Cyflwyno adroddiad
Arweinydd y Cyngor (ynghlwm).
Cofnod:
Cyflwynodd yr
Arweinydd adroddiad yn gwahodd y Cyngor i fabwysiadu Cynllun y Cyngor 2018-23
(Adolygiad 2020/21).
Nodwyd y bwriedid
cychwyn y broses o adolygu’r Cynllun yn gynharach y flwyddyn nesaf.
Nodwyd bod yr
argyfwng llifogydd diweddar wedi pwysleisio rôl y Cyngor ac aelodau lleol. Diolchwyd am y gwaith a gyflawnwyd, a
dymunwyd y gorau i’r trigolion a’r cymunedau oedd wedi dioddef llifogydd.
Yn ystod y drafodaeth, codwyd y materion a ganlyn gan aelodau unigol:-
·
Nodwyd, er y cydnabyddid bod gwireddu’r Cynllun
Gweithredu Newid Hinsawdd yn gyfrifoldeb ar bob un o adrannau’r Cyngor (tud 53
o’r rhaglen), bod angen penodi un person i arwain ar y gwaith ar ran y Cyngor
er mwyn sicrhau dull cyson o weithredu.
Mewn ymateb, nodwyd y bwriedid adrodd yn
fuan i’r Cabinet ar waith yr is-grŵp sy’n edrych ar newid hinsawdd. O bosib’ y byddai’r Cabinet yn sefydlu bwrdd
gyda Chadeirydd a swyddog penodol yn gwasanaethu’r Bwrdd, fel bod y maes yn derbyn
sylw ar yr un lefel â’r Bwrdd Adfywio a’r Bwrdd Cefnogi Pobl.
·
Nodwyd bod uchelgais y Cyngor o weld trigolion Gwynedd
yn ennill cyflog digonol i fedru cynnal eu hunain a’u teuluoedd yn ganmoladwy,
ond holwyd beth oedd y diffiniad o ‘gyflog digonol’ a pha mor gyraeddadwy
ydoedd? Mewn ymateb, nodwyd bod y
cynllun datblygu’r economi presennol yn diffinio swyddi cyflogaeth uchel fel
rhai dros £26,000, ond bod y Cyngor, drwy ei waith datblygu’r economi, yn
chwilio am swyddi gyda chyflogau llawer uwch na hynny. Ychydig o gyfleoedd cyflogaeth oedd ar gael
mewn ardal wledig fel Gwynedd, ac roedd yn ofynnol parhau gyda’r gwaith o
ddatblygu’r economi er mwyn anelu at y nod o sicrhau cyflogaeth dda i bobl yng
Ngwynedd. Credid bod y nod yn
gyraeddadwy yn y tymor hir. Ystyrid bod
y Cyngor yn mynd i’r cyfeiriad iawn er gwaethaf amgylchiadau anodd eu goresgyn,
ond roedd llawer o’r hyn oedd yn effeithio ar lefel tlodi yn ein hardaloedd yn
dibynnu ar yr hyn oedd yn digwydd yn San Steffan.
·
Holwyd a oedd y Cabinet wedi ystyried
ail-gymryd tai cyngor drosodd gan fod yna arian ar gael a llog yn isel. Mewn ymateb, eglurwyd, er bod dadl, o bosib’,
dros gymryd y stoc tai yn ôl, nad oedd hynny’n flaenoriaeth i Wynedd, ac roedd
gan y Cyngor rôl bwysig o ran datblygu syniadau gwahanol ac arloesol ar sut i
ddarparu tai yn y llefydd iawn ac fel mae pobl eu hangen. Roedd yna amrywiaeth o ffyrdd o wneud hynny,
ac edrychid ymlaen at weld y Cynllun Gweithredu Tai yn fuan.
·
Croesawyd y Cynllun Merched mewn Arweinyddiaeth
(Blaenoriaeth Gwella 3) a gofynnwyd i’r Aelod Cabinet ymhelaethu ar gynnydd y
gwaith. Mewn ymateb, nodwyd bod dau
weithdy - un ar gyfer merched a’r llall ar gyfer dynion, wedi amlygu mai diffyg
hyder, cyfrifoldebau gofalu a chydbwysedd bywyd personol a gwaith oedd y prif
rwystrau i ferched ymgeisio am swyddi uwch o fewn y Cyngor. Yn dilyn y gweithdai, datblygwyd cynllun
gweithredu drafft ar y cyd, ac un o brif flaenoriaethau’r cynllun hwnnw fyddai
cyflwyno rhaglen datblygu potensial i ferched.
Roedd yna fwriad hefyd i adolygu’r trefniadau recriwtio a phenodi er
mwyn ystyried a oedd y Cyngor yn mynd i’r afael â’r rhwystrau o ofalu am blant
a pherthnasau wrth i ferched ystyried eu gyrfaoedd. Yn ogystal â hynny, bwriedid edrych yn
fanylach ar y trefniadau gweithio’n hyblyg, absenoldeb tadolaeth a mamolaeth
ayb, cyfrannu at waith Grŵp Prosiect Amodau Gwaith y Cyngor a chynnig
arweiniad o bersbectif merched yn y gweithlu.
Bwriedid hefyd creu Fforwm i ferched ac roedd yna rôl wleidyddol i’r
Grŵp Cynghorwyr sy’n Ferched fod yn annog mwy o ferched i fod yn gynghorwyr.
·
Cyfeiriodd yr Aelod Cabinet at rai o’r camau a
gymerwyd o fewn yr Adran Priffyrdd a Bwrdeistrefol ac Ymgynghoriaeth Gwynedd i
ddod â’r argyfwng hinsawdd i mewn i Gynllun y Cyngor. Manylwyd ar swyddogaeth statudol ac amserol
Ymgynghoriaeth Gwynedd fel awdurdod llifogydd y sir. Cydymdeimlwyd yn ddwys â’r cymunedau hynny
oedd wedi dioddef llifogydd yn ddiweddar a diolchwyd i weithwyr y Cyngor oedd
wedi bod allan mewn amodau afiach yn ceisio sicrhau bod cymunedau’r sir yn aros
yn ddiogel. Nodwyd bod yr Adran
Priffyrdd a Bwrdeistrefol eisoes yn cyfrannu’n sylweddol at y gwaith o leihau
allyriadau carbon yn y sir, megis drwy newid goleuadau stryd i oleuadau LED,
edrych ar ddi-garboneiddio cerbydau, gan gynnwys ymchwilio i hydrogen fel
tanwydd posib’ ac edrych i mewn i’r potensial o gynnig defnydd cymunedol o’r
fflyd. Nodwyd hefyd bod y Cyngor yn
debygol o gyrraedd ei darged ailgylchu o 64% erbyn diwedd y mis, a thros y
flwyddyn nesaf, bwriedid datblygu strategaeth wastraff newydd fyddai’n rhoi’r
pwyslais ar ail-ddefnyddio yn ogystal ag uchafu ailgylchu. Dymunid trafod syniadau gyda’r aelodau a’r
cymunedau roeddent yn gynrychioli, ac roedd yna awydd hefyd i gymryd pob cyfle
i uchafu pwysigrwydd bioamrywiaeth.
·
Croesawyd dyfodiad cronfa Hunan Adeiladu Llywodraeth
Cymru, ond nodwyd bod hynny’n gwrthdaro gyda’r trafferthion roedd rhai pobl
ifanc yn ardal Llŷn wedi wynebu wrth fynd drwy’r broses gynllunio. Holwyd a oedd yna fwriad i ail-edrych ar y
polisïau er mwyn gweld a ellid cefnogi’r math yma o bobl i sicrhau cartrefi
addas ac o safon o fewn eu cymunedau.
Mewn ymateb, nodwyd bod y Cynllun Datblygu Lleol yn cael ei adolygu’n
gyson, ac y byddai yna gyfle i’r aelodau edrych ar bob polisi o fewn y cynllun
hwnnw. Er y bu cryn edrych ymlaen at
ddyfodiad y gronfa hunan-adeiladu, roedd rhai o’r cyfyngiadau a osodwyd ar y
gronfa gan y Llywodraeth yn golygu nad oedd mor hyblyg â hynny. Er hynny, roedd y Cyngor yn edrych ar bob
cyfle i fanteisio ar y gronfa a deellid bod modd bwrw ymlaen gydag un cynllun o
bosib’.
PENDERFYNWYD mabwysiadu
Cynllun y Cyngor 2019-23 (Adolygiad 2020/21).
Dogfennau ategol: