Agenda item

Cyflwyno adroddiad y Cynghorydd Thomas G.Ellis, Cadeirydd y Pwyllgor Gwasanaethau Democrataidd  (ynghlwm).

Cyflwynodd y Cynghorydd Thomas G.Ellis, Cadeirydd y Pwyllgor Gwasanaethau Democrataidd adroddiad ar ran is-grŵp o’r pwyllgor yn argymell y ffordd ymlaen o ran cyflogau aelodau etholedig.

 

Gan gyfeirio at yr argymhelliad i gadw lefelau cyflogau Aelodau Cabinet a Chadeiryddion Pwyllgorau ar Lefel 1, cynigiwyd ac eiliwyd gwelliant i ostwng y lefelau cyflogau i Lefel 2, ar y sail y byddai hynny’n arbed oddeutu £40,000 i’w wario mewn meysydd eraill ac yn dangos i drigolion y sir fod y Cyngor yn fodlon rhannu’r boen yn y cyfnod presennol o galedi.

 

Mynegodd rhai aelodau eu gwrthwynebiad i’r gwelliant ar y sail:-

 

·         Er bod lle bob amser i edrych ar gyflogau’r holl aelodau, mai camgymeriad fyddai gwahanu dyletswyddau’r Aelodau Cabinet oddi wrth y cyflog gan y byddai’r dyletswyddau yn aros yr un fath, ond y cyflog yn gostwng.

·         Bod yr Aelodau Cabinet wedi eu penodi i’r swyddi’n llawn-amser a bod rhai wedi rhoi’r gorau i swyddi eraill neu wedi gorfod gwneud trefniadau arbennig er mwyn gallu ymgymryd â’r rôl.

·         Nad dyma’r adeg i adolygu cyflogau, eithr ar ddechrau tymor newydd y Cyngor.

·         Os oes awydd i ail-ymweld â chyflogau, dylid edrych ar gyflogau’r holl aelodau, ac nid yr Aelodau Cabinet yn unig.

 

Pleidleisiwyd ar y gwelliant ac fe ddisgynnodd.

 

Gan gyfeirio at yr argymhelliad i beidio talu uwch-gyflog i Gadeirydd y Pwyllgor Apelau Cyflogaeth o hyn allan, mynegodd Cadeirydd presennol y Pwyllgor Apelau Cyflogaeth (fyddai’n sefyll i lawr y mis hwn) ei wrthwynebiad i’r argymhelliad ar y sail:-

 

·         Bod y pwyllgor yn gweithredu ar ran 6,000 – 7,000 o staff y Cyngor ac yn gorfod gwneud penderfyniadau anodd ac emosiynol dros ben, e.e. i ddiswyddo staff.

·         Bod nifer y cyfarfodydd wedi cynyddu gyda’r pwyllgor yn cyfarfod o leiaf unwaith y mis, ac weithiau ddwywaith.

·         Bod y cyfarfodydd yn rhai trwy’r dydd a bod un cyfarfod wedi mynd ymlaen am ddau ddiwrnod a chyfarfod arall wedi mynd ymlaen o 9.30yb tan 7.00yh.

·         Nad oedd yr is-grŵp fu’n edrych ar gyflogau aelodau wedi trafod y llwyth gwaith gydag ef nag aelodau’r Pwyllgor cyn llunio eu hargymhelliad.

·         Pe na bai’r Cyngor yn fodlon gwrthod yr argymhelliad, y byddai’n fodlon cynnig bod yr is-grŵp yn gwneud rhagor o waith ymchwil ar y mater, fyddai’n cynnwys holi cadeiryddion ac aelodau’r Pwyllgor Apelau Cyflogaeth a’r Pwyllgor Pensiynau ynglŷn â’r llwyth gwaith.

 

Cynigiwyd ac eiliwyd gwelliant i gadw at y drefn bresennol oherwydd llwyth gwaith y Pwyllgor Apelau Cyflogaeth.

 

Yn ystod y drafodaeth ar y gwelliant, nodwyd:-

 

·         Y gallai’r gwaith ychwanegol sy’n wynebu Cadeirydd y Pwyllgor Pensiynau olygu 17 cyfarfod mewn blwyddyn, gan gynnwys aros dros nos ar rai achlysuron, a gallai olygu ymrwymo o leiaf 19 diwrnod yn y cyswllt hwn.

·         Bod aelodau’r Pwyllgor Pensiynau yn gorfod ymgymryd â hyfforddiant ac asesiadau parhaus.

·         Y gobeithid bod yr is-grŵp wedi edrych yn fanwl ar y llwyth gwaith sydd ynghlwm â’r ddwy rôl, ac wedi eu cymharu a dod i ddealltwriaeth.

·         Bod gan Gadeirydd y Pwyllgor Pensiynau lawer o waith i’w wneud y tu allan i’r pwyllgor, ac nad mater o nifer cyfarfodydd yn unig ydoedd.

 

Mewn ymateb i ymholiad ynglŷn â chywirdeb y ffigurau yn yr adroddiad o ran nifer cyfarfodydd y Pwyllgor Apelau Cyflogaeth, cadarnhaodd y Pennaeth Cefnogaeth Gorfforaethol y cynhaliwyd 4 cyfarfod yn 2015-16, er y clustnodwyd un dyddiad bob mis ar gyfer gallu cynnal gwrandawiad buan petai angen.

 

Nodwyd, er bod mwyafrif cyfarfodydd y Pwyllgor Apelau Cyflogaeth yn cael eu canslo, bod hynny’n dueddol o ddigwydd ar y funud olaf wedi i’r aelodau gwblhau’r holl waith paratoi.

 

Pleidleisiwyd ar y gwelliant i gadw at y drefn bresennol ac fe ddisgynnodd.

 

Pleidleisiwyd ar y cynnig gwreiddiol i beidio talu uwch-gyflog i Gadeirydd y Pwyllgor Apelau Cyflogaeth o hyn allan, ac fe gariodd.

 

PENDERFYNWYD

(a)     Cadw lefelau cyflogau Aelodau Cabinet ar Lefel 1 (ar sail ystyried y pwysau gwaith a chyfrifoldebau cyfartal i’r meysydd gwaith) a chadw lefelau cyflogau Cadeiryddion Pwyllgorau ar Lefel 1 (ar sail ystyried y pwysau gwaith, natur ddaearyddol y sir a’r gofynion i deithio i gyfarfodydd ayyb)

(b)     Ar sail y wybodaeth a ystyriwyd gan yr is-grŵp, talu uwch-gyflog i Gadeirydd y Pwyllgor Pensiynau yn sgil y gwaith a’r gofynion ychwanegol sydd i ddod i Gadeirydd y pwyllgor hwnnw yn sgil y newidiadau.

(c)     Er mwyn gallu gweithredu’r uchod, gan fod y Cyngor wedi ei gyfyngu i dalu 18 uwch-gyflog yn unig, na thelir uwch-gyflog i Gadeirydd y Pwyllgor Apelau Cyflogaeth o hyn allan.