Agenda item
- Cyfarfod Pwyllgor Cynllunio, Dydd Llun, 22ain Gorffennaf, 2019 1.00 y.h. (Item 5.1)
- Datganiadau o fuddiant ar gyfer eitem 5.1
Lleoli 8 pod ychwanegol, estyniad safle, ffordd fynediad, mannau parcio ac ymestyn adeilad cyfleusterau
AELOD LLEOL:
Cynghorydd Anwen J Davies
Cofnod:
Lleoli 8 pod ychwanegol, estyniad safle, ffordd
fynediad, mannau parcio ac ymestyn adeilad cyfleusterau
Tynnwyd sylw at y
ffurflen sylwadau hwyr a dderbyniwyd
Amlygwyd bod y
cais yn cael ei gyflwyno i Bwyllgor gan fod y safle o fewn perchnogaeth aelod
o’r Cyngor.
a)
Ymhelaethodd y Rheolwr Cynllunio ar gefndir y cais, gan
nodi bod y cais yn ymwneud â chreu safle gwersylla ar gyfer 8 pod a fyddai’n
cynnwys ffordd fynediad a mannau parcio.
Nodwyd bod bwriad hefyd adeiladu estyniad i’r ystafell hunanarlwyo
presennol er mwyn gwasanaethu’r 8 pod newydd.
O’r
wybodaeth a gyflwynwyd fel rhan o’r cais amlygwyd y byddai cyfnod meddiannu’r
podiau rhwng 1 Mawrth a 31 Hydref ac y byddai caniatâd cynllunio yn cyfyngu
meddiannu’r safle i’r cyfnod hwnnw mewn unrhyw flwyddyn. Byddai’r podiau yn
aros ar y safle trwy gydol y flwyddyn, ond ddim yn cael eu meddiannu yn ystod
misoedd y gaeaf . O ystyried na fyddai’r podiau i’w symud i’w storio ar safle
neillog yn ystod y misoedd yma ystyriwyd y cais o dan Bolisi TWR 3 sy’n ymwneud
a safleoedd carafanau sefydlog a siale a llety gwersylla amgen parhaol.
Gorweddai’r safle oddi fewn i Ardal Tirwedd Arbennig ac mae Polisi TWR 3 yn
datgan y gwrthodir cynigion i ddatblygu safleoedd llety gwersylla amgen parhaol
newydd oddi fewn i’r Ardal Tirwedd Arbennig.
Yng nghyd-destun
mwynderau gweledol, adroddwyd bod y cae, oedd yn destun y cais, oddeutu 3 medr
yn uwch na lefel daear y safle carafanau presennol ac fel rhan o’r bwriad, bydd
y cae yn cael ei gloddio fel bod y lefel yn gostwng rhyw 1 medr. O ganlyniad, byddai oddeutu medr isaf y
podiau wedi eu suddo yn y ddaear o’i gymharu â lefel daear bresennol y
cae. Er i ochrau’r safle fod wedi eu
graddio wrth wneud y gwaith cloddio, ystyriwyd y byddai rhan uchaf y podiau yn
parhau'n weledol ac nid oedd bwriad gan yr ymgeisydd i wneud gwaith tirlunio
fel rhan o’r cais. Cydnabuwyd y byddai lliw to’r podiau o wyrdd tywyll yn
lleihau eu hamlygrwydd yn y dirwedd, ond nid yn goresgyn y ffaith y byddai’r
podiau wedi eu lleoli ar dir uwch na’r tir gerllaw. O ystyried hyn, ni fyddai’r bwriad yn gwneud dim i gynnal, gwella neu
adfer cymeriad cydnabyddedig yr Ardal Tirwedd Arbennig a bod y bwriad yn groes
i ofynion Polisi PCYFF 4 ac AMG 2 Cynllun Datblygu Lleol.
Wrth ystyried
materion trafnidiaeth a mynediad nodwyd y byddai mynediad i’r safle ar hyd trac
amaethyddol presennol ac er y byddai’r safle arfaethedig yn rhannu’r un fynedfa
i’r ffordd sirol bydd mynediad gwahanol i’r safle arfaethedig a’r safle
carafanau presennol. Byddai cyfleusterau
fel y toiledau / cawodydd ac ystafell cyfleusterau yn cael eu rhannu rhwng y
safle presennol a’r bwriad arfaethedig. Ystyriwyd bod y bwriad yn dderbyniol o
ran diogelwch ffyrdd ac yn cydymffurfio gyda’r polisïau perthnasol.
b) Yn manteisio ar yr hawl i siarad nododd
yr ymgeisydd y prif bwyntiau canlynol:-
·
Yn
dilyn awgrym gan Uned Bioamrywiaeth Cyngor Gwynedd am roi gwely hesg yn y gors
fel system garthffosiaeth ni fyddai hyn yn cael ei ystyried gan y byddai’n creu
arogl annymunol ac yn denu pryfaid.
·
Dymuniad
i gadw Cors Geirch fel y mae - wedi ei chadw fel hyn ers y 40au
·
Bod
lle digonol ar gyfer gosod 8 pod ychwnaegol ar y safle
·
Nad
oedd modd symud y podiau dros fisoedd y gaeaf oherwydd bod haearn y fframwaith
yn plygu
·
Bod
trefniadau i’r tanc septig gael ei wagu ddwywaith y flwyddyn
·
Nad
oedd modd plannu coed gan y byddai’r
gwreiddiau yn ansefydlogi’r tir
·
Caniatâd
cynllunio wedi ei ganiatáu ar gyfer 2 pod, felly pam gwahaniaethu?
c) Cynigiwyd ac eiliwyd i wrthod y cais yn
unol â’r argymhelliad
ch) Yn ystod y drafodaeth ddilynol nodwyd y prif sylwadau canlynol gan aelodau:
·
Bod podiau yn gweddu'r dirwedd yn well na charafanau
·
Bod amaethwyr yn gorfod ystyried arall gyfeirio.
Twristiaeth felly yn opsiwn
·
Bod modd datrys y sefyllfa gyda’r tanc septig petai
wybodaeth gywir yn cael ei gyflwyno
·
Os yw’r podiau yn rai symudol ac y byddai’r
ymgeisydd yn barod i’w symud, y cais yn dderbyniol?
·
Bod angen rhoi pwyslais ar yr elfen tirweddu
·
Pe byddai modd ymgynghori a chyfaddawdu gyda’r
ymgeisydd ar y tri rheswm gwrthod, byddai’r cais yn debygol o gael ei ganiatáu
d) Mewn ymateb i gwestiwn ynglŷn â
sut y gellid cefnogi’r ymgeisydd i wireddu’r fenter, nododd y Rheolwr Cynllunio
nad oedd y cais yn dderbyniol oherwydd egwyddorion sylfaenol. Amlygodd nad oedd
yr ymgeisydd wedi gwneud cais am gyngor cyn cyflwyno ac er i’r Uned Cynllunio
geisio trafodaethau ymgynghori gyda’r ymgeisydd,roedd yn amlwg nad oedd bwriad
i newid y cais. Ategodd yr Uwch Reolwr Cynllunio bod yr argymhelliad yn un cryf
a bod egwyddor Polisi TWR3 wedi cael ei gefnogi mewn apêl yn ddiweddar.
dd) Mewn ymateb i sylw ynglŷn â gadael y
2 pod presennol allan drwy’r gaeaf ac felly beth yw’r gwahaniaeth gyda gadael 8
arall allan, amlygodd yr Uwch Reolwr Cynllunio bod achos ymchwiliad gorfodaeth
i sefyllfa’r 2 pod ar hyn o bryd. Ategodd bod amod wedi ei osod ar y cais i
symud y podiau ar ddiwedd y tymor gwyliau. Nododd hefyd bod caniatâd storfa yn
bodoli ar y safle.
PENDERFYNWYD gwrthod y cais.
1. Byddai’r bwriad yn
creu safle llety gwersylla amgen newydd o fewn Ardal Tirwedd Arbennig ac felly
yn groes i bwynt 1 o Bolisi TWR 3 Cynllun Datblygu
Lleol.
2. Ni ystyrir y byddai’r bwriad yn
integreiddio gyda’r hyn sydd o’i gwmpas ac ni roddwyd ystyriaeth i faterion
tirweddu fel rhan o’r cynnig. Yn sgil
hyn ni ystyrir y byddai’r bwriad yn ychwanegu at gynnal, gwella neu adfer
cymeriad cydnabyddedig yr Ardal Tirwedd Arbennig a bod y bwriad felly yn groes
i ofynion Polisi PCYFF 4 ac AMG 2 Cynllun Datblygu
Lleol.
3. Ni chyflwynwyd tystiolaeth fel rhan o’r cais i ddangos fod y tanc trin
presennol gyda’r capasiti ar gyfer gwasanaethu’r 8 pod ychwanegol. Ceir safleoedd dynodedig gerllaw safle’r cais
ac sydd yn cynnwys Ardal Cadwraeth Arbennig, Safle o Ddiddordeb Gwyddonol
Arbennig a safle Ramsar. Yn sgil y
diffyg gwybodaeth yma ni ellir asesu effaith y bwriad yn llawn ar y safleoedd
yma ac mae’r bwriad yn ei ffurf bresennol felly yn groes i ofynion Polisi PS 19
Cynllun Datblygu Lleol a Pholisi Cynllunio Cymru.
Dogfennau ategol: