Agenda item

Codi tyrbin gwynt gyda mesur o 30.5m i’r hwb (48.01m i frig y llafn), blwch rheoli a gwaith cysylltiedig (ail gyflwyniad o gais a dynnwyd yn ôl.   

 

Aelod Lleol:  Cynghorydd Elwyn Edwards

Codi tyrbin gwynt gyda mesur o 30.5m i'r hwb (48.01m i frig y llafn), blwch rheoli a gwaith cysylltiedig (ail gyflwyniad o gais a dynnwyd yn ôl).

 

‘Roedd aelodau’r Pwyllgor wedi ymweld â’r safle cyn y cyfarfod.

 

(a)          Ymhelaethodd y Rheolwr Rheolaeth Datblygu ar gefndir y cais gan nodi bod y safle wedi ei leoli ar dir uchel gerllaw ffordd yr A4212 sydd yn rhedeg fel prif gyswllt rhwng tref Y Bala a phentref Trawsfynydd.  Nodwyd bod ffin Parc Cenedlaethol Eryri wedi ei leoli oddeutu 750 medr i’r gorllewin gyda Tirwedd o Ddiddordeb Hanesyddol Arbennig Y Bala a Glannau Tegid wedi ei leoli oddeutu 2km i dde'r safle, ac mae ardal eang o Dir Mynediad Agored a ddynodwyd dan Ddeddf Cefn Gwlad a Hawliau Tramwy (2005) wedi ei leoli o fewn 300 medr i ddwyrain y safle.  Tynnwyd sylw bod y tir yn borfa amaethyddol sydd wedi ei wella, gyda pheilonau trydan wedi eu lleoli tua 450 medr i’r de o’r safle a cheir golygfeydd panoramig o’r mynyddoedd o amgylch y safle hwn. 

           

Cyfeiriwyd at y polisiau perthnasol ynghyd a’r ymgynghoriadau cyhoeddus o fewn yr adroddiad.

 

Cyfeiriwyd at y sylwadau ychwanegol a gyflwynwyd i’r Pwyllgor.

 

Tynnwyd sylw bod Asesiad Sensitifrwydd a Chynhwysedd Tirwedd Ynys Mon, Gwynedd a Pharc Cenedlaethol gan gwmni Gillespies yn cadarnhau bod safle’r cais o fewn Ardal G12 Llandderfel ac yn disgrifio’r tirwedd yr ardal yn gyffredinol fel un o raddfa ganolig sydd â chymeriad tirwedd wledig a thonnog, sydd â sensitifrwydd canolig i uchel i ddatblygiadau ynni gwynt.

 

Rhagdybia’r polisi yn erbyn datblygiadau sy’n ymwthio’n sylweddol yn weledol ac sydd wedi ei lleoli yn ansensitif ac yn anghydnaws o fewn y tirwedd. Oherwydd amlygrwydd y datblygiad o fewn y tirlun ac o ardal eang iawn o du fewn y Parc, ystyrir y byddai yn amharu yn sylweddol ar fwynhad defnyddwyr y Parc Cenedlaethol.  Ystyrir y byddai’r tyrbin yn y lleoliad arfaethedig yn amharu ar y tirlun, tynnu sylw oddi ar y Parc ac yn amharu ar ddynodiad y tir sydd o bwysigrwydd rhyngwladol. 

 

Pwysleisiwyd oherwydd natur datblygiadau o’r math ei bod yn anodd ei integreiddio gyda’r dirwedd a bod rhaid pwyso a mesur yn ofalus ei effaith gweledol, statws y tirwedd, buddiannau economaidd a’r nod cenedlaethol o hybu datblygiadau sydd yn creu ynni adweinyddol.

 

Nodwyd yr ystyrir nad yw’r bwriad yn cwrdd â gofynion y polisïau perthnasol a byddai’r tyrbin yn cael effaith sylweddol arwyddocaol ar nodweddion a chymeriad arbennig y Parc Cenedlaethol. Argymhelliad y swyddogion cynllunio ydoedd gwrthod y cais yn unol â’r rheswm amlinellir yn yr adroddiad.

 

(b)           Gwnaed y prif bwyntiau canlynol gan yr aelod lleol (oedd yn aelod o’r Pwyllgor Cynllunio hwn):

 

·         Bod y cais yn ail-gyflwyniad gyda’r ymgeisydd wedi colli rhai misoedd a’r gwrthwynebiad yn parhau gan y swyddogion

·         Nad oedd y datblygiad yn amharu ar y dirwedd

·         O safbwynt toriad i’r gorwel, nodwyd bod oddeutu dwy res o beilonau yn rhedeg drwy diriogaeth y Parc Cenedlaethol sydd bron ‘run maint â’r tyrbin arfaethedig ond nid yw'r rhain yn weladwy oherwydd bod y llygaid wedi cynefino a hwy

·         Teulu ifanc a gyflwynir y cais sydd yn dechrau ffarmio

·         Cyngor Cymuned yn gefnogol i’r cais

·         Pe byddai’r tyrbin yn cael ei baentio yn llwyd teimlir y byddai’n gweddu’n naturiol gyda’r adeiladau, peilonau, a.y.b.

·         Mai dim ond dau wrthwynebiad a gyflwynwyd sef gan Swyddog y Parc Cenedlaethol a Chyfeillion y Parc

·         Nad oedd Cyfoeth Naturiol Cymru yn gwrthwynebu a’r swyddogion wedi nodi mewn cais cynharach bod sylwadau Cyfoeth Naturiol Cymru o bwys sylweddol

·         Apeliwyd i’r Pwyllgor gefnogi’r cais     

 

(c)      Yng nghyswllt y sylwadau uchod, pwysleisiodd yr Uwch Reolwr Gwasanaeth

Cynllunio yn wahanol i’r peilonau bod y strwythur yn un symudol a ddim yn

dderbyniol o safbwynt effaith weledol.

 

Cynigwyd ac eiliwyd yr argymhelliad i’w wrthod.

 

(ch)   Nododd Aelod ei gefnogaeth i’r cais oherwydd bod y datblygiad yn gyfle i deulu ifanc fedru cynyddu incwm. Yn dilyn yr ymweliad safle, nid oedd yr Aelod o’r farn y byddai’r datblygiad arfaethedig yn ymwthiol ac y byddai’n siomedig iawn pe bai’r cais yn cael ei wrthod.

 

 

PENDERFYNWYD:      Gwrthod y cais oherwydd ystyrir y byddai natur estron a graddfa’r tyrbin yn ogystal â’i leoliad ansensitif ac anghydnaws o fewn y dirwedd yn ymwthio’n sylweddol yn weledol yn y dirwedd o gwmpas gan gael effaith niweidiol ar olygfeydd amlwg a phanoramig sydd gan y cyhoedd i mewn, allan, ac ar draws y tirwedd o gwmpas sy’n cynnwys Parc Cenedlaethol Eryri a chefn gwlad agored a thrwy hynny niweidio nodweddion a chymeriad arbennig Parc Cenedlaethol Eryri yn groes i Bolisïau B14 a C26, a Pholisïau Strategol 2 a 9 o Gynllun Datblygu Unedol Gwynedd (2009), Canllawiau Cynllunio Atodol: Ynni Gwynt ar y Tir (2014), Pholisi Cynllunio Cymru (Argraffiad 7, Gorffennaf 2014) a  Nodyn Cyngor Technegol 8:Ynni Adnewyddadwy (2005).