Agenda item

Lleoli 2 garafan sefydlog ychwanegol i’r safle presennol ynghyd â gwelliannau i’r safle a gosod carafan sefydlog fel swyddfa / derbynfa. 

 

AELOD LLEOL:         Y Cynghorydd John Brynmor Hughes

 

Dolen i’r dogfennau cefndir perthnasol

Lleoli 2 garafán sefydlog ychwanegol i’r safle presennol ynghyd a gwelliannau i’r safle a gosod carafán sefydlog fel swyddfa / derbynfa.

 

(a)     Ymhelaethodd yr Uwch Swyddog Rheolaeth Datblygu ar gefndir y cais, gan nodi bod y safle o fewn Ardal o Harddwch Naturiol Eithriadol (AHNE) a Thirwedd o Ddiddordeb Hanesyddol Eithriadol.

 

         Nodwyd mai’r prif bolisi i’w ystyried wrth asesu egwyddor y datblygiad oedd Polisi TWR 3 o’r CDLl.  Y rhan perthnasol o’r polisi o safbwynt y cais yma oedd rhan 3. Eglurwyd bod y polisi yn gallu caniatáu estyniadau bychain i arwynebedd y safle a / neu ail-leoli unedau o leoliadau amlwg i leoliadau llai amlwg yn ddarostyngedig i gydymffurfio gyda meini prawf. Tynnwyd sylw nad oedd y polisi yn caniatáu cynyddu nifer y carafanau sefydlog ar safleoedd tu mewn i’r AHNE nac ychwaith Ardaloedd Tirwedd Arbennig. ‘Roedd y bwriad yn groes i ofynion Polisi TWR 3 o safbwynt safleoedd tu mewn i’r AHNE.

 

         Cydnabyddir bod y datblygiad yn dangos rhai gwelliannau i gyfleusterau’r safle presennol ac y bwriedir tirlunio yn ychwanegol ar ran o’r safle, fodd bynnag nid oedd y bwriad yn goresgyn egwyddor sylfaenol Polisi TWR 3 ac adroddiad Gillespies nad oedd capasiti ar gyfer carafanau sefydlog ychwanegol o fewn yr AHNE.

 

(b)     Yn manteisio ar yr hawl i siarad nododd asiant yr ymgeisydd y prif bwyntiau canlynol:-

·         Bod Polisi TWR 3 yn cael ei weithredu fel un brwsh llydan;

·         Nid oedd yr Uned AHNE yn gwrthwynebu’r cais;

·         Bod safle’r cais yn safle mewnlenwi yng nghanol safleoedd carafanau eraill;

·         Nid oedd adroddiad Gillespies o ran capasiti a sensitifrwydd y dirwedd yn rhagnodol;

·         Gofyn i’r Pwyllgor ystyried cynnal ymweliad safle.

 

(c)     Gwnaed y prif bwyntiau canlynol gan aelod oedd yn gweithredu fel aelod lleol (nad oedd yn aelod o’r Pwyllgor Cynllunio hwn):-

·         Bod y safle yn daclus ac wedi ei leoli yng nghanol safleoedd carafanau eraill felly ni fyddai’n cael effaith ar yr ardal;

·         Byddai’r bwriad yn golygu estyniad bach i’r safle presennol;

·         Bod yr Uned AHNE yn nodi na fyddai effaith niweidiol ar yr AHNE;

·         Gellir darparu swyddfa/derbynfa mewn dull amgen i’r garafán sefydlog;

·         Byddai’r bwriad yn golygu codi safon diogelwch a darparu ffôn a Wi-Fi;

·         Awgrymu y dylid cynnal ymweliad safle.

 

(ch)   Cynigiwyd ac eiliwyd i wrthod y cais.

 

Yn ystod y drafodaeth ddilynol nodwyd y prif sylwadau canlynol gan aelodau:

 

·         Bod digonedd o garafanau yn yr ardal ac fe ddylid gwrthod yn unol â Pholisi TWR 3;

·         Dylid ystyried cynnal ymweliad safle gan fod y cais yn cynnig gwelliannau i’r safle;

·         Bod y bwriad yn groes i Bolisi TWR 3 ac adroddiad cwmni Gillespies yn nodi nad oedd capasiti yn y dirwedd ar gyfer y math yma o ddatblygiad. O ystyried y polisi a’r adroddiad yn synnu bod yr Uned AHNE yn nodi bod capasiti yn y dirwedd;

·         Gellir darparu ffôn a Wi-Fi ar y safle yn ei ffurf bresennol;

·         Pryder o ystyried sylwadau’r Swyddog Carafanau bod tor amod eisoes gyda’r risg lledaenu tân angen ei ddelio efo;

·         Bod y safle wedi ei leoli tu fewn i’r AHNE felly dylid gwrthod y cais;

·         Perygl gosod cynsail pe caniateir y cais.

 

PENDERFYNWYD       Gwrthod am y rhesymau canlynol: 

 

1.         Mae’r bwriad yn golygu cynyddu nifer carafanau sefydlog ar safle carafanau sefydlog presennol oddi fewn i Ardal o Harddwch Naturiol Eithriadol.  Nid yw polisi TWR 3 Cynllun Datblygu Lleol ar y Cyd Gwynedd a Môn yn caniatáu cynyddu nifer y carafanau sefydlog neu’r unedau siale ar safleoedd presennol oddi fewn i’r Ardal o Harddwch Naturiol Eithriadol.  Mae’r bwriad felly yn groes i ofynion maen prawf 3 (iii) polisi TWR 3 Cynllun Datblygu Lleol ar y Cyd Gwynedd a Môn (Gorffennaf 2017).

 

2.         Ni ystyrir y byddai gosod carafán sefydlog yn y lleoliad dan sylw fel swyddfa / derbynfa yn cyfrannu dim tuag at wella dyluniad, gosodiad ac edrychiad y safle a’i le yn y dirwedd o’i amgylch ac ni ystyrir felly fod y bwriad yn cwrdd gofynion maen prawf 3 (vi) o bolisi TWR 3 Cynllun Datblygu Lleol ar y Cyd Gwynedd a Môn (Gorffennaf 2017).