Agenda item
Cais llawn ar gyfer gwaith peirianyddol, gan gynnwys torri a llenwi, er mwyn cyflawni arglawdd rip-rap wedi'i ehangu ar llain ogleddol datblygiad rhan II, yn ogystal a gwaith pellach i atgyfnerthu'r hen llenni dur o amgylch mur y doc
AELOD LLEOL:
Cynghorydd Huw Gruffydd Wyn Jones
Cofnod:
Cais llawn ar gyfer y gwaith peirianyddol, gan gynnwys torri a llenwi, i
gyflwyno arglawdd rip- rap estynedig
ar barsel datblygu gogleddol Cam II, yn ogystal â gwaith pellach i
atgyfnerthu'r hen lenni dur o
amgylch wal y doc
Ymhelaethodd yr
Uwch Swyddog Cynllunio Mwynau a Gwastraff ar gefndir y cais, gan atgoffa’r
aelodau bod dau gais blaenorol wedi bod ar y safle i godi lefel tir er mwyn ei ddatblygu ymhellach. Roedd
rhain yn cynnwys darparu cerrig o gwmpas y safle a rip rap (amddiffynfa
môr). Bwriad y cais cyfredol oedd ymestyn y rip rap yn ymhellach ynghyd â gosod llenni dur o gwmpas y cei -
elfennau mwyaf ymwthiol y cais.
Yn dilyn cyflwyniad asesiadau
dirgryniad a sŵn ymgynghorwyd gydag Uned Gwarchod y Cyhoedd, Cyngor Gwynedd. Daethpwyd i’r
casgliad i argymell caniatáu y cais gydag amodau
penodol monitro sŵn yn
ystod y gwaith ynghyd â monitro tirgryniad; ac
oherwydd agosatrwydd tai i’r safle,
cyfyngu oriau gwaith i 4 awr y dydd a dim ond dwy awr mewn un lleoliad penodol.
Yn dilyn asesiad o dan Ddeddf
Cynefinoedd 2017, gan fod rhan o'r traeth o flaen y safle yn cael ei effeithio gan y gwaith, ni
ystyriwyd y byddai effaith ar ardaloedd cadwraeth rhyngwladol Traeth Lafan ac Afon Menai. Er hynny, amlygwyd y
byddai mesuriadau lliniaru wrth osod
llenni dur i beidio gweithio 2 awr cyn
ac awr a hanner ar ôl llanw uchel.
Ynglŷn â materion gosod y llenni
dur, amlygwyd gan fod waliau'r doc yn dirywio buasai’n orfodol gwneud gwaith arbed i’r dyfodol. Gyda thai o fewn 25m i’r
gosodiad, tynnwyd sylw'r ymgeisydd at dechnegau llai ymwthiol o
osod llenni dur i mewn i’r ddaear gan
gynnig techneg ‘silent
sheet piling’. Er bod yr
ymgeisydd yn fodlon mabwysiadu'r dechneg yma mynegwyd
yr angen am sicrwydd o fesuriadau lluniau pellach ac felly byddai gofyn am amodau ychwanegol i’r ymgeisydd
gadarnhau, cyn dechrau’r gwaith i egluro'r union dechneg a’r fethodoleg fyddai yn cael ei defnyddio i
osod y llenni. Byddai hefyd angen cadarnhau cynllun monitro dirgryniad, safle’r
gwaith ynghyd â’r math o offer fydd yn cael ei ddefnyddio.
(b) Yn manteisio ar yr
hawl i siarad nododd gwrthwynebydd, oedd yn cynrychioli trigolion y bae a thai
cyfagos, y prif bwyntiau canlynol:-
·
Bod
cais blaenorol wedi ei wrthod oherwydd presenoldeb llysiau’r dial. Angen tystiolaeth
bod y planhigyn wedi ei ddifa. Yr un yw’r broblem gyda’r safle yma ac felly
angen sicrhau nad oes llysiau dial ar y safle cyn dechrau.
·
Bod
y cartref agosaf oddeutu 20m i’r safle
·
Derbyn
bod yr ymgeisydd wedi cytuno i newid ei ddull o weithio ond nid yw’r adroddiad
yn adlewyrchu dulliau gweithio. Nid yw’r ystadegau yn gywir ac felly angen cais
o’r newydd
·
Nid
oes gan yr ymgeisydd unrhyw ymrwymiad i ddymuniadau trigolion cyfagos. Ffydd ac
ymddiriedaeth yn yr ymgeisydd yn wael, nid ydynt yn cadw at eu gair ac felly
angen amodau llym i reoli’r sefyllfa
( c) Yn manteisio ar yr hawl i siarad nododd
asiant yr ymgeisydd y prif bwyntiau canlynol:
·
Bod cais i ymestyn gwaith
wedi ei warantu
yn Nhachwedd 2016
·
Bod yr ymgeisydd yn cydweithio
gyda’r Awdurdod Cynllunio i geisio
datrysiadau
·
Y byddai’r
ymgeisydd yn cadw at y rheolau caeth
·
Bod asesiad
cynefinoedd wedi ei gwblhau
·
Na fyddai unrhyw adwaith croes
·
Pob pryder wedi ei
ddiwallu
·
Bod yr adroddiadau technegol wedi eu gwerthuso
gan y Swyddogion Cynllunio
(ch) Gwnaed y prif bwyntiau canlynol
gan yr aelod
lleol (oedd yn aelod o’r
Pwyllgor Cynllunio hwn):
·
Bod sŵn o’r lefel tirgryniant
ar lefel uchel iawn
·
Y byddai defnyddio offer
‘silent vibration free’ yn well na’r hyn a gynigiwyd
yn wreiddiol er nad oedd
cadarnhad mai'r peiriant yma gaiff
ei ddefnyddio. Petai amod yn
cael ei gynnwys
yn amlygu hyn, byddai’r trigolion
yn fodlon.
·
Derbyn yr angen i
amddiffyn y safle rhag y môr
·
Os byddai
cadarnhad gan yr asiant o’r
cynllun gweithredu, byddai hyn yn
rhoi sicrwydd i’r trigolion a’r
cais yn cael
ei ystyried yn dderbyniol.
(d) Cynigiwyd ac eiliwyd i ganiatáu
y cais ynghyd a gosod amod ychwanegol
yn manylu ar y math o offer fydd yn cael
ei ddefnyddio.
(dd) Yn ystod y drafodaeth ddilynol nodwyd y prif sylwadau
canlynol gan aelodau:
·
A
yw’r llysiau dial wedi eu gwaredu yn unol â’r gofyn?
PENDERFYNWYD awdurdodi Uwch Reolwr
y Gwasanaethau Cynllunio, Amgylchedd a Gwarchod y Cyhoedd i gymeradwyo'r cais
yn ddarostyngedig i'r ystod o amodau a nodir isod ac amodau ychwanegol i gytuno
ar y math o offer fydd yn cael ei ddefnyddio i osod y llenni dur ac amod
monitro dirgryniad a, ble noder, cyflwyno gwybodaeth benodol yn unol â gofynion
amodau cyn dechrau'r datblygiad;
·
Cychwyn
ymhen pum mlynedd,
·
Gweithrediadau
dros dro yn cynnwys y gwaith gosod llenni dur a chario 7,500 tunnell o gerrig
i'w weithredu o fewn amserlen o ddeuddeg mis o ddyddiad hysbysu'r Awdurdod
Cynllunio Lleol,
·
Gweithgareddau a
ganiateir a Chydymffurfiaeth â’r Manylion/Cynlluniau a Gyflwynwyd;
·
Cario deunyddiau
wedi'i gyfyngu i 150 o dunelli'r diwrnod, rhwng 08.00 a 17.00 o ddydd Llun i
ddydd Gwener, neu gyfanswm o wyth llwyth y diwrnod,
·
Cyfyngu'r gwaith
gosod llenni dur i 4 awr y dydd mewn unrhyw gyfnod 08.00 - 18.00 a dim
gweithredu'n barhaus am fwy na 2 awr yn unrhyw leoliad penodol.
·
Argymell cyfyngiad sŵn o 65dB LAeq, 10 awr a gofyn am fonitro sŵn,
·
Cyfyngiad dirgryniad o 10 PPV mm-e
-1 yn yr eiddo preswyl agosaf a gofyn am fonitro dirgryniad,
·
Hysbysiad o
ddechrau a gorffen y gwaith gosod llenni dur,
·
Pan fo lefelau sŵn (sydd yn aer ac o
strwythurau) yn uwch na'r lefelau a ragwelir bydd yr Awdurdod Cynllunio Lleol
a'r Adran Gwarchod y Cyhoedd yn cael eu hysbysu cyn gynted â phosib dros y ffôn
neu'n electroneg.
·
Mesurau lliniaru i
leihau'r effaith ar y pibydd goesgoch, a nodweddion eraill o ddiddordeb
bioamrywiaeth leol, yn cynnwys;
o
Gwahardd gwaith
gosod llenni dur 2 awr cyn llanw uchel ac awr a hanner ar ôl llanw uchel rhwng
mis Medi a mis Mawrth h.y. cyfnod o ddim gwaith am dair awr a hanner o amgylch
llanw uchel,
o
Unrhyw waith arall
(adeiladu rip-rap a pharatoi'r safle) i gael ei wahardd am awr a hanner cyn ac
ar ôl llanw uchel rhwng mis Medi a mis Mawrth h.y. cyfnod o ddim gwaith am dair
awr o amgylch llanw uchel,
o
Dylid ymgymryd ag
arolygon monitro yn ystod y cyfnod adeiladu i wirio bod adar yn parhau i
ddefnyddio'r safle a bod mesurau i leihau aflonyddwch yn cael eu gweithredu'n
llwyddiannus,
o ymgeiswyr i gynhyrchu a gweithredu
amserlen waith yn manylu ar y cyfnodau gweithio cyfyngedig dyddiol o amgylch
llanw uchel fel y nodwyd yn yr amod
·
Cael gwared ag
offer peirianneg sifil, strwythurau a pheiriannau sydd dros ben wedi cwblhau'r
datblygiad,
·
Rheoli
llwch sy'n cael ei gario a darparu offer golchi olwynion ar y safle i fod yn
destun amod cynllunio,
·
Defnydd wedi'i gyfyngu
i waredu cerrig a gosod llenni dur,
·
Dyluniad
manwl y deunydd rip-rap, uchafswm maint y garreg i'w defnyddio ac unrhyw
ofynion cynnal a chadw yn y dyfodol i fod yn unol â'r manylion a gymeradwywyd
yn flaenorol dan amod,
·
Mesurau
rheoli llygredd, monitro safle a lliniaru ecolegol i'w gweithredu yn unol â'r
Cynllun Rheoli Amgylchedd Adeiladu i'w cyflwyno er cymeradwyaeth yr Awdurdod
Cynllunio Lleol cyn i'r datblygiad ddechrau i
sicrhau fod arfer da a mesurau lliniaru da wedi'u sefydlu i amddiffyn yr amgylchedd
dyfrol, gan gynnwys: amodau gwaith ar y safle a mesurau i reoli effeithiau
amgylcheddol megis symudiadau cerbydau trymion, cyfleusterau golchi olwynion,
gorchuddio cerbydau, ardaloedd storio diogel, ansawdd aer, oriau gwaith,
sŵn/dirgryniad, rheoli gwastraff a llygredd. Hefyd, monitro'r dŵr ffo
posib o ddeunyddiau llaid a gwastraff i liniaru ardrawiad posib y datblygiad a
gweithdrefnau arllwyso ar yr amgylchedd
·
Yr
ymgeisydd i gynnal cynllun o samplo dwr a dadansoddi yn ystod cyfnod y
datblygiad i ganfod a oes llygryddion yn bresennol mewn unrhyw drwytholch,
·
Tanwydd neu iraid
i'w storio mewn lleoliad i'w gytuno ar bapur gyda'r Awdurdod Cynllunio Lleol.
Bwnd i fod o leiaf 110% o gapasiti'r tanc tanwydd,
·
Cyn dechrau unrhyw ddatblygiad pellach ar y safle,
bydd tystiolaeth yn cael ei chyflwyno er cymeradwyaeth yr Awdurdod Cynllunio
Lleol, i gadarnhau bod y rhaglen trin Llysiau'r Dial wedi bod yn llwyddiannus
ac wedi'i hardystio gan ymgynghorydd annibynnol bod yr holl ddeunydd planhigion
ymledol wedi'i waredu. Mae'r cynllun diwygiedig yn gofyn i'r
contractwr barhau i archwilio'r tir am unrhyw aildyfiant
am gyfnod o 10 mlynedd ac yn darparu ar gyfer dogfennu ffotograffig a
monitro, unrhyw waith adfer i waredu unrhyw aildyfiant
ac unrhyw achos o Lysiau'r Dial gerllaw'r safle.
·
Dylid
cyfyngu ar y defnydd a wneir o beiriannau â thrac ar y safle cymaint ag y bo
modd, hyd nes y bydd yr ardaloedd lle mae'r Llysiau'r Dial wedi'u clirio neu
wedi'u gwahanu. Os oes rhaid defnyddio peiriannau
â thrac mewn ardaloedd lle mae Llysiau'r Dial yn bresennol, rhaid defnyddio
haen geodecstil fel arwyneb i gerbydau deithio ar ei
hyd.
·
Nodyn i'r
ymgeisydd yn cyfeirio at ymateb Cyfoeth Naturiol Cymru, Rheoli Perygl Llifogydd
Cyngor Gwynedd a'r Gwasanaeth Erydu Arfordirol i'r ymgynghoriad, ond hefyd
lleoliad offer Dwr Cymru sydd angen mynediad diogel bob amser,
·
Nodyn i'r
ymgeisydd mai cyfrifoldeb ac atebolrwydd canlynol y datblygwr a/neu'r
tirfeddiannwr yw datblygu a meddiannu'r safle'n ddiogel.
·
Nodyn i'r
ymgeisydd bod y cais wedi ei asesu'n unol â saith nod cynaliadwy Deddf Llesiant
Cenedlaethau'r Dyfodol (Cymru) 2015.
Dogfennau ategol: