Agenda item

Dymchwel yr ysgol gynradd bresennol a chodi ysgol gynradd newydd yn ei le gan gynnwys rhodfeydd newydd, caeau chwarae a gwaith cysylltiedig.

 

AELOD LLEOL:         Cynghorydd Elin Walker Jones

 

Dolen i’r dogfennau cefndir perthnasol

Dymchwel yr ysgol gynradd bresennol a chodi ysgol gynradd newydd yn ei le gan gynnwys rhodfeydd newydd, caeau chwarae a gwaith cysylltiedig.

 

(a)      Ymhelaethodd y Rheolwr Cynllunio ar gefndir y cais, gan nodi bod y cais ar gyfer adeiladu ysgol newydd ar gyfer 420 o ddisgyblion i gymryd lle adeilad presennol Ysgol y Garnedd, Penrhosgarnedd, oedd efo capasiti ar gyfer 210 o ddisgyblion. ‘Roedd rhai o’r aelodau wedi ymweld â’r safle cyn y cyfarfod.

 

Tynnwyd sylw at y sylwadau ychwanegol a dderbyniwyd.

 

Nodwyd wrth ystyried bod y cynnig yn deillio o’r prinder llefydd ysgol ar gael ym Mangor a’r angen a adnabuwyd gan yr Awdurdod Addysg i ddarparu rhagor o lefydd ysgol yn ardal Penrhosgarnedd, credir bod graddfa’r datblygiad yn briodol ar gyfer ei leoliad ac yn dderbyniol mewn egwyddor i ddatblygu ysgol ar y safle hwn.

 

Eglurwyd nid oedd y cynnig i ddymchwel ac ail-adeiladu ysgol bresennol yn cyrraedd trothwyon cyflwyno asesiad effaith Iaith Gymraeg. Ymhelaethwyd nad oedd Polisi PS1 o’r Cynllun Datblygu Lleol ar y Cyd (CDLl), yn gofyn am asesiad o effaith o berspectif defnydd tir ar gyfer y math yma o ddatblygiad, oherwydd bod y Cynllun yn ymgorffori nifer o fesurau lliniaru datblygiad ar ffurf polisïau unigol.

 

Derbyniwyd sawl gwrthwynebiad yn ystod y broses ymgynghori gan drigolion Rhodfa Penrhos, a fwriedir ei defnyddio fel mynedfa ar gyfer trafnidiaeth adeiladu wrth ddatblygu’r safle, gan ddatgan pryder ynghylch materion megis sŵn, llwch a llygredd. Nodwyd y gellir goresgyn a rheoli’r materion hyn mewn modd derbyniol o sicrhau dulliau gwaith priodol trwy amodau cynllunio a thrwy gytuno Cynllun Rheolaeth Dulliau Adeiladu cyn dechrau ar y gwaith.

 

Nodwyd nad oedd gan yr Uned Drafnidiaeth unrhyw wrthwynebiad i’r bwriad ond yn argymell sicrhau y darperir y fynedfa gerbydol, llwybrau troed a’r holl ddarpariaeth barcio cyn agor yr ysgol newydd. Nodwyd y byddai’r cynlluniau yn cynorthwyo hybu dulliau teithio amgen ac yn cyd-fynd ag amcan Deddf Teithio Llesol (Cymru) 2013. Ymhelaethwyd yr argymhellir nifer o amodau gan gynnwys gwelliannau ffordd i gynnwys mesurau priodol i arafu cyflymder traffig ar hyd Ffordd Penrhos ynghyd ag amod o ran rheoli symudiadau traffig adeiladu yn ystod cyfnod penodol o’r dydd.

 

Nodwyd y derbyniwyd gwybodaeth y byddai’r llwybr o’r maes parcio i Rodfa Penrhos yn cael ei gau yn ystod y cyfnod adeiladu yn ogystal â’r llwybr ar hyd Rhodfa Penrhos a hynny ar sail pryderon lleol am ddiogelwch. Ymhelaethwyd y byddai’r llwybr oedd o amgylch caeau chwarae Ysgol Friars yn cael ei agor ar ôl y 3 mis cyntaf, yn dilyn sefydlogi’r llwybr, felly byddai llwybr amgen yn cysylltu efo llwybrau eraill. Nodwyd yn dilyn cwblhau’r datblygiad byddai’r llwybrau yn cael eu hail-agor. Eglurwyd bod Llwybr Cyhoeddus Rhif 25 Cymuned Bangor yn croesi’r safle a bod y cais yn cynnwys rhoi’r hawl i wyro’r llwybr yn swyddogol i ddilyn llwybr troed answyddogol a oedd eisoes wedi ei greu o amgylch caeau chwarae Ysgol Friars. Roedd y llwybr answyddogol hwn, ym mherchnogaeth y Cyngor ac wedi ei wynebu gyda tharmac.

 

Roedd y datblygiad yn dderbyniol o safbwynt polisïau lleol a chenedlaethol perthnasol am y rhesymau a roddwyd yn yr adroddiad.

 

(b)     Cynigwyd ac eiliwyd i ganiatáu’r cais.

 

          Yn ystod y drafodaeth ddilynol nodwyd y prif sylwadau canlynol gan aelodau:

 

·         Pe caniateir y cais, pryder o ran rheolaeth amodau. A allai’r pwyllgor dderbyn diweddariad pan rhyddheir amodau?

·         Pryder bod y bwriad yn mynd i arwain at gau 2 ysgol arall a byddai dyblu nifer y disgyblion yn cael effaith ar yr Iaith Gymraeg o ystyried bod 20% o blant Ysgol y Garnedd yn siarad Saesneg ar yr iard. Byddai’r bwriad ddim yn helpu o ran targed Llywodraeth Cymru i gael miliwn o siaradwyr Cymraeg;

·         Bod asesiad ardrawiad iaith, yn holl bwysig o ran ysgolion a fe ddylid rhoi sylw i’r mater;

·         Byddai caniatáu’r cais yn gallu effeithio ar ddyfodol ysgolion arall? Roedd Kirsty Williams AC, Ysgrifennydd y Cabinet dros Addysg, yn gefnogol i gadw ysgolion ar agor yn hytrach na’u cau;

·         Bod Ysgol y Garnedd yn ysgol Gymraeg a oedd angen adeilad newydd. Er nad oedd cau ysgolion eraill yn fater cynllunio, roedd ad-drefnu ysgolion yn Ardal y Groeslon wedi cael effaith ar y ddau bentref cyfagos;

·         Mai’r cais gerbron oedd ar gyfer adeilad newydd pwrpasol ar gyfer Ysgol y Garnedd;

·         Yr angen am adeilad newydd i Ysgol y Garnedd ers blynyddoedd a bod adeilad Ysgol Babanod Coedmawr yn dirywio gyda plant yn cael eu hanfon i Ysgol y Garnedd eisoes. Croesawu’r bwriad gan nodi nid oedd llawer o dir ar gael o fewn Dinas Bangor ar gyfer adeiladu ysgol newydd. Yn siwr bod llawer o bobl Bangor yn gefnogol i’r bwriad;

·         Y dylai’r sylwadau a wnaed o ran yr effaith ar yr Iaith Gymraeg cael eu pasio i’r Adran Addysg.

 

(ch)   Mewn ymateb i’r sylwadau uchod, nododd y swyddogion:

·         Bod yr amodau a argymhellir yn rhai sylfaenol ar gyfer datblygiad o’r fath. Ni roddir diweddariad i’r Pwyllgor o rhan rhyddau amodau ar y caniatâd cynllunio ond fe allai aelodau gysylltu i dderbyn diweddariad;

·         Mai cais cynllunio oedd o dan ystyriaeth a nid oedd yn ofynnol i gyflwyno asesiad ardrawiad iaith fel rhan o’r cais. Roedd yr effaith ar yr Iaith Gymraeg yn derbyn sylw o dan y drefn trefniadaeth ysgolion, a oedd yn broses ar wahân i gynllunio;

·         Bod cylchlythyrau’r drefn trefniadaeth ysgolion yn nodi’r angen i roi sylw i’r effaith ar yr iaith o dan y drefn trefnidiaeth ysgolion. Ni danseilir yr angen am asesiad iaith ond ei fod yn cael ei gyfarch a’i gloriannu’n fanwl o dan drefn arall;

·         Bod cynnig i gau’r ysgolion dan sylw wedi bod yn destun rhybudd statudol eisoes a’i fod yn derbyn sylw gan y Cabinet yn ei gyfarfod ar 6 Tachwedd. Roedd y drefn gynllunio a’r drefn gabinet yn ddwy drefn ar wahân a ni fyddai caniatáu’r cais gerbron yn golygu y byddai’r Cabinet yn cadarnhau rhybudd statudol.

 

(d)     Yn unol â’r Rheolau Gweithdrefn, cofnodwyd y bleidlais ganlynol i ganiatáu’r cais:

              

O blaid y cynnig i ganiatáu’r cais (9):  Y Cynghorwyr Stephen Churchman, Elwyn Edwards, Louise Hughes, Anne Lloyd Jones, Berwyn Parry Jones, Huw G. Wyn Jones, Edgar Wyn Owen, Cemlyn Williams a Eirwyn Williams.

 

Yn erbyn y cynnig i ganiatáu’r cais (5):  Y Cynghorwyr Eric M. Jones, Dilwyn Lloyd, Gareth A. Roberts, Gruffydd Williams a Owain Williams.

 

         Atal, (0)

 

PENDERFYNWYD dirprwyo’r hawl i’r Uwch Rheolwr Cynllunio ganiatáu’r cais yn ddarostyngedig i dderbyn sylwadau cadarnhaol oddi wrth Uned Gwarchod y Cyhoedd ynghyd â chanlyniadau cadarnhaol i’r broses o ymgynghori’r gwyriad i’r llwybr cyhoeddus. Dylid hefyd cynnwys yr amodau canlynol:

 

1.     Amser (5 mlynedd)

2.    Yn unol â’r cynlluniau

3.    Cytuno ar ddeunyddiau a lliwiau terfynol

4.    Amodau trafnidiaeth

5.    Amod Dŵr Cymru

6.    Cyflwyno a chytuno Datganiad Dulliau Adeiladu Amgylcheddol  

       manwl - bydd y Datganiad yn cynnwys Cynllun Rheoli Gwastraff ar  

       gyfer y cyfnod o ddatblygu’r safle.

7.    Cyflwyno a chytuno Cynllun Tirlunio Manwl

8.    Cyflwyno a chytuno Cynllun Lliniaru Ecolegol manwl.

9.    Rhaid dilyn yn union argymhellion yr Arolwg Ecolegol

10.  Rhaid dilyn yn union argymhellion yr Adroddiad Coed

11.  Cyn i’r ysgol newydd ddod yn weithredol rhaid cyflwyno a chytuno  

       Cynllun Dymchwel ar gyfer yr ysgol bresennol a fydd yn cynnwys  

       amserlen ar gyfer y gwaith dymchwel, adfer tir a thirweddu ynghyd

       ag amserlen ar gyfer arolwg ystlumod ychwanegol a fydd i’w  

       gwblhau cyn i’r gwaith ddymchwel ddigwydd.

12.  Cyfyngiadau oriau gwaith yn ystod y cyfnod adeiladu (i’w gytuno

       gyda’r Uned Trafnidiaeth a’r Gwasanaeth Gwarchod y Cyhoedd)

13.  Unrhyw amodau ychwanegol angenrheidiol gan y Gwasanaeth  

       Gwarchod y Cyhoedd

14.  Cytuno’r ymdriniaeth o’r ffiniau

15.  Amod Uned Dŵr ac Amgylchedd

 

       Nodiadau

1.    Dŵr Cymru

2.    Cyfoeth Naturiol Cymru

3.    Priffyrdd

4.    Uned Llwybrau

5.    Uned Dŵr ac Amgylchedd