaenoriaeth ddigonol yn cael ei roi i warchod ac ystyried prydferthwch a harddwch naturiol yr ardal

·         Addasiadau ansensitif yn creu effaith ar gefn gwlad

·         Effaith gronnol yr holl ychwanegiadau ar osodiad yr ANHE

·         Bod sawl llwybr cyhoeddus yn mynd heibio i’r safle

·         Siomedig nad oedd ymgynghoriad gyda CADW

·         Cyngor Tref wedi gwrthod y cais

·         Angen sicrhau bod y sefyllfa yn cael ei rheoli yn dilyn hanes nifer ceisiadau ar y safle yn y gorffennol

(ch)   Mewn ymateb i’r sylwadau nododd y Rheolwr Rheolaeth Datblygu bod yr addasiadau i’r modurdy wedi eu gweithredu yn unol a gofynion yr Arolygydd a bod rheolaeth y safle wedi ei wireddu.

          Mewn ymateb i awgyrm y gall y garafan static ddychwelyd i’r safle, amlygwyd y bydd modd gosod amod penodol yn nodi na chaniateir lleoli carafán o fewn y cwrtil eiddo ac felly y’r ymgeisydd yn colli yr hawl i osod y garfan yn ôl.

(d)       Cynigwyd ac eiliwyd i gynnal ymweliad safle.

PENDERFYNWYD trefnu ymweliad safle.