Mater - cyfarfodydd

Nodi a derbyn y wybodaeth yn yr adroddiad.

Cyflwynwyd gan Cyng. Ioan Thomas

PENDERFYNIAD

Nodi a derbyn y wybodaeth yn yr adroddiad.

TRAFODAETH

Cyflwynwyd yr adroddiad gan dynnu sylw at rai cynlluniau o fewn yr adran Gyllid. Mynegwyd fod y gwaith o ledaenu defnydd o system reoli dogfennau a chofnodi electronig yn agosáu at gyrraedd ei derfyn. Bellach dim ond 5 tîm sydd ar ôl o holl wasanaethau’r Cyngor yn aros i fudo i’r system newydd.

Mynegwyd fod y Gwasanaeth Archwilio Mewnol wedi codi eu hincwm a hyn ar ddechrau 2019/20 drwy ganolbwyntio eu hadnoddau gyflawni archwiliad o gyfrifon cynghorau cymuned a thre. Amlinellwyd fod camgymeriad dynol wedi ei wneud ym mis Mawrth yn y Gwasanaeth Cyflogau a arweiniodd at Gymorthfeydd Dosbarth yn colli £30 o’u cyflogau.  Bellach, nodwyd fod y cyflogau wedi ei gosod i’w lefel gywir.

O ran Technoleg Gwybodaeth mynegwyd fod cael achosion o golli gwasanaeth wedi sicrhau fod y Gwasanaeth wedi uwchraddio eu canolfannau data er mwyn cryfhau gwydnwch y gwasanaeth. Nodwyd y bydd y ddwy ganolfan ddata yn gallu adfer gwasanaethau bron yn syth.

Diolchwyd i staff am gau cyfrifon er bod pwysau ychwanegol gyda chau cyfrifon Bwrdd Uchelgais Economaidd Gogledd Cymru yn ogystal. Pwysleisiwyd yn ogystal fod arbedion yr adran wedi eu cwblhau am 2019/20.

Sylwadau’n codi o’r drafodaeth

¾     Tynnwyd sylw at berfformiad y Gwasanaeth Trethi gan nodi fod nifer uchel o ymholiadau wedi ei derbyn o ganlyniad i godi premiwm treth ar dai gwag ac ail gartrefi. Er hyn nodwyd y bydd hunanwasanaeth yn cael ei gynnig i drethdalwyr cyn hir, ac o ganlyniad bydd modd gwneud rhai ymholiadau ac addasiadau syml ar y we, fydd yn lleihau’r nifer galwadau.

¾     Mynegwyd gwerthfawrogiad fod y Gwasanaeth Budd-daliadau wedi lleihau'r nifer dyddiau a gymerwyd i brosesu cais budd-dal newydd, ond holwyd ble mae’r Cyngor o’i gymharu â siroedd eraill. Nodwyd ar hyn o bryd yn y canol, ond mae’r Gwasanaeth yn ceisio parhau i wella.