Rhaglen a chofnodion

Croesawyd Aelodau’r Cabinet a Swyddogion i’r cyfarfod.

Derbyniwyd ymddiheuriadau gan y Cyng. Gareth Thomas, Cyng. W Roy Owen a’r Cyng. Gethin Glyn Williams.

Datganodd y Cynghorydd Ioan Thomas fuddiant personol yn Eitem 6 ar y rhaglen oherwydd ei fod yn aelod o Ymddiriedolaeth Harbwr Caernarfon. Roedd yr aelod o’r farn nad oedd yn fuddiant oedd yn rhagfarnu ac fe gymerodd ran yn y drafodaeth ar yr eitem.

Nid oedd unrhyw faterion brys.

Nid oedd unrhyw faterion yn codi o Bwyllgorau Craffu.

Cywirwyd y cofnodion a gyflwynwyd gyda phapurau’r cyfarfod i nodi presenoldeb swyddog, ac yna llofnododd y Cadeirydd gofnodion cyfarfod y Cabinet a gynhaliwyd ar 3 Tachwedd 2015.

Cyflwynwyd yr adroddiad gan y Cyng. Dafydd Meurig.

Eiliwyd gan y Cyng. Mandy Williams-Davies.

PENDERFYNIAD

Yn dilyn y broses ymgynghori, derbyn y newidiadau a nodir ym mharagraff 2.4 yr adroddiad a bwrw ‘mlaen i sefydlu Gorchymyn Parcio newydd.

Dirprwyo hawl i Bennaeth Adran Rheoleiddio mewn ymgynghoriad a'r Aelod Cabinet dros Rheoleiddio, Pennaeth Cyfreithiol a'r Pennaeth Cyllid i wneud unrhyw fan addasiadau o fewn y strategaeth sydd eu hangen i’r cynllun er cwblhau y gorchymyn.

Cynnwys meysydd parcio staff y Cyngor yn y Gorchymyn Parcio er mwyn gallu rheoli cam ddefnydd ac agweddau iechyd a diogelwch yn fwy effeithlon.

Cyflwynwyd yr adroddiad gan y Cyng. Peredur Jenkins.

Eiliwyd gan y Cyng. W Gareth Roberts.

PENDERFYNIAD

Derbyn yr adroddiad ar adolygiad diwedd yr ail chwarter (sefyllfa 30 Medi 2015) o’r rhaglen gyfalaf, a chymeradwyo’r ariannu addasedig a gyflwynir yn rhan 2.2 – 2.8 o’r adroddiad, sef:

·      cynnydd £965,000 mewn defnydd o fenthyca heb gefnogaeth,

·      cynnydd £3,278,000 mewn defnydd o grantiau a chyfraniadau,

·      cynnydd £154,000 mewn defnydd o dderbyniadau cyfalaf,

·      cynnydd £300,000 mewn defnydd o gyfraniadau refeniw,

·      lleihad £17,000 mewn defnydd o’r gronfa gyfalaf,

·      cynnydd  £847,000 mewn defnydd o gronfeydd adnewyddu,

·      trosglwyddo £200,000 rhwng cynllun Llyfrgell Bala a chynllun Ysgolion dalgylch y Berwyn.

Cyflwynwyd yr adroddiad gan y Cyng. Peredur Jenkins.

PENDERFYNIAD

Derbyn yr adroddiad ar adolygiad diwedd yr ail chwarter (sefyllfa 30 Medi 2015) o’r Gyllideb Refeniw, ac wedi ystyried y sefyllfa ariannol ddiweddaraf parthed cyllidebau pob adran / gwasanaeth, gofyn i’r Aelodau Cabinet a’r penaethiaid adrannau perthnasol gymryd camau priodol ynglŷn â materion o dan eu arweiniad/rheolaeth.

Nodi'r amrywiol adolygiadau o drefniadau crybwyllwyd yn yr adroddiad a’r camau i’w cymryd gan adrannau i gadw rheolaeth ar eu cyllidebau.

Wedi ystyriaeth o’r sefyllfa, cymeradwyo, yn benodol, yr addasiadau a throsglwyddiadau argymhellwyd mewn perthynas â’r Adrannau Addysg, Economi a Chymuned, Rheoleiddio a Chyllidebau Corfforaethol.

Cyflwynwyd yr adroddiad gan y Cyng. Peredur Jenkins.

Eiliwyd gan y Cyng. John Wynn Jones.

PENDERFYNIAD

Derbyn y diweddariad a’r crynodeb o Strategaeth Ariannol 2016/17 – 2019/20 a pharhau gyda’r cynllun ymateb cyfredol, ‘Her Gwynedd’, ar gyfer 2016/17 – 2017/18, gan ddatgan:

a)  Bod Cabinet Cyngor Gwynedd yn gwrthwynebu’r toriadau yn ei dyraniad grant sy’n cael ei orfodi ar y Cyngor gan Lywodraethau San Steffan a Chymru.

b)  Y bydd Cabinet Cyngor Gwynedd yn gwireddu ei chyfrifoldeb statudol i gytuno ar gyllideb gytbwys rhag iddi, yn y pen draw, redeg allan o arian a methu talu ei gweithwyr a’i chyflenwyr.

Cyflwynwyd yr adroddiad gan y Cyng. Dyfed Edwards.

Eiliwyd gan y Cyng. W Gareth Roberts.

PENDERFYNIAD

Derbyn a nodi’r wybodaeth a gyflwynwyd yn yr adroddiad i’r cyfarfod.

Cyflwynwyd yr adroddiad gan y Cyng. Dyfrig Siencyn.

Eiliwyd gan y Cyng. Ioan Thomas.

PENDERFYNIAD

Y dylai’r Cyngor ymateb i’r ymgynghoriad drwy groesawu’r bwriad i gyfyngu ar wariant yr Awdurdod Tân dros y tair mlynedd nesaf, ond gan bryderu na dderbyniwyd tystiolaeth ariannol ynglŷn a gallu’r awdurdod i gyflawni arbedion effeithlonrwydd, ac yn tynnu sylw at effaith hynny ar allu’r Cabinet i graffu yr Ymgynghoriad.

Gofyn am ystyriaeth i gyfundrefn graffu rhanbarthol gael ei sefydlu er mwyn craffu gwerth am arian a geir gan yr Awdurdod Tân.

Cyflwynwyd yr adroddiad gan y Cyng. Mair Rowlands.

Eiliwyd gan y Cynghorwyr Dyfrig Siencyn ac W Gareth Roberts.

PENDERFYNIAD

Derbyn yr adroddiad a gyflwynwyd i’r cyfarfod ar waith y Panel Strategol Diogelu Plant ac Oedolion Bregus (Atodiad 1).

Cymeradwyo’r Polisi Corfforaethol Diogelu Plant ac Oedolion Bregus sydd wedi ei adolygu a’i ddiweddaru (Atodiad 2).