Agenda item

Cais amlinellol ar gyfer codi annedd menter wledig

AELOD LLEOL: Cynhgorydd Peter Garlick

Dolen i'r dogfennau cefndir perthnasol

Cais amlinellol ar gyfer codi annedd menter wledig

Tynnwyd sylw at y ffurflen sylwadau hwyr a dderbyniwyd

(a)          Ymhelaethodd y Rheolwr Cynllunio ar gefndir y cais, gan nodi bod y cais yn cael ei gyflwyno i’r Pwyllgor Cynllunio ar alw’r Aelod Lleol. Eglurwyd bod y penderfyniad wedi ei ohirio ym Mhwyllgor Cynllunio 29.04.2019 er mwyn asesu cynnwys llythyr hwyr a dderbyniwyd gan gyfreithiwr perchennog y tir. Roedd y llythyr yn nodi bod perchnogion y tir am drosglwyddo’r busnes i’r ymgeiswyr a gwerthu’r rhan o dir y bwriedir adeiladu’r tŷ oedd yn destun y cais i’r ymgeiswyr.

Adroddwyd bod safle’r cais wedi ei leoli oddeutu 250m i ffwrdd o ffin ddatblygu pentref Bontnewydd, ac yn nhermau’r Cynllun Datblygu Lleol, roedd wedi ei leoli yng nghefn gwlad agored. Yn sgil yr angen i gynnal a gwarchod cefn gwlad roedd angen cyfiawnhad arbennig iawn dros ganiatáu adeiladu tai newydd yno. Nodwyd bod Polisi PS17 o’r Cynllun Datblygu Lleol yn datgan mai dim ond datblygiadau tai a oedd yn cydymffurfio â Pholisi Cynllunio Cymru a Nodyn Cyngor Technegol (NCT) 6: Cynllunio ar gyfer Cymunedau Gwledig Cynaliadwy, fyddai’n cael eu caniatáu yng nghefn gwlad agored.

Tynnwyd sylw bod paragraff 4.3.1 o’r NCT6 yn nodi mai un o’r ychydig sefyllfaoedd lle gellid cyfiawnhau datblygiad preswyl newydd ar ei ben ei hun yng nghefn gwlad agored oedd pan fo angen llety i alluogi gweithwyr menter wledig i fyw yn eu man gwaith neu’n agos ato. Ymhelaethwyd bod yr angen hanfodol am lety yn dibynnu ar anghenion y fenter wledig dan sylw, ac nad ar ddewis nac amgylchiadau personol yr ymgeisydd.

Nodwyd, petai’r sefyllfa perchnogaeth tir a’r busnes yn newid yn swyddogol yn y dyfodol yna byddai’n ofynnol ail-asesu’r bwriad yn ei gyfanrwydd yn erbyn y rhannau perthnasol o NCT 6. Adroddwyd ei bod yn gynamserol ac amhriodol i asesu sefyllfa i’r dyfodol gan nad oedd sicrwydd bod hyn am ddigwydd. Pe byddai sefyllfa’r berchnogaeth yn newid yn swyddogol yn y dyfodol yna byddai’n ofynnol i’r ymgeiswyr ddarparu’r wybodaeth briodol ar gyfer ail-asesu’r cais yn ei gyfanrwydd.

Tynnwyd sylw at baragraff 4.11 o’r NCT 6 sydd yn nodi bod rhaid darparu tystiolaeth nad oes unrhyw annedd/anheddai neu adeiladau eraill y gellid eu haddasu i fodloni’r angen. Os oes annedd/anheddau ar y fenter yn bodoli yn barod yna byddai angen dangos pam na ellid defnyddio’r rhain i ddiwallu anghenion y fenter ar gyfer gweithiwr preswyl, a pham na ellid aildrefnu trefniadau llafur neu breswyl er mwyn sicrhau bod y llety presennol yn diwallu anghenion y fenter heb fod angen annedd arall.

Ystyriwyd bod y bwriad o godi annedd menter wledig yng nghyswllt y busnes ar y safle yn groes i ofynion polisïau PCYFF 1 a PS17 o’r CDLl ynghyd â pharagraffau 4.2.36 - 37 o Bolisi Cynllun Cymru, rhan 4.3.1 o NCT 6: Cynllunio ar gyfer Cymunedau Gwledig Cynaliadwy a rhan 2.13 o Arweiniad Ymarferol NCT 6.

Mynegodd yr Uwch Gyfreithiwr mai’r tir sydd wedi ei drosglwyddo i’r ymgeisydd ac nid y busnes, a gydag addasiadau wythnosol yn dod i law, anodd yw asesu’r sefyllfa. Awgrymwyd mai’r datrysiad gorau fyddai cyflwyno cais o’r newydd pan fydd y busnes wedi ei drosglwyddo i’r ymgeisydd yn ei gyfanrwydd

(c )    Amlygwyd bod yr Aelod Lleol yn gefnogol iawn i ganlyniad  ffafriol yn dilyn y wybodaeth ddiweddaraf a ddaeth i law.

(ch)   Cynigiwyd ac eiliwyd i wrthod y cais

(d)       Yn ystod y drafodaeth ddilynol nodwyd y prif sylwadau canlynol gan aelodau:

·         Bod yr argymhelliad i wrthod yn cyd-fynd a’r polisïau perthnasol

·         Y byddai caniatáu yn gosod cynsail beryglus

·         Nid yw’r angen wedi ei brofi

Mewn ymateb i gwestiwn ynglŷn â chynnig argymhelliad gwahanol petai’r busnes wedi ei drosglwyddo yn llawn, nododd y Rheolwr Cynllunio y byddai angen cwblhau profion a chasglu tystiolaeth ychwanegol.

(dd)   PENDERFYNWYD gwrthod y cais am y rhesymau isod

·      Mae’r safle wedi ei leoli yng nghefn gwlad agored o safbwynt polisi cynllunio, ac mae’r datganiad cynllunio ac arfarniad tŷ menter wledig yn cadarnhau fod unigolion sydd yn berchen a 50% o’r busnes menter wledig, yn berchen y tir ble leolir y busnes ac yn byw o fewn eiddo sydd wedi ei leoli ar y safle yn barod.  Mae’r Awdurdod Cynllunio Lleol felly o’r farn fod unrhyw angen swyddogaethol sy’n bodoli gyda’r busnes ar y safle wedi ei ddiwallu’n barod ac y byddai codi annedd ychwanegol ar y safle yma felly yn groes i ofynion polisïau PCYFF 1 a PS17 o’r CDLl ynghyd â pharagraffau 4.2.36 - 37 o Bolisi Cynllun Cymru, rhan 4.3.1 o NCT 6: Cynllunio ar gyfer Cymunedau Gwledig Cynaliadwy a rhan 2.13 o Arweiniad Ymarferol NCT 6.

·      Mae’r fynedfa bresennol a fwriedir ei ddefnyddio i wasanaethu’r bwriad gerbron yn israddol o ran gwelededd tua chyfeiriad Bontnewydd. I’r perwyl hyn, mae’r bwriad yn groes i ofynion polisi TRA 4 o’r Cynllun Datblygu Unedol Gwynedd a Môn 2017 o ran sicrhau diogelwch ffyrdd.