Adnewyddu caniatâd rhif C08A/0568/24/LL a C09A/0532/24/LL ar gyfer codi 24
tŷ yn cynnwys 12 tŷ fforddiadwy, newidiadau i’r fynedfa bresennol a
chreu lonydd stâd (cynllun diwygiedig i’r hyn a
gyflwynwyd yn wreiddiol).
AELOD LLEOL: Cynghorydd
Aeron Maldwyn Jones
Dolen i'r dogfennau cefndir perthnasol
Cofnod:
Adnewyddu
caniatâd rhif C08A/0568/24/LL a C09A/0532/24/LL ar gyfer codi 24 tŷ, yn
cynnwys 12 tŷ fforddiadwy, newidiadau i’r fynedfa bresennol a chreu lonydd
stad (cynllun diwygiedig i’r hyn a gyflwynwyd yn wreiddiol).
(a) Ymhelaethodd y Rheolwr Cynllunio ar gefndir y cais, gan nodi y gohiriwyd y
cais yng nghyfarfod y Pwyllgor a gynhaliwyd ar 17 Rhagfyr 2018 i alluogi
gwrthwynebwr i siarad ar y cais ac er mwyn cynnal ymweliad safle. ‘Roedd rhai
o’r aelodau wedi ymweld â’r safle cyn y cyfarfod.
Eglurwyd bod y cais gwreiddiol wedi ei ganiatáu gan y Pwyllgor yn ei
gyfarfod ar 14 Rhagfyr 2015. Nodwyd oherwydd bod yr ymgeisydd wedi oedi wrth
arwyddo cytundeb cyfreithiol, mabwysiadwyd Cynllun Datblygu Lleol ar y Cyd
Gwynedd a Môn (CDLl) yng Ngorffennaf, 2017 ac o ganlyniad roedd newid yn y
sefyllfa bolisi. Roedd y cais wedi ei asesu yn unol â’r polisïau cyfredol.
Nodwyd bod y cais ar gyfer 24 tŷ gyda 12 o’r tai yn rhai fforddiadwy.
Amlygwyd bod yr angen am dai marchnad agored a thai fforddiadwy wedi ei
gadarnhau gan y cyrff perthnasol, a bod y polisïau yn cefnogi hyn, felly
ystyriwyd fod y cais yn dderbyniol mewn egwyddor.
Tynnwyd sylw bod gwrthwynebiadau wedi eu derbyn gan ddeiliaid cyfagos ar
sail colli preifatrwydd, aflonyddwch sŵn a chreu strwythurau gormesol.
Eglurwyd bod pellter amrywiol o 23-31 medr rhwng cefnau’r tai presennol a chefnau’r
tai bwriadedig a chredir fod y gwagle hwn ynghyd â llystyfiant presennol a
dyluniad/lleoliad y tai arfaethedig yn dderbyniol ar sail gwarchod preifatrwydd
rhesymol a gor-edrych.
Cyfeiriwyd at wrthwynebiadau a dderbyniwyd gan ddeiliaid lleol parthed y
cynnydd mewn trafnidiaeth a’r diffyg llwybrau troed, er yn cydnabod y
gwrthwynebiadau, nid oedd gan yr Uned Drafnidiaeth unrhyw wrthwynebiad i’r
trefniant bwriadedig yn ddarostyngedig ar gynnwys amodau perthnasol. Nodwyd bod
y bwriad hefyd yn dderbyniol ar sail paratoi cyfleusterau parcio, teithio a
mynediad i’r tai eu hunain ac yn hygyrch ar sail ei leoliad.
Nodwyd bod yr Uned Polisi Cynllunio ar y Cyd wedi cadarnhau bod maint y
llecyn agored ar gyfer y datblygiad yn cydymffurfio gyda gofynion Polisi ISA5
o’r CDLl ynghyd â chydymffurfio gyda gofynion Canllaw Cynllunio Atodol:
Datblygiadau Tai a Llecynnau Agored o Werth Adloniadol. Er bod gwrthwynebiadau
wedi eu derbyn gan ddeiliaid cyfagos i leoliad y llecyn agored, credir bod ei
leoliad yn dderbyniol gan ystyried bod goruchwyliaeth naturiol o’r llecyn gan
nifer helaeth o dai o fewn y datblygiad ac ni ellir gwneud defnydd amgen o’r
rhan yma o’r safle, gan ystyried y cyfyngiadau adeiladu oherwydd ei agosatrwydd
at yr is-orsaf nwy a’r gwaith trin carthion arfaethedig. Ymhelaethwyd pe
adleolir y llecyn agored, ni ellir datblygu lleoliad presennol y llecyn agored
ar gyfer tai, gan olygu gostyngiad yn y nifer o dai ar y safle, ac y gallai hyn
olygu ni fyddai’r datblygiad yn hyfyw.
Roedd y datblygiad yn dderbyniol o safbwynt polisïau lleol a chenedlaethol
perthnasol am y rhesymau a roddwyd yn yr adroddiad.
(b) Yn manteisio ar yr hawl i siarad nododd gwrthwynebydd y prif
bwyntiau canlynol:-
·
Ei fod yn cynrychioli
trigolion y 3 tŷ a oedd yn wynebu’r safle;
·
Byddai gor-edrych i erddi’r
tai presennol yn deillio o osodiad y tai;
·
Byddai ffenestri tai yn
wynebu’r tai presennol gan effeithio’n andwyol ar fwynderau;
·
Bod mynediad i’r tai presennol
drwy ffordd breifat gul ac nid oedd lle i droi car;
·
Pryderon mawr am y datblygiad
ond gellir eu datrys drwy gydweithio;
·
Byddai cynnydd llif traffig
i’r fynedfa.
(c) Yn manteisio ar yr hawl i siarad nododd asiant yr ymgeisydd
y prif bwyntiau canlynol:-
·
Bod y cais wedi ei addasu i
gyd-fynd â pholisïau’r CDLl;
·
Bod Cartrefi Cymunedol Gwynedd
am ddatblygu’r safle yn amodol bod caniatâd cynllunio mewn lle;
·
Bod y bwriad yn cynnwys 12
tŷ fforddiadwy oherwydd bod rhan o’r safle tu allan i’r ffin, 6 tŷ
fforddiadwy oedd yn rhan o’r cais blaenorol;
·
Bod y math o unedau yn cwrdd
â’r angen am dai 2-3 ystafell wely;
·
Bod angen clir yn yr ardal am
dai fforddiadwy, nid oedd yn bosib diwallu’r angen tu mewn i’r ffin datblygu yn
unig;
·
Derbyniwyd gwrthwynebiadau o
ran lleoliad y llecyn agored, bwriedir gosod ffens atal dringo 2.3 medr o
uchder ynghyd â chlawdd o amgylch ffin y llecyn agored er mwyn sicrhau
diogelwch a darparu mesur gwarchod bioamrywiaeth;
·
Er yn cydnabod gwrthwynebiadau
trigolion lleol o ran cynnydd mewn traffig ac mai palmant ar un ochr y ffordd y
darperir, roedd yr Uned Drafnidiaeth yn fodlon efo’r bwriad.
(ch) Gwnaed y prif bwyntiau
canlynol gan yr aelod lleol (nad oedd yn aelod o’r Pwyllgor Cynllunio hwn):-
·
Bod pobl leol yn gwrthwynebu’r
bwriad yn ei ffurf bresennol, gyda’r angen i edrych ar y nifer o dai a lleoliad
y llecyn agored;
·
Bod y Datganiad Dyluniad a
Mynediad yn edrych fel copi o ddatganiad arall;
·
Bod y llecyn agored wedi ei
leoli ger y rheilffordd, er bod yr asiant yn nodi y byddai ffens atal dringo,
fe fyddai plant yn darganfod ffordd o fynd drosodd neu o amgylch;
·
Gofynnir i ail-edrych ar
osodiad y safle er mwyn cael y llecyn agored wrth ymyl y tai presennol, fel y
caniatawyd yn wreiddiol. Ynghyd ag edrych ar leoliad y byngalo ar gyfer yr
anabl gan ei fod yn bell o’r ffordd fawr;
·
Bod yr Uned Drafnidiaeth yn
gofyn am balmant bob ochr i’r ffordd at y briffordd fel rhan o’r caniatâd
gwreiddiol. Roedd palmant ar un ochr o’r ffordd bellach yn dderbyniol i’r Uned
Drafnidiaeth, er y byddai cynnydd mewn traffig;
·
Ei fod yn gefnogol i dai ar y
safle ond nid yn ei ffurf bresennol;
·
Bod y gwrthwynebiadau wedi eu
trafod gyda swyddog o Gartrefi Cymunedol Gwynedd ond nid oedd yn cydweld;
·
Bod y bwriad yn golygu
byddai’r ffordd mynediad yn torri mewn i ffordd breifat er mwyn cynnwys 2
dŷ ychwanegol;
·
Bod y llecyn agored ar gyfer y
pentref cyfan;
·
Ei fod yn bosib newid gosodiad
y safle i gyd-fynd â dymuniadau'r gymuned leol a sicrhau diogelwch plant a oedd
yn hynod bwysig;
·
Gofyn i’r Pwyllgor
wrthwynebu’r cais oherwydd lleoliad y llecyn agored a lleoliad y byngalo ar
gyfer yr anabl.
(d) Cynigwyd ac eiliwyd i ganiatáu’r cais.
Yn ystod y drafodaeth ddilynol nodwyd y prif sylwadau canlynol gan aelodau:
·
Gofyn am eglurhad pan nad oedd
yn bosib adeiladu ar y tir ger yr is-orsaf nwy;
·
Os nad oedd yn ddiogel i adeiladu
ar y tir ger yr is-orsaf nwy, sut gellir lleoli’r llecyn agored yno? Materion
diogelwch yn ogystal ar y rhan yma o’r safle oherwydd ei fod ger y rheilffordd;
·
Bod nifer o safleoedd a
ddatblygwyd ar gyfer tai yn agos at reilffyrdd. Nid oedd yn fater diogelwch
sylweddol oherwydd y gellir lliniaru’r risgiau o ran tresmasu ar y rheilffordd;
·
Pe adleolir y llecyn agored,
byddai’n golygu colli tir lle gellir adeiladu arno gan leihau’r nifer o dai,
gyda risg o golli’r datblygiad oherwydd y gallai fod yn anhyfyw;
·
Wrth gloriannu diogelwch plant
a rhagor o dai, bod angen rhoi blaenoriaeth i ddiogelwch plant. Dylid symud y
llecyn agored i leoliad diogel yn unol â dymuniad y gymuned a’r aelod lleol;
·
Bod yr elfen tai fforddiadwy
i’w groesawu a byddai’r datblygiad yn helpu i ddiogelu ysgolion a’r iaith
Gymraeg;
·
Bod y safle yn ddelfrydol i
ddiwallu’r angen am dai ond roedd gormod o risg efo gosodiad presennol y safle.
Roedd angen pwyso a mesur o ran gostyngiad yn y nifer o dai a’r risg i fywyd;
·
Pryder o ran y fynedfa, pe
caniateir y cais, dylid lleihau’r cyflymder uchaf ar y briffordd o 60mya i
30mya.
(dd)
Mewn ymateb i’r
sylwadau uchod, nododd y swyddogion:
·
Bod yr ymgeisydd
wedi derbyn gwybodaeth gan yr Uned Rheolaeth Adeiladu o ran cyfyngiadau
adeiladu ar y tir ger yr is-orsaf nwy;
·
Bod dwy ffens o
amgylch yr is-orsaf nwy a oedd yn adeilad a oedd wedi ei ddiogelu. Roedd
ffensys tebyg i’r hyn a gynigir gan yr ymgeisydd, wrth ymyl asedau Network
Rail;
·
Bod y llecyn agored yn fwy
na’r hyn a oedd yn ofynnol, felly roedd opsiwn i gael byffer a ffens yn
ychwanegol i’r ffens a gynigir gan yr ymgeisydd;
·
Cae agored oedd y
safle yn bresennol, nid oedd unrhyw beth i atal plant rhag chwarae ar y tir ger
y rheilffordd.
(e) Cynigwyd gwelliant bod dwy ffens yn cael eu gosod rhwng y llecyn
agored a therfyn y safle. Pleidleisiwyd ar y gwelliant, syrthiodd y gwelliant.
Yn ystod y drafodaeth ddilynol nodwyd y prif sylwadau canlynol gan aelodau:
·
Wedi byw wrth ymyl rheilffordd
brysur am 17 mlynedd, nid oedd unrhyw ddigwyddiad o ran diogelwch yn ystod y
cyfnod. Gellir lliniaru’r risg o ran tresmasu ar y rheilffordd, collwyd cyfle
drwy beidio â chefnogi’r gwelliant;
·
Bod perygl yn ogystal o ran
plant yn gwneud drygau e.e. taflu rhywbeth at y trenau;
·
Bod y bwriad yn or-ddatblygiad
o’r safle. Ddim yn erbyn yr egwyddor o ddatblygu’r safle ar gyfer tai ond
pryderon o ran diogelwch yng nghyswllt yr is-orsaf nwy a’r rheilffordd.
(f)
Mewn ymateb i’r sylwadau uchod, nododd y swyddogion:
·
Bod y sefyllfa o
ran diogelwch yn fater o dystiolaeth, gyda’r angen i gloriannu’r risg. Roedd y newidiadau a grybwyllwyd gan rhai o’r
aelodau i osodiad y safle yn newidiadau sylweddol a fyddai’n debycach o olygu
gwrthod y cais, byddai angen rhesymau pe bwriedir gwrthod y cais. Dylid sicrhau
bod tystiolaeth o ran y risg ynghlwm â lleoliad y llecyn agored gan allai
effeithio ar egwyddor y datblygiad;
·
Bod caniatâd
blaenorol i ddatblygu tai ar safle’r cais a’i fod yn anodd gweld unrhyw reswm
gwrthod heb fod risg i’r Cyngor o ran apêl;
·
Ni dderbyniwyd
ymateb gan Reilffordd Eryri a’i fod yn bur debyg nad oedd ganddynt wrthwynebiad
i’r bwriad;
·
Pe byddai bwriad gan yr
ymgeisydd i newid gosodiad y safle, byddai’r gosodiad wedi ei newid yn dilyn
trafodaethau;
·
Bod y nifer o dai i’r hectar
yn cwrdd â’r safon, gyda gerddi eang a lle parcio i’r tai. Pryderu pe gwrthodir
y cais ar sail or-ddatblygiad.
(g) Pleidleisiwyd ar y cynnig i
ganiatáu’r cais, syrthiodd y cynnig.
Cynigwyd i wrthod y cais oherwydd bod gosodiad y
safle yn anaddas gyda’r llecyn agored yn y lleoliad anghywir oherwydd ei
agosatrwydd at yr is-orsaf nwy a’r rheilffordd.
Atgoffodd y Rheolwr Cynllunio yr aelodau, pe byddai
apêl byddai’r cynigydd a’r eilydd yn cyflwyno’r achos mewn apêl.
Mewn ymateb i’r sylw, nododd y cynigydd nad oedd yr
holl dystiolaeth yng nghyswllt yr is-orsaf nwy wedi ei gyflwyno i’r Pwyllgor.
Eiliwyd y cynnig.
Nododd y Rheolwr Cynllunio oherwydd y risg i’r
Cyngor o ran apêl, dylid ystyried gohirio’r cais er mwyn cynnal trafodaethau
pellach efo Cartrefi Cymunedol Gwynedd. Ymhelaethodd er bod risg o apêl
oherwydd diffyg penderfyniad a risg ni fyddai datblygiad tai ar y safle
oherwydd methiant i sicrhau grant, fe fyddai’n ddoeth i’r Pwyllgor ohirio’r
cais er mwyn cynnal trafodaethau pellach.
Cynigwyd i ohirio’r cais er mwyn cynnal
trafodaethau pellach. Tynnodd y cynigydd ei gynnig i wrthod y cais yn ôl gan
eilio’r cynnig i ohirio.
PENDERFYNWYD gohirio’r cais.
Dogfennau ategol: